Akökötrene Jë La Atreine Troa Thele Mekune Me Itre Atr

1. Nemene edromë hne së hna troa ce wang, nge pine nemen?

¹ Hna hamën la ketre tulu ka lolo ngöne la aqane troa thele mekune memine la itre atr ngöne Ite Huliwa 13⁠:​16-​41, ene lo cainöje i Paulo aposetolo ngöne la sunago e Anetioka e Pisidia. Hnei Paulo hna wanga atrune la aqane mele ne la itre ka drei angeic me aqane mekune i angatr, nge angeic a thele jë troa tro fë la maca ka loi thenge la itre ewekë cili. Ame ngöne la easa ce wange la edromë celë, loi e tro mina fe sa mekune la aqane tro sa kuca tun ngöne la easa cainöje trootro.

2. Nemene la ini hne së hna kapa qa ngöne la aqane nyiqaane Paulo la cainöje i angeic?

² Thele Jë Troa Itrotrohni: Ngacama ame la aliene la maca hnei Paulo hna tro fë, tre hnëqa i Iesu göi troa eatrën la aja i Akötresie, ngo ame pe thaa hnei angeice kö hna nyiqaane la cainöje i angeic memine la mekune cili. Hnei angeice pe hna eköthe hune la itre mekune hna ce thawa memine la angetre Iudra ka drei angeic​—la aqane trongene la nöje i angetre Iudra. (Ite hu. 13⁠:​16-​22) Ketre tune mina fe, tro sa atreine ketr la hni ne la itre atr, e hne së hna thele troa itrotrohni. Maine jë tro sa xome hnyawane la itre hnyinge me drenge hnyawa matre troa atrehmekune la itre mekun hnei angatr hna lapa fë.

3. Nemene la ka ajolëne la itre ka drei Paulo troa kapa la mekune laka Iesu hi lo Mesia hna thingehnaean?

³ Ame la Paulo a qeje pengöne la mele ne la angetre Iudra, tre, angeic a amekunëne la itre ka drei angeic la hna thingehnaeane hnei Akötresie, ene la troa amejëne la ketre Atre Iamele qaathene la itre matra i Davita. Ngo, ala nyimu thene la angetre Iudra ka lapa treqene la ketre atre isi catr, nge ka troa thepe angatre qa ngöne la hna waja huji angatre hnene la musi angetre Roma, nge tro angeic a acile la nöje i Iudra hune la nöjei nöj asë. Thaa sihngödre kö koi angatr laka hna thipetriji Iesu hnene la itre hene hmi i angetre Iudra e Ierusalema, me nue nyidrë kowe la itre musi Roma, me humuthi nyidrë. Hnei Paulo hna una iele angatre tune kaa matre jelenyipicine jë angatre laka nyidrëti hi lo Mesia hna thingehnaean?

4. Tune kaa la aqane kuca i Paulo matre atreine jë angeic thele mekun memine la angetre Iudra ka drei angeic?

⁴ Ithanatane Jë La Itre Mekune Hna Kapa Ha: Hnene laka atre hë Paulo la aqane mekune la itre ka drei angeic, ene pe hnei angeic hna xome la itre mekene tus nyine thele ewekë me angatr hune la itre mekune hnei angatre hna kapa ha. Hanawange la ketre ceitun, hnei angeice hna nyiqaane qeje Iesu ka hape ketre matra i Davita, nge hna anyipici nyidrë hnei Ioane Bapataiso, ketre perofeta i Akötresie hna wanga atrun. (Ite hu. 13⁠:​23-​25) Hnei Paulo hna amaman laka hna ‘aeatrëne la itre tenge ewekë ne la nöjei perofeta,’ ngöne la kola thipetriji nyidrë me ce axeciën hnene la itre hene ne hmi tro nyidrëti a mec. (Ite hu. 13⁠:​26-​28) Ketre, hnei angeice hna qaja ka hape, hna anyipicine hnene la itre atr ka öhnyi Iesu thupene la hna amele nyidrëti hmaca qa hna mec, nge hnei angeic hna xome la itre mekene tus hna eatrën ngöne lo Iesu a mele hmaca, nge itre xötre lai hna atre hnyawa hnene la angetre Iudra ka drei angeic.​—Ite hu. 13⁠:​29-​37.

5. (a) Tune kaa la aqane thele Paulo troa ithanata kowe la angetre Heleni ka drei angeic? (b) Tro sa xome tune kaa la tulu i Paulo ngöne la easa cainöje ngöne la teritoare së?

⁵ Ame ngöne ketre götran, hnei Paulo hna xome la ketre pengöne hna ithanatan kowe la angetre Heleni ngöne la Areopago e Athenai. (Ite hu. 17⁠:​22-​31) Ngo caasi hi la maca hnei angeice hna tro fë, nge ngöne la lue ceitune cili, tre, lolo catre la thangane la aqane tro fë maca angeic. (Ite hu. 13⁠:​42, 43; 17⁠:34) Ketre tune mina fe enehila, troa hetre eloine la aqane cainöje së e hne së hna thele troa xome la itre mekune hna kapa ha hnene la itre ka drei së, nge e hne së hna wangatrune la aqane mele i angatr me aqane mekune i angatr.