Huliwa Ka Ketre Pengön Göi Tro Fë Tarak, e Drai 20 Okotropa–16 Nofeba!
1 Qaane e Thupene Hmi 20 Okotropa, uti hë la foa lao wiik, tre, tro sa kuca la ketre huliwa ka ketre pengön, ene la troa tro fë la ketre tarak ka hnyipixe hna hape, Ajane Kö Nyipunieti Troa Atre La Nyipici? Kola mejiune laka, tro la huliwa celë ka ketre pengöne hna kuca e cailo fen asë, a ahlëne la aja ne la atr kowe la sipu qeqene la nyipici.—Ioane 17:17.
2 Kola hamëne hnene la tarak celë la itre mekun qa hnine la Tusi Hmitrötr ka thaa qea menu kö, nge ka sa la sikisi lao hnyinge ka sisitria: “Hapeu Akötresieti kö a hane kukehni së?” “Hapeu, tro kö elanyi a paatre palua la isi memine la akötr?” “Nemene la pengö së ngöne la easa mec?” “Hetre mejiune kö kowe la itre ka mec?” “Tune kaa la aqane tro ni a thith matre troa hane drei ni hnei Akötresie?” nge “Tune kaa la aqane tro ni a hetrenyi la nyipi manathith?” Thaa hna hane fe kö sa la itre hnyinge celë hnene la itre hmi ne la itre nöj ka uune ka hape, itre Keresiano angatr. Ame mina fe lo itre ka thaa uune kö ka hape, itre Keresiano angatr, tre, hnei angatre hna hane thele fe la itre mekun ka sa la itre hnyinge cili, ngo maine jë thatre kö angatre laka, kola sa hnyawa la itre mekune cili hnene la Tusi Hmitrötr. Haawe, loi e tro la maca celë a ketr la nöjei atr e cailo fen asë.
3 Kuca Asë Jë La Teritoare Së: Catre jë troa kuca asë, e ijij, la itre hnalapa ngöne la teritoare së. Maine hetrenyi nyipunieti la ketre teritoare ka tru, haawe, ijije tro la itre qatre thup a ithuecatre koi epuni troa amë la tarak ngöne la itre hnalapa ka pë atren, ngöne lo xötrei. Thaa tro kö a thëthëhmin troa hamëne la tarak cili ka hnyipixe kowe la itre atr ka lapa ezi së, me itre sinee së, me itre sine ce huliwa së maine sine ini së, me itre xaa hne së hna majemine porotrik memin. Maine jë ijije tro nyipunieti a hnëkë matre troa xome la huliwa ne pionie e Okotropa maine Nofeba pena. Hapeu, hetre nekö i epuni kö maine ketre hnainin ka kökötre hnyawa ngöne la götrane la ua, nge ka ijije troa ketre atre cainöj ka thaa bapataiso petre kö ka macaj, matre ce tro me easë ngöne la huliwa celë? Maine eje hi, thuemacanyine jë la itre qatre thup.
4 Nemene La Nyine Troa Qaja: Nyipi ewekë troa ahopatrene la aqane nyiqaane ithanata së, matre troa ketr la itre atr hnene la maca. Amexeje jë hi kowe la itre atrene la hnalapa la ketre hnyinge ngöne la icetron, nge thupene lai amamane mekötine jë koi angatre la mekune ka sa ngöne la tarak. Tro hë lai a aijijëne la itretre cainöj asë troa thele matre ihmeku la aqane nyiqaane ithanata i angatr memine la itre aja ne la teritoar. Maine kola mama la hni ne aja ne la ketre atr, loi e troa cinyianyine lai, nge canga bëeke jë troa iwai hmaca. Ame e nöjei mecixeni me sabath, tre, maine jë ijije mina fe troa tro fë la tarak cememine la itre zonal hna nyipi kapa. Ame la kola ase la huliwa e 16 Nofeba, easë pena a tro fë la itus Ini Tusi Hmitrötr. Maine hetrenyi pala kö la itre tarak, ijije tro sa huliwane itre ej tune lo itre xaa tarak së.
5 Nyiqaane Jë Troa Inine La Tusi Hmitrötr Me Ketre Atr: Ame la tarak celë, tre, hna kuca matre troa xatua së troa nyiqaane inine la Tusi Hmitrötr me itre xan. Ame ngöne la kola bëeke troa wange la ketre atr ka hetre hni ne aja, tre, maine jë ijije tro sa hnyingë angeice la mekune qa hnine la Tusi Hmitrötr ka akeukawane la hni angeice hnene la nyipici ka eje e hnine la Tusi Hmitrötr? Amamane jë koi angeic la itröne ne la tarak ngöne la hna hnëkë amë koi etid, nge thupene lai hamë angeice jë la itus Ini Tusi Hmitrötr. Maine ijij, ce wange jë hi la caas maine lue paragaraf ne la mekene tus ka hamë xaa ithuemacanyi göne la tane porotrik hnei angeice hna iën.
6 Iehova a thele la itre atr ka troa nyihlue i Nyidrë “ngöne la [“ua,” MN] me nyipici.” (Ioane 4:23) Epi tro asë hi së a catre kuca la huliwa ka ketre pengön, matre troa xatuane la itre xan troa hane atre la nyipici!