Ijije Tro Nyipunieti a Ketre Atre Hamë Ini!
1. Nemene la manathithi ka tru hna amë qëmekene la itre ka cainöjëne la Baselaia?
1 Ame la ketre götrane ka sisitria ne la huliwa ne cainöj, tre, ene la troa inine la nyipici kowe la ketre atr. Ame la troa öhne la ketre atr e kapa la maca ne la Baselaia, me xatua angeice fe troa easenyi catre memine la Atre Musi e celë fen me e koho hnengödrai, tre, ketre hna melëne ka sisitria catr. (Iako. 4:8) Ame la troa inine la ketre atr ka mecijin ngöne la götrane la ua, me öhne la kola saze la thiina, me aqane waiewekë i angeic, memine la aqane ujë i angeic, tre, celë hi itre ewekë nyine troa eatrëne hnene la itre ka cainöjëne la Baselaia.—Mat. 28:19, 20.
2. Pine nemene matre kola luelu la itre xan troa xomiujine la itre ini Tus, nge nemene la ka troa xatua angatr troa elë hun la jole cili?
2 Lapaune Ju Koi Iehova: Ame ngöne lo hneijine ekö, tre, hna luelue hnene la itre hlue ka nyipici pine laka, hnei angatr hna mekune ka hape thaa ijiji angatre kö troa kuca la hnëqa hna athipe koi angatr. Hnene la lapaune koi Iehova Akötresie hna aijijë Mose me Ieremia me Amosa me itre xaa atr ju kö, troa elë hune la xoue i angatr me itre luelu, matre troa kuca la huliwa hna ahnithe koi angatr. (Eso. 4:10-12; Iere. 1:6, 7; Amosa 7:14, 15) Hnei Paulo aposetolo mina fe hna “cate.” Tune kaa? Nyidrëti a qaja amamane lai ka hape, “[jëne] Akötesie.” (1 Thes. 2:2) Nyipici, ijiji së asë hi troa mejiune koi Iehova laka, tro Nyidrëti a hamë së la ixatua ka ijij me inamacan me trenge catr, göne matre troa xomiujine la itre ini Tus ka hetre thangan.—Is. 41:10; 1 Kor. 1:26, 27; 1 Pet. 4:11.
3, 4. Nemene la ini ka ijije tro sa kapa, matre troa xatua së troa atreine hamë ini qa hnine la Wesi Ula i Akötresie?
3 Kapa Ju La Ini: Iehova Akötresie, lo Atre Ini Ka Sisitria, a hamë së la ini jëne la ketre porogaram ne ini hna nyitrepene hnene la Tusi Hmitrötr, göne matre tro sa maca ngöne lo kola hamë ini. (Is. 54:13; 2 Tim. 3:16, 17) Easa kapa la ini cili ngöne la easa kuca la hne së hna atrein, matre troa kökötre ngöne la atrehmekun ne la Tusi Hmitrötr, memine la atreine së troa hamëne la itre nyipici qa hnine ej. Celë hi pane aliene la Ini Ne Cainöj Qaathei Akötresie memine la Icasikeu Ne La Huliwa; eje hi, ame la nöjei icasikeu ne la ekalesia, tre, itre ej a ini së troa atreine hamë ini qa hnine la Wesi Ula i Akötresie.
4 Loi e tro sa thele troa atre la itre jëne troa hamë ini ka hmaloi troa trotrohnin, matre atreine së troa qeje pengöne la itre nyipici ka jui qa hnine la Tusi Hmitrötr. Kola qaja hnene la itusi École du ministère götrane 227, ka hape: “Maine nyipunieti a ajane tro la itre xan a trotrohnine la taan cainöje i nyipunie, haawe, nyipi ewekë tro nyipunieti a pane trotrohnine hnyawa la taane cili.” Kola xatua së fe troa hneheene la itre mekun ka tru nyine tro sa xome elany, hnene la hne së hna qeje mekun ngöne la itre icasikeu. Haawe, maine tro sa hnëkë hnyawa, eje hi laka, tro hë sa maca troa hamë ini.
5. Nemene la ketre ini hne së hna kapa e hnin la ekalesia, ka troa xatua së troa kökötre ngöne la aqane tro sa hamë ini?
5 Ame ngöne lo qaan, hnene la itre Keresiano ka cainöj hna kapa la ini qaathene la ketre trejine ka ce cainöje me angatr. (Luka 10:1) Maine ijij, loi e tro sa ce cainöje memine la itre trejine ka maca, tune lo itre pionie me qatre thup, memine lo itre qatre thupe ka iwai trootro ngöne la nöje së, ngöne la huliwa ne ini Tusi Hmitrötr. Loi e tro sa goeëne hnyawa la aqane xome angatr la itre ceitune ka hmaloi troa trotrohnin memine la itre xaa jëne ini hna xome qa hnine la itre itusi së, göne matre troa qeje pengöne la itre nyipici qa hnine la Tusi Hmitrötr. Hnyingë angatre jë la itre mekune nyine ixatua ngöne la aqane troa maca troa hamë ini. (Ite edomë 1:5; 27:17) Loi e tro pala hi sa amamane la hni ne ole së kowe la itre aqane ini celë, ene la itre ini hna hamëne hnei Akötresie.—2 Kor. 3:5.
6. Nemene la ka nyipi ewekë matre troa atreine hamë ini qa hnine la Wesi Ula i Akötresie?
6 Lapaune jë së koi Iehova, me kepe thangane qa ngöne la itre ini hnei Nyidrëti hna hamën. Catre pi së thithi fë la aja së troa kökötr. (Sal. 25:4, 5) Ijije mina fe tro sa melëne la ketre manathithi ka tru, ene la troa xatuane la ketre atr troa atreine hamë ini qa hnine la Wesi Ula i Akötresie!