Xatuane Jë La Itre Hnainin Troa Trotrohnin Me Olene La Itre Thiina Ka Sisitria i Iehova
1 Ame ngöne la easë a cainöj, thaa easë hmekuje kö a hamën kowe la itre atr la itre trepene ini qa hnine la Tusi Hmitrötr. Easë a fe a xatuane la itre atr troa atre Iehova, ceitune memine la easa thele troa atre la ketre atr, me eköthe thei angatr la hni ne ole kowe la itre thiina i Nyidrë ka sisitria. Hetre thangane catr koi angatr itre ka hetre hni ne ajan troa atre la nyipici göi Akötresie; kola upi angatr troa saze la itre aqane mele i angatr “mate tro pala hi nyipunie ijije koi Iehova, kolo pala hi a amadi nyidë.”—Kol. 1:9, 10; 3:9, 10.
2 Ixatua Ka Hnyipixe Göi Troa Etid: Qaane ju hi la qaan, kola amamane hnyawa koi së hnene la itus Ini Tusi Hmitrötr la itre thiina i Iehova. Kola sa hnyawa la itre hnyinge celë ngöne la pane mekene ne la itus: Hapeu Akötresieti kö a hane kukehni nyipunie?, Ka tune kaa lae Akötresie?, me Ijije kö troa easenyi Akötresie? Kola amamane hnyawa fe hnene la mekene celë la ehmitrötre i Iehova (par. 10), meköti me utipine i Nyidrë (par. 11), ihnimi Nyidrë (par. 13), mene i Nyidrë (par. 16), nge ka senge Nyidrë la itre ngazo, me menyik, me xomihni ahoeany, me nyipici (par. 19). Kola qaja ngöne la paragarafe 20, laka: “Maine tro nyipunieti a catre thele troa atrepengöi Iehova, thaa tro hmaca kö Nyidrëti a sihngödri koi nyipunie, nge ketre kepine lai ka troa aciane la ihnimi nyipunieti koi Nyidrë nge tro fe nyipunieti a easenyi catre koi Nyidrë.”
3 Tune kaa la aqane tro sa xome la itus Ini Tusi Hmitrötr matre troa xatuane la itre hnainin troa easenyi Iehova catr? Thupene la hna goeëne la ketre paragaraf ka amamane hnyawa la caa thiina i Akötresie, easë a hnyinge ju kowe la hnainin ka hape, “Nemene la pengö i Iehova hna qaja koi nyipunie ngöne la paragarafe celë?” maine “Tune kaa la aqane mama laka Akötresieti a hnimi nyipunie?” Maine tro sa lapaa nango xome la itre hnyinge celë ngöne la ijine etid, easë hi lai a inine la itre hnainin troa sine thel me mekune la itre hnei angatr hna inin, nge kola aciane thei angatr la hni ne ole kowe la itre thiina ka sisitria i Iehova.
4 Xome Jë La Itre Mekun Nyine Amekunëne Hmaca: Ngöne la pune la nöjei meken, sipone jë kowe la hnainin troa ketre sipu qeje mekun ngöne la itre ini hna eköhagen hna hape, “Nemene La Hna Inin Hnei Tusi Hmitrötr.” Amamane jë la itre xötr ne la Tusi Hmitrötr hna hamën. Maine kola troa xatuane la hnainin troa hane fe la itre mekune ka eje e kuhu hni angeic, qaja jë e itre xaa ijin, ka hape, “Tune kaa la mekuna i epun ngöne la aqane qejepengöne Tusi Hmitrötr la ini celë?” Maine tro sa kuca tune lai, haawe, thaa easë hmekuje kö a qaja atrune la itre ini ka tru ngöne ketre mekene la itus, ngo easë fe a atrehmekune hnyawa la hna lapaune kow hnene la hnainin. Jëne tro fe lai a xatuane la hnainin troa akökötrene la aqane imelekeu i angeic me Iehova.