Porogaram Ne La Fami—Itre Icasikeu Ne La Ekalesia
1 Maine itre keme me thine nyipunie Keresiano, aja i epuni tro la itre nekö i epuni a tru trootro me hnime me nyihlue i Iehova, ene pe tro fe hë angatr a hane kapa la mele ka thaa ase palua kö ngöne la fene ka hnyipixe hna thingehnaean hnei Akötresie. Tune kaa la aqane tro epuni a xatua angatr troa amë panëne la hmi i Iehova ngöne la mele i angatr? Ame la ka nyipi ewekë, tre ene la tulu hnei epuni hna troa hamën. (Ite edomë 20:7) Hna mekune hmaca hnene la ketre trejine föe la tulu ne la thine i angeic, matre hna qaja hnei angeic ka hape: “Thaa hne huni kö hna hnyingëne thel me luelue maine troa tro maine thaa tro pena kö a tro troa icasikeu.” Ewekë lai ka lapane pala pë hë la he i angeic.
2 Hapeu, trotrohnine kö hnene la hnepe lapa i epuni la aliene la itre icasikeu ne la ekalesia? Ame la ini hne së hna kapa jëne la itre icasikeu cili, tre, kola aegöcatrenyi së matre troa kuca la aja i Akötresie, nge ketre jëne ithuecatre ka tru mina fe la easë a madrine troa ce memine la itre trejine me easë. (Is. 54:13; Rom. 1:11, 12) Ngo ame la pane aliene la itre icasikeu cili, tre, ene la troa atrunyi Iehova “ngöne la ite icasikeu.” (Sal. 26:12) Kola aijijë së hnene la itre icasikeu i Keresiano troa amamane la ihnimi së koi Iehova me troa hmi koi Nyidrë.
3 Loi e Tro Sa “Wange Hnyawa”: Maine tro sa wanga atrune hnyawa lai aliene ka hmitrötr ne la itre icasikeu së, tro ha upi së troa “wange hnyawa” matre thaa tro kö sa majemine troa triane la itre icasikeu me xome hmaca pena ha la itre huliwa ka thaa nyipi ewekë kö kowe la mele së. (Efe. 5:15, 16; Heb. 10:24, 25) Ame ngöne la easë a eköthe la porogaram thatraqane la fami së, maine jë tro sa pane nyiqaane makën la itre ijine icasikeu ne la ekalesia së. Thupene lai, loi e tro sa thupëne hnyawa matre thaa tro kö la itre xaa huliwa a xome la göhnë ne la itre icasikeu së. Loi e troa xecie hnyawa koi së laka hna wanga atrune la itre icasikeu hnene la fami së.
4 Hapeu kolo kö a hane ketri së hnene la aqane catre cile la itre trejine kowe la itre ewekë ka sewe angatr troa sin la itre icasikeu memine la itre asabele? Maine jë ka nango co hi la itre jol hne së hna cile kow, ngo epuni a catre troa elë hune itre ej. Satana a akökötren la itre jol matre troa sawa la nöje i Iehova troa hmi koi Nyidrë. Ngo loi e troa xecie hnyawa koi së laka, tro hë la itre nekö së a wanga atrehmekune la trenge catr hna kuca hnene la fami matre troa sin la itre icasikeu ne la ekalesia. Eje hi laka, maine tro sa huliwa tune lai, tro hë së a hamë angatr la ketre ahnahna ngöne la götrane la ua, nge thatreine jë kö tro angatr a thëthëhmine lai.