“Thupë Nyipunieti Ju Kö Ngöne La Ihnimi Akötesie”
1. Pine nemene matre kuca jë la itus “Thupë Nyipunieti Ju Kö Ngöne La Ihnimi Akötesie”?
1 Drei la elolone troa canga inine la itus ka hnyipixe hna hape, “Thupë Nyipunieti Ju Kö Ngöne La Ihnimi Akötesie” ngöne la Ini Tusi Hmitrötr ne la Ekalesia, qaane e 23 Febuare me wiike cili! Kola nyipune la tusi ne Lapa Ne Xomi Meköt kowe la nöjei atr ka hnimi Iehova, ka hape: “Eje the huni la mejiune ka catr laka, tro la itusi celë a xatua nyipunie troa catre trongëne pala hi la nyipici ngöne la mele i nyipunie, nge eje hi lai laka, tro hë nyipunie a lapa qale catre ‘ngöne la ihnimi Akötesie . . . uti hë la mele ka tha ase palua kö.’—Iuda 21.”
2. Tro la itusi celë ka hnyipixe a xatua së ngöne nemene götrane la mele së?
2 Nemene La Nyine Troa Hmekën: Tune kaa la aqane tro sa trongëne la itre trepene meköti ne la Tusi Hmitrötr, ngöne la aqane ce mele së memine la itre atr me ngöne la itre nyine iamadrinë, me ngöne la troa metrötrëne la mus me ngöne la itre hne së hna majemine kuca, me ngöne la faipoipo, me ngöne la aqane troa ithanata, me ngöne mina fe la itre hna majemine kuca? Tro ha ujëne la itre mekuthethewe së thenge la itre hna amekötine ka draië qa hnine la Wesi Ula i Akötresie. (Sal. 19:7, 8) Pine laka kola kökötre la atrehmekune së ngöne la aqane waiewekë i Iehova, ene pe tro la aja së troa amadrinë Nyidrë a uku së troa idrengethenge ngöne la nöjei götrane la mele së.—Ite edomë 27:11; 1 Ioane 5:3.
3. Pine nemene matre loi e tro sa catre troa qeje mekun ngöne la ini nyine ce wange e nöjei wiik?
3 Catre Pi Troa Qeje Mekun: Ame ngöne la nyipunieti a hnëkë, thele jë troa eatrëne la aja i nyipunie, ene la troa atrunyi Akötresie nyipine la ekalesia i Nyidrë. (Heb. 13:15) Tro la ekalesia asë a ce inine me ce ithanatane lai itus ka hnyipixe. Pine laka thaa tru menu kö la itre götrane ne la itus nyine tro sa inin, ijije tro asë hi së a hnëkë hnyawa me catre ce thawakeune la itre mekun. Maine tro sa hnëkëne hnyawa la itre mekune ka xoxopatr, haawe, tro lai a aciane thene la itre xan la ihnimi memine la itre huliwa ka loi nge tro fe a hetre ini hna kapa qa ngöne la hna ce ithanatane lai itus. (Heb. 10:24) Ketre, tro ha atraqatr la madrine së isa ala caas hnene la hne së hna amamane la lapaune së, jëne la itre mekune së.
4. Pine nemene matre nyipi ewekë tro sa trongëne la itre hna amekötine hnei Iehova?
4 Ame ngöne lo jidri tixenuë i Iesu e celë fen ceitu me ketre atr, hnei nyidrëti hna amamane laka ka ce tro la troa trongëne la itre hna amekötine hnei Iehova memine la troa lapa qale ngöne la ihnim i Akötresie. (Ioane 15:10) Tro la itusi “Ihnimi Akötesie” a xatua së troa catre trongëne pala hi la itre trepene meköti ne la Tusi Hmitrötr ngöne la nöjei götrane la mele së, me ‘thupë së ngöne la ihnimi Akötresie.’—Iuda 21.