Catre Pi Troa “Wa Atrun”
1 Hnei Iesu hna xome la itre ewekë nyine troa nyihatren me aceitunë nyidrë memine la nyipi vine; ame Tretretro i nyidrë, tre, Atre Eëny, nge ame itretre dreng hna iën, tre, itre wapicine lai vine. Ame la Iesu a qeje pengöne la huliwa ne lai Atre Eëny, tre, nyidrëti hi lai a amamane hnyawa la enyipiewekëne la troa fedre catre kowe la vine. (Ioane 15:1-4) Ame la ini nyine tro sa xom, tre, loi e tro asë hi së a isa thele troa imelekeu hnyawa me Iehova, tune la ketre ipicine ka wa hnyawa; ketre ipicin ne la “nyipi vine,” ene Iesu Keriso. Loi e tro sa catre wa wene hnyawa la lue ewekë, ene la “wene la ua” memine la itre wene ne la Baselaia.—Gal. 5:22, 23; Mat. 24:14; 28:19, 20.
2 Itre Wene Ne La Ua: Troa mama laka easa kökötre hnyawa ngöne la götrane la ua, hnene la aqane eëne së la itre wene ne la ua. Nyipunieti kö a thele troa eëne la itre wene ne la ua i Akötresie, hnene la hna inine pala hi me sine thele la Wesi Ula i Nyidrë? (Fil. 1:9-11) Thaa tro pi kö sa luelue troa thithi matre troa sipone la uati hmitrötr, ke eje hi la ka troa aciane the së la itre thiina ka atrunyi Iehova me xatua së troa kökötr ngöne la götrane la ua.—Luka 11:13; Ioane 13:35.
3 Maine tro sa eëne la wene ne la ua, haawe, tro ha xatua së troa catre ngöne la huliwa ne cainöje së. Drei la ketre ceitun, kola upi së hnene la ihnim memine la lapaun troa ami ijine troa cainöje lapaa, ke tru pala ha la jole së. Ame la tingeting me xomihni ahoeany, me thiina ka loi, me hni ka menyik, me xomihni, tre, itre thiina lai ka sewe së troa sa angazone kowe la itre ka icilekeu me easë. Kola aijijë së hnene la madrine troa catre cainöj cememine la hni ka tingeting ngacama thaa semesine së kö hnene la itre atr.
4 Wene Ne La Baselaia: Easë fe a ajan troa eëne la itre wene ne la Baselaia, hnene la hna hamëne la “huje ne atrunyi Akötesie jëne nyidë, celë hi wene la ite ukeineqë shë kola olene kowe la atesiwa i [Iehova].” (Heb. 13:15) Kola mama lai hnene la aqane catre cainöj me xome lapaane së la huliwa ne tro fë maca ka loi. Easë kö a hane catre thele troa eëne la itre wene ne la Baselaia, hnene la hne së hna isa akökötrene la huliwa ne cainöje së?
5 Hna amamane hnei Iesu ka hape, troa isa pengöne la etrune la itre wene ne la Baselaia hna troa eën hnene la itretre drei nyidrë. (Mat. 13:23) Qa ngöne lai, thaa loi kö tro sa thele troa aceitunë së memine la itre xan, ngo loi pe tro sa hamëne koi Iehova la hne së hna atrein ka sisitria. (Gal. 6:4) Maine tro sa pane wange hnyawa la isa aqane mele së jëne la Wesi Ula i Akötresie, tro ha xatua së troa catre atrunyi Iehova hnene la hne së hna “wa atrun.”—Ioane 15:8.