Ketre Huliwa Nyine Ithuemacany Göi Drai Ne Amekunën!
1. Nemene la ewekë hna troa kuca ngöne la fen asë hnene la itretre cainöjëne la Baselaia, qaan e drai 21 Maac 2009, nge pine nemen?
1 Ame e Drai Ka Co 9 Eiperem 2009, tre, kola troa icasikeu ngöne la fen asë hnene la itre hlue i Iehova Akötresie, matre troa mekune hmaca lo etrune la aqane hnime la nöjei atr asë hnei Nyidrë. (Rom. 5:6-8) Easë ha nyiqaane mekun la itre atr ka hetre hni ne ajan, laka itre milio la etrun, ka troa hane ce atrune me easë la mec i Iesu. Celë hi kepin matre, qaan e drai 21 Maac, kola troa thawa ngöne la fen asë la ketre pepa ne ihë kowe la Drai Ne Amekunën.
2. Nemene la itre mekun nyine lapa fë hnyawa ngöne la kola ihë?
2 Itre Mekun Nyine Lapa Fë Hnyawa: Huliwane hnyawa jë la itre iatr me itre hnying, memine fe la itre xötr ngöne lai pepa ne ihë. Drei la ketre ceitun, maine nyipunieti a amamane la iatr ngöne la pane götran, tre, qaja jë ka hape: “Eni a ajane troa könë nyipunie matre troa ce atrune me eahuni la mec i Iesu e Drai Ka Co 9 Eiperem 2009.” Thupene lai, amamane jë la taan ne la pepa ne ihë memine fe la itre hnying. Loi e tro fe sa qaja kowe la hene la hnalapa, ka hape, ijije mina fe tro nyidrëti a könëne la hnepe lapa i nyidrë memine la itre xaa atr hnei nyidrëti hna ajan.
3. Maine hna canga hamëne la itre pepa, tune kaa la aqane tro nyipunieti a wange hmaca la itre atr?
3 Maine atraqatre pala ha la teritoare ne la ekalesia i nyipunie, haawe, ijije hi tro la itre qatre thup a upi nyipunie troa amë la itre pepa ne ikönë ngöne la itre hnalapa ka pë atren. Ame ngöne la itre mecixeni me sabath, troa tro fë la itre zonal cememine la pepa ne ikönë. Catre jë nyipunie troa könëne la itre atr hnei nyipunie hna wange hmaca me itre hnainin, me itre sinee me itre sine ce ini me sine ce huliwa, memine la itre atr ka lapa easenyi nyipunie, memine fe la itre xaa atr hnei nyipunie hna atre. Ame ngöne lo macatre hnapan, hnene la ketre trejine föe hna könën la 30 lao sinee i eahlo, nge thupene lai hnei eahlo hna isa amekunë angatre la enyipiewekëne la ijine cili. Drei la madrine i eahlo troa öhne la ala 25 a hane sine la drai cili nge 4 la etrun la itre ka kapa e thupen troa inine la Tusi Hmitrötr!
4. Nemene la itre ewekë hnei nyipunie enehila hna thele troa eatrën, nge pine nemen?
4 Canga Hnëkë Jë Enehila: Ijije hi tro la itre ka cainöj a akökötrene la huliwa i angatr ngöne la itre treu Maac me Eiperem. Maine hetre nekö i nyipunie maine itre hnainin pena ka kökötre hnyawa, haawe, ketre ijine ka sisitria hi la koi angatr troa itretre cainöj hna thaa bapataisone petre kö. Enehila hi la ijine troa canga hnëkë matre troa eatrëne hnyawa la huliwa celë, ene la troa ithuemacanyine la drai ne amekunëne la lue hatrene ihnimi ka sisitria.—Ioane 3:16; 15:13.