Tro Sa Anyipicine Tune Kaa Kowe La Itre Sinee Së?
1. Pine nemen matre nyipi ewekë troa atreine waiewekë ngöne la easë a cainöj kowe la itre sinee së?
1 Drei la ketre madrine ka tru e troa ce lö elanyi kowe la fene ka hnyipixe cememine la itre sinee së, me caasi me angatr troa hmi koi Iehova! Maine tro sa hane cainöje koi angatr, maine jë tro fe hë a hane eatre elanyi la madrine ka tru cili koi angatr. Ngo maine easë a ajan troa keukawa la aqane tro sa anyipicin, loi e tro së a atreine waiewekë. Hna qaja hnene la ketre qatre thup ka iwai trootro ka hape: “Kola sisitria la itre thangane ka loi la hna anyipicine hnene la itre xan, qa ngöne laka thaa hna acaa tro cainöje kö, ngo hna isa acaa anyipicine pala hi.” Tune kaa la aqane tro sa anyipicine tune lai?
2. Tune kaa la aqane tro la ihnimi së kowe la itre sinee së a xatua së troa ahlën la aja i angatr?
2 Thele Jë Troa Ahlën La Aja i Angatr Troa Atre: Pane canga mekune hnyawa jë la aqane tro epuni a ahlëne la aja ne la itre sinee i epun. (Ite edomë 15:28) Nemene la itre hnei angatr hna hnehengazon? Nemene la itre itupath hnei angatr hna cile kow? Maine jë ijije hi tro epuni a amamane la ketre hna cinyihan maine qaja pena la ketre xötr ne la Tusi Hmitrötr ngöne la ketre mekun hnei angatr hna ajan catrën troa ithanatan. Maine nango nanyi la hna lapa hnene la itre sinee i epun, maine jë tro epuni a anyipicine koi angatr jëne tus maine telefon. Thaa tro pi kö a thaipië angatr, ngo tro pe a catre traan la itre itin ne la nyipici, me nue koi Iehova matre tro Nyidrëti a acian la itre itine feja cili.—1 Kor. 3:6.
3. Qa ngöne laka kola goeëne aloinyi së hnene la itre sinee së, nemene la aqane tro la ewekë cili a nyi gojenyi së troa hane cainöj koi angatr?
3 Hnei Iesu hna inine la ketre atr hnei nyidrë hna thapa qaathene la itre dremoni ka nyimutre, öni nyidrëti ka hape: “Trojë kowe la hnalapa i ’ö, me ite sine i ’ö, me amamane koi angate la ite ewekë atraqate hnei Joxu hna kuca koi ’ö, me hna hnimi ’ö.” (Mar. 5:19) Pane mekune ju së la aqane ketr la itre sinee i nyidrë hnene lai hna anyipicine cili! Maine thaa ewekë kö lai hnei epuni hna hane melën, ngo maine jë troa hane ketr la hni ne la itre sinee i epun hnene la itre huliwa hnei epuni hna kuca, maine hnei itre nekö i epuni pena. Maine tro epuni a qaja la ketre cainöj hnei epuni hna hamën ngöne la Ini Ne Cainöj Qaathei Akötresie, maine kovasio pena hnei epuni hna hane sin, maine hna vizitëne pena la Bethela, maine ketre ewekë pena ka traqa koi epun, haawe, maine jë troa fe gojenyi epuni troa ce thawa me angatr la itre mekun göi Iehova memine la organizasio i Nyidrë.
4. Nemene la itre hnö nyine tro sa neën ngöne la easë a anyipicin kowe la itre sinee së?
4 Loi e Troa Atreine Waiewekë: Ame ngöne la easë a cainöj kowe la itre sinee së, the tro kö a ithanata atrunyi ngöne la kola iöhnyi me angatr. Hnene la ketre trejine trahmanyi hna mekune hmaca lo nyidrë a nyiqaane etid, öni nyidrë ka hape: “Itre hawa ne qejepengöne ni kowe la thineng la nöjei hnenge hna inin qa hnine la Tusi Hmitrötr, nge goi iwesitrë fe ni memine la kemeng hnene lai.” Ame ngöne la kola amamane hnene la sinee së la aja i angeic troa drenge la maca qa hnine la Tusi Hmitrötr, loi e tro la aqane sa së koi angeic a aciane la ajan troa atre pala pë hë la itre xaa ewekë. (Ite edomë 25:7) Loi e tro pala hi së a metrötr, me hni ka menyik, me xomihni ahoeany, tune la easë a ithanata memine la ketre trehnyiwa ngöne la hna cainöje trootro.—Kol. 4:6.
5. Nemene la nyine tro sa kuca maine thaa drei së kö hnene la itre sinee së ngöne la easë a cainöje koi angatr?
5 Ame ngöne la ketre ijin, hnene la itre sinee i Iesu hna mekune ka hape menu hë nyidrë. (Mar. 3:21) Ngo ame hë thupene lai, hnene la itre xan hna hane kapa la nyipici. (Ite hu. 1:14) Maine hne së hë hna catre ce thawa la nyipici memine la itre sinee së nge thaa hna kepe së kö hnei angatr, thaa tro pi kö së a cil. Ijije hi troa saze la itre aqane mel me itre aqane ujë i angatr. Catre pi pe së troa thele la ketre ijin troa qaja koi angatr la ketre mekun ka troa ahlën la itre aja i angatr. Maine jë tro hë së a madrin elanyi troa xatua angatr troa hane nyiqaane trongën la gojenyi ne tro kowe la mele ka thaa ase palua kö.—Mat. 7:13, 14.