Kola Sa La Itre Hnyinge i Nyipunie

◼ Hapeu, ijije kö tro la itre keme me thin a e la itre hawa hnei angatre hna amë kowe la ini tusi e hnin la hnepe lapa?

Ngacama pane hnëqa ne la itre kem troa hiane la itre nekö i angatr “ngöne la ini me ihaji [Iehova],” ngo ame la troa ini angatr, tre, hnëqa ne la keme me thin. (Efe. 6:4) Tusi Hmitrötr a ithuecatre kowe la itre nekönatr, ka hape: “Neköng, dengeju la hna ihaji hnei keme i hmunë, nge the tije kö la hna inine hnei thine i hmunë.” (Ite edomë 1:8) Ame la ketre götrane ka sisitria ne la ini hna hamëne hnene la itre keme me thin, tre, ene la ini Tusi Hmitrötr e hnine la hnepe lapa.

Ame ngöne la hneijine ekö, tre, tro hmekuje hi la keme maine thin ka xomiujine la ini tusi e hnine la hnepe lapa memine la ketre nekönatr ka thaa hane xome kö la bapataiso, a e la itre hawa, ngacama hna hane sine mina fe la porotrike hnene la ketre e nyidro. Ngo hna amekötine hmaca la götrane celë. Maine kola ce xomiujine hnene la keme me thine la ini tusi ne la nekönatr, haawe, ijije tro nyidroti asë a isa e la caa hawa ngöne la wiik, ceitu me hna cainöj. Nyipici laka hnene la itre keme me thin hna majemine sasaithe la caa hawa ne inine angatr la itre nekö i angatr ngöne la wiik. Nyipi ewekë tro pala hi la itre keme me thin a catre inine la itre nekö i angatr. (Deu. 6:6-9) Ngo loi e troa pane mama ngöne la rapor ne cainöje së ngöne la treu, la itre huliwa hne së hna kuca ngöne la hna cainöj. Haawe, tro hi a e la caa hawa ngöne la wiik; ngacama nyimu hawa me nyimu ijin hna xom troa ini tus ngöne la wiik, maine hna isa xomiujine la itre ini tusi ne la itre nekönatr. Tro hmekuje hi la keme maine thin a e la caa hawa ne la ini tusi e hnin la hnepe lapa memine la caa iwai hmaca, ngöne la kola xomiujine la ini tusi e nöjei wiik.