Drei La Madrine Ka Tru e Tro Sa Isa Huliwa Catre Koi Iehova!
1 Atraqatre la madrine i Paulo aposetolo troa “umuth” maine eatrëne hnyawa la huliwa ne cainöj ne la Keresiano. (2 Kor. 12:15) Ketre tune mina fe enehila, nyimutre la itre Keresiano ka catre huliwa me hane pionie. Ame itre xan, tre, tru la itre hnëqa i angatr e hnine la fami, ngo angatr a thele troa hane cainöje pala hi ngöne la nöjei wiik. Ame itre xan, tre, tru la itre sine mec, ngo ame pe, angatr a kuca la hnei angatr hna atreine matre troa sajuëne la itre aja ne la Baselaia. Drei la ithuecatr hne së hna kapa ngöne la easa öhne la nöje i Iehova, laka, ngacama ka qatre ju hë maine hetre itre jole ju hë ngöne la mel, ngo ame pe, angatr a nue apexejenyi angatre kö kowe la huliwa i Iehova!
2 Ihnimi Kowe La Itre Atr Ka Tu Së Hi: Maine tro sa kuca asë la hne së hna atrein troa nyihlue i Iehova, me amamane la ihnimi së koi Nyidrë me kowe la itre atr ka lapa easenyi së, haawe, tro ha lapa hnyawa me wië la mekuthethewe së. Hnene laka hnei Paulo hna nue la mele i nyidrë kowe la maca ka loi, haawe, ijiji nyidrëti hi troa qaja cememine la madrine ka hape: “Ini a anyipicine koi nyipunie ngöne la drai celë, laka, gufa koi ni ene la madra ne la nöjei ate asë.” (Ite hu. 20:24, 26; 1 Thes. 2:8) Maine tro sa xome la huliwa ne cainöj thenge la hne së hna atrein, haawe, kolo hi lai a hmekë së wanga troa zö së la meci ne elanyi la itre atr.—Ezek. 3:18-21.
3 Maine tro sa catre huliwa matre xatuane la itre xaa atr, haawe, tro hë së a manathith. (Ite hu. 20:35) Hnene la ketre trejine hna qaja ka hape: “Heji lapa ha, eni ha bëeke hmaca kowe la hnalapang thupene la caa drai ne huliwa i Iehova; nyipici laka kucakuca pi hë ni, ngo ame pe, atraqatre la madrineng. Ngo eni a olene koi Iehova la hnei Nyidrëti hna hamëne koi ni la ketre madrin hna thatreine troa thapa hnene la ketre me ketre.”
4 Ihnimi Koi Akötresie: Ame la kepine ka tru matre easë a nue së kö kowe la huliwa i Iehova, tre, hnene laka, easa kuca la nyine amadrinëne la Tretretro së e koho hnengödrai. Kola uku së hnene la ihnimi së koi Akötresie troa trongëne la itre trenge wathebo i Nyidrë, tune la troa cainöj me inine la itre atr. (1 Ioane 5:3) Ngacama thaa semesine së ju hë maine icilekeu pena me easë hnene la itre atr, ngo ame pe, easa madrine me catre troa huliwa koi Iehova.
5 Ame la easa goeën la hneijin hne së hna melën enehila, tre, thaa ijine tro kö la a hunyinyi. Easë la a mele ngöne la hneijin ne menue. (Mat. 9:37) Ame la ka eëny, tre, nyimutre catre la itre hawa ne huliwa angeic ngöne la drai, pine laka, troa canga jele la hlapa me xeene la itre koko wanga troa luuzi itre ej. Hna sa tulune pe hi la ijine troa menue ngöne la götrane la ua. Mekune hnyawa kö së la hneijin hne së hna melën enehila, nge epi tro asë hi së a catre nue së kö troa hane xome la huliwa ne cainöj.—Luka 13:24; 1 Kor. 7:29-31.