Kola Ithuecatrekeu

1. Nemene la itre ewekë ka tru hna kuca hnene la itre qatre thupe ka wange trongëne la itre ekalesia?

¹ Hna cinyihane hnei Paulo kowe la ekalesia e Roma, ka hape: “Atraqate la pi tro ni a iöhnyi me nyipunie, mate tro ni hamë nyipunie kete ihnimi ne u, mate acile huti nyipunie ; celë hi mate troa, ce akeukawanyi ni me nyipunie, hnene la ce lapaune shë.” (Rom. 1:11, 12) Ceitune mina fe ngöne la hneijine së, laka, kola iwai hmaca hnene la itre qatre thup ka wange trongën la itre ekalesia göne matre troa ithuecatrekeu.

2. Pine nemen matre kola canga thuemacane kowe la ekalesia la ijine troa traqa hnene la qatre thupe ka iwai trootro?

² Ekalesia: Hna majemine troa canga thuemacane la qatre thup ka iwai trootro, köni treu qëmekene tro nyidrëti a traqa kowe la ekalesia. Kolo lai a nue ijine koi së troa canga hnëkë matre tro sa hane kepe thangane hnyawa la iwai cili. (Efe. 5:15, 16) Maine itre ka huliwa i maseta së, maine jë tro sa canga sipo drai ne mano matre troa hane sajuëne la huliwa ne cainöje trootro ngöne la wiik. Ame itre xan, tre, hnei angatr hna mekune troa hane pionie ka ixatua ngöne lai treu hmekune kola iwai. Maine easa troa pane tro gaa nany nge kola mama laka, kolo hi lo hmekune lo wiik ne iwai ne la qatre thup, haawe, hapeu matre thaa pane mekune kö me wange hnyawa matre troa hane sine lai wiike ka ketrepengön?

3. Nemene la nyine tro sa isa kuca ngöne la ijine kola iwai hnene la qatre thupe ka iwai trootro?

³ Ame la pane kepine matre kola vizit hnene la qatre thup ka iwai trootro, tre, göi troa hamë ithuecatr me hamë ini ngöne la aqane troa cainöj ngöne la itre hnalapa trootro. Sipo nyidrëti jë matre troa hane ce cainöje me nyidrë maine föi nyidrëti pena, maine ka faipoipo? Kola madrine hnene la qatre thupe ka iwai troa ce cainöj memine la nyimu trejin; tune la itre ka thaa maca hnyawa petre kö troa cainöj, maine itre ka ajane pena troa kökötre ngöne la huliwa ne cainöje trootro. Ijiji së asë hi troa kepe thangane la aqane tro fë nyidrëti la maca ka loi me trongëne la itre mekune nyine ixatua hnei nyidrëti hna hamëne cememine la hni ka menyik. (1 Kor. 4:16, 17) Ame hi la easa könë nyidrëti troa hane ce xeni me easë, tre, easë hi lai a fe jëne la itre xaa ithuecatre hnei nyidrëti hna troa hane hamëne koi së. (Heb. 13:2) Pine laka, ame la itre cainöje i nyidrë, tre, ka ihmeku memine la itre aja ne la ekalesia, haawe, loi e tro sa drenge hnyawa.

4. Tune kaa la aqane tro sa ithuecatre kowe la atre thupëne la sirkoskripsio së?

⁴ Atre Thupëne La Sirkoskripsio: Ceitui Paulo aposetolo hi memine la itre trejine ngöne la itre ekalesia. Hnei nyidrëti hna hane cile fe kowe la itre jol me hnehengazone la itre ewekë, nge hnei nyidrëti fe hna ajane troa kapa la itre ithuecatr qaathene la itre xan. (2 Kor. 11:26-28) Ame la kola atre hnene la ekalesia ne Roma ka hape, kola troa akalabusi Paulo nge nyidrëti a troa traqa, ene pe angatr a tro pi a tro Apio Foro matre troa ixelë me nyidrë; 74 lao kilomet hna trongën! “Nge öhnyi angatë hë hnei Paulo, nyidëti a ole koi Akötesie, me cate la hni.” (Ite hu. 28:15) Ijije mina fe tro sa hane ithuecatre tune lai kowe la atre thupëne la sirkoskripsio së. Amamai nyidrëti ju laka “sisitria” nyidrë, hnene la aqane madrine së troa sajuëne la iwai nyidrë. (1 Tim. 5:17) Qaja jë me amamane la hni ne ole së kowe la trenge catre hnei nyidrëti hna kuca thatraqai së. Tro hë nyidrëti a madrine memine la föi nyidrë, ngöne la nyidroti a öhne la lapaune së, me ihnimi së, memine la aqane xomihniahoeanyi së.—2 Thes. 1:3, 4.

5. Pine nemen matre easë asë hi a aja ixatua enehila?

⁵ Drei pe kö la atr ka thaa aja ixatua enehila ngöne la itre “ijine aköte ngöne la ite drai hnapin” hne së hna melën? (2 Tim. 3:1) Mekune hnyawa jë enehila troa hane sine la wiike ka ketrepengön ne iwai ne la atre thupëne la sirkoskripsio. Loi e tro asë hi së itre qatre thupe ka iwai trootro memine la itre trejine asë, a ce thawa la madrine cili, ene la troa ithuecatrekeu. Maine tro fe sa hane ujë tune lai, haawe, tro fe hë së a ‘eamo, me akeukawane ipitön.’—1 Thes. 5:11.