Easa Amamane La Ihnimi Së Koi Akötresie Hnene La Huliwa Ne Cainöje Së
1. Nemene la hna upi Iesu troa kuca hnene la ihnimi nyidrëti koi Akötresie?
1 Hnene la ihnim hna uku Iesu troa catre kuca la huliwa ne cainöj. Kola mama hnyawa la ihnimi nyidrë koi Iehova ngöne la nöjei götran la huliwa ne cainöje i nyidrë. Öni Iesu, ka hape: “Mate ate hnene la fene hnengödrai laka ini a hnine la Tetetro, me kuca thenge la hnei Tetetroti hna ahnithe koi ni.” (Ioane 14:31) Pine laka easë la itre ka xötrethenge la itre thupaca i Iesu, haawe, eje mina fe the së la madrine ka tru troa amamane la ejuine la ihnimi së koi Akötresie hnene la huliwa ne cainöje së.—Mat. 22:37; Efe. 5:1, 2.
2. Kola mama tune kaa la ihnimi së koi Iehova ngöne la aqane kuca së la huliwa ne cainöj?
2 “Jiniati e Hmitöte La Atesiwa i Enëtilai”: Ame la easa xome la nöjei ijin matre troa qeje Iehova memine la Baselaia i Nyidrë kowe la itre xan, tre, easë hi lai a amamane la ihnimi së koi Akötresie, nge easë mina fe lai a hane thele troa ahmitrötrëne la atresiwa i Nyidrë. (Sal. 83:18; Ezek. 36:23; Mat. 6:9) Ceitune la huliwa ne cainöje së memine la huliwa i Iesu ekö, laka, ketre jëne tro hi së lai a amamane la nyipi aja ka eje the së troa ahmitrötrëne la atresiwa i Iehova me eatrëne la aja i Nyidrë.—Mat. 26:39.
3. Troa xatua së tune kaa hnene la ihnimi së koi Iehova troa cile kowe la itre itupath?
3 Kola Uku Së Hnene La Ihnim Troa Cile Kowe La Itre Jol: Hnene la ihnimi së koi Iehova, matre easa atreine elë hune la nöjei jol asë. (1 Kor. 13:4, 7) Hnei Iesu hna cile kowe la itre jol ka sewe nyidrë troa eatrëne la huliwa ne cainöj. Ngo hnene la ejuine la ihnimi nyidrë memine la ajane troa kuca la aja i Iehova, hna aijijë nyidrë troa cile kowe la itre jole cili. (Mar. 3:21; 1 Pet. 2:18-23) Ketre, nyimutre mina fe la itre itupath hne së hna qëmeke kow, ngo tro ha xatua së hnene la ihnimi së koi Akötresie troa cile kowe itre ej. Maine tro sa trongëne hnyawa la tulu hna hamëne hnei Iesu, haawe, thaa tro hë sa luelue troa catre kuca la huliwa ne cainöj. Ngacama troa akötrë së hnene la icilekeu ne la hnepe lapa së, maine hnene la ketre mec, maine hnene laka easa qatre trootro, maine pena thaa kolo kö a semesine së hnene la itre atr, ngo loi e thaa tro pi kö la itre ewekë cili a sewe së troa amamane la ihnimi së koi Iehova, ene la troa xome hnyawa la huliwa ne cainöj.
4. Nemene la hnëqa ka lolo hna aijijë së troa kuca hnene la ihnimi së koi Iehova?
4 Hetre emenene la ihnim, laka, hna hamë së la ketre manathithi ka tru, ene la atreine troa amamane la ihnimi së ka pexej koi Akötresie, jëne la huliwa ne cainöje së. (1 Kor. 13:13) Pine laka calemi catre hë la ijine troa ahmitrötrëne hnyawa la atresiwa i Iehova, epi tro ‘pala hi a cia hlöeë la ihnimi së.’—Fil. 1:9; Mat. 22:36-38.