Wanga Atrune Jë La Itre Xan—Hnene La Hna Atreine Waiewekë
1 Pëkö ka tui Akötresie me Keriso Iesu, ngöne la troa atrehmekune la itre sipu aja ne la itre atr, me troa hamën la ixatua ka ijije koi angatr. (2 A. l. ite jo. 16:9; Mar. 6:34) Ame la easë a wanga atrehmekune la itre aja ne la itre atr hne së hna cainöje kow, me wanga atrunyi angatr, ijije hi tro sa thele troa ithanatan la maca ka loi hmekune la itre aja cili.
2 Loi e Wanga Atrun La Nöjei Ewekë: Ka atreine waiewekë Iesu. (Mar. 12:41-43; Luka 19:1-6) Tui Iesu, ijije tro sa xome la itre ijine troa cainöjën la maca ka loi, e hne së hna atreine goeën la itre ewekë ka ijij troa ithanatan, ene la itre nyine thaipi uma maine loto, ka amamane la hmi ne la atr, maine itre nyimo hune ihaö.
3 Ijije troa mama la aliene hni ne la atr qa ngöne la iqëmek me aqane ujë i angeic. (Ite edomë 15:13) Maine jë troa aja ixatua me keukawa hnene la ketre atr qa ngöne laka meci hë la ketre sinee, maine kola akötre pena hnene la ketre jol. Tro angeic a madrin e hne së hna pane hane e koi angeic la itre xaa hnepe xötr ne la Tusi Hmitrötr. (Ite edomë 16:24) Maine kola nyinyape lö la atr, maine kolo pena a xepe la medreng a kola treij, ma loi e troa thele ijine troa bëeke matre troa ithanata me angeic. Maine tro sa iwangatruny me “ihnimikeu,” haawe, maine jë tro hë lai atr a drei së ngöne la easë a bëeke hmaca.—1 Pet. 3:8.
4 Troa Atreine Hamë Mekun: Hnei Paulo aposetolo hna öhne laka hetrenyi hnine la traon e Athena la ketre ita hna eköth “Thatraqane La Haze Hna Tha ’te.” Hna nyi jëne hi lai hnei nyidrë matre troa cainöjën la maca ka loi, ke öni nyidrëti ka hape: “Ame la hnei nyipunie hna hmi tha ’te kow, nyidëti hi la hnenge hna troa amamane koi nyipunie.” Hna upe la itre xaa atr hnene la eloine la aqane tro fë Paulo la maca, troa hane wanga atrune la maca ne Baselaia me troa hane nyihlue i Akötresie.—Ite hu. 17:23, 34.
5 Ketre tune mina fe, maine tro sa atreine waiewekë, tro hë së a atrehmekune la itre aja ne la itre atr, nge tro ha aijijë së troa saze la itre aqane tro sa tro fë ithanata. Xome jë la itre hnying matre troa upe la atr troa ketre sipu qaja la itre mekun ka eje e kuhu hni angeic. Mekune ju la itre xötr ne la Tusi Hmitrötr ka troa akökötren la aja i angeic troa drei së. (Ite edomë 20:5) Maine tro sa atreine waiewekë me hane wanga atrunyi angatr, haawe, tro ha xatua së troa tro fë hnyawa la maca ka loi.