Xetrëne Jë La Thiina Ka Ipië
1 Kola lapaune koi Iehova hnene la ketre nekönatr trahmany ka thupë mamoe me ngaan la ketre sooc ka tru trenge catr. (1 Sam. 17:45-47) Kola xomihnine ahoean hnene la ketre thupëtresij la ketre meci ka ngazo catr. (Iobu 1:20-22; 2:9, 10) Kola upe asë hnene la Hupuna i Akötresie kowe la Tretretro i angeic, lo itre ini hnei angeic hna hamën kowe la itre atr. (Ioane 7:15-18; 8:28) Ame asë hi ngöne la köni ewekë celë, atraqatr la thangane la hni ka ipië. Tune mina fe enehila, laka, nyipi ewekë catr troa hetrenyi la hni ka ipië ngöne la nöjei jole hne së hna troa cile kow.—Kol. 3:12.
2 Ngöne La Easë a Cainöj: Pine laka easë la itre hlue Keresiano, easë a tro fë la maca ka loi cememine la hni ka ipië kowe la nöjei atr asë, ene laka, thaa easë kö a iwangatrehmekunyi atr, ene la troa canga goeën la itre hane kupeine ngönetrei, maine qene nöj maine inamacane ne la itre atr, maine itre ewekë hna melëne hë hnene la itre atr. (1 Kor. 9:22, 23) Maine tro la itre xaa atr a calogitr maine pi tru me thipetrije la maca ne Baselaia, thaa tro pi kö së a sa angazon, ngo loi e tro pe së a thele la itre atr ka hni ka menyik. (Mat. 10:11, 14) Thaa tro kö së a thele troa pi mama fë kowe la itre xaa atr la atrehmekune ka eje the së maine aqane ini së, ngo loi e tro pala hi së a eatrongë angatr kowe la Wesi Ula i Akötresie, me atrehmekune laka ka hetre thangane catre kö la Tusi Hmitrötr hune la itre hne së hna troa qaja. (1 Kor. 2:1-5; Heb. 4:12) Loi e tro sa tui Iesu, ene la troa kuca asë la itre nyine atrunyi Iehova.—Mareko 10:17, 18.
3 Hnine La Ekalesia: Loi e tro fe la itre Keresiano a ‘eëne la thiina ka ipië kowe la ketre me ketre.’ (1 Pet. 5:5) Maine ame ngöne la itre mekuna së tre, ka draië kö la itre xan hu së, haawe, thaa tro hmaca kö së a treqene troa nyihlue koi së hnene la itre trejine me easë, ngo tro pena ha së a thele la itre aqane troa nyihlue i angatr. (Ioane 13:12-17; Fil. 2:3, 4) Thaa tro pi kö së a mekune ka hape thaa easë hmaca kö a troa hane xome la itre hnëqa hnine la ekalesia, tune la troa nyidrawane la Uma Ne Baselaia.
4 Kola xatua së hnene la thiina ka ipië troa ‘ihnim me ixomihnikeu’ ene pe troa hetrenyi la tingeting memine la caas e hnine la ekalesia. (Efe. 4:1-3) Kola xatua së fe hnene la thiina ka ipië troa drengethenge la itre hna acile troa elemekene la ekalesia. (Heb. 13:17) Eje a upi së troa kapa la itre eamo maine ihaji hna troa hamëne koi së. (Sal. 141:5) Nge kolo mina fe a xatua së hnene la thiina ka ipië troa mejiune koi Iehova ngöne la easë a xome la itre hnëqa hna upi së troa cilën e hnine la ekalesia. (1 Pet. 4:11) Tui Davita, easë a wangatrehmekune laka kola tro loi la huliwa, thaa hnei atre kö, ngo qa ngöne laka hna amanathithine la huliwa hnei Akötresie.—1 Sam. 17:37.
5 Xajawane La Akötresi Së: Ame la ka nyipi ewekë catr, tre, ene la tro sa ‘aipië së kö fene la ime ka mene i Akötresie.’ (1 Pet. 5:6) Maine kola traqa koi së la itre ewekë ka tupath la mele së, ma tro jë së a mejiune kowe la aqane troa nuamacanyi së hnene la Baselaia. Ngo loi e tro sa ipië me xomihniahoeany, me treqene tro Iehova a eatrëne la itre hnei Nyidrëti hna thingehnaean ngöne la ijine ka ijij. (Iako. 5:7-11) Tune göne lo pengö i Iobu, ame la hne së hna ajane catrën, tre ene laka, “loi e qaja aloine la atesiwa i Iehova.”—Iobu 1:21.
6 Hnei Daniela perofeta hna ‘xomaconyi angeice kö xajawai Akötresie’ nge hna amanathithi angeice hnei Iehova, nge hnei angeice hna kapa la itre huliwa ka lolo qaathei Nyidrë. (Dan. 10:11, 12) Epi tro mina fe së a hane isa xetrëne la thiina ka ipië, me atre hnyawa laka “ame la thangane la ipië ene la qoue Iehova, te, mo, me atrun, me mel.”—Ite edomë 22:4.