Tro Epuni a Sa Tune Kaa?
1. Pine nemen matre loi e tro sa xötrethenge la tulu i Iesu ngöne la easa sa la ketre hnying?
1 Uti hë la drai celë, kolo pala hi a hain la aqane sa Iesu la itre hnyinge ne la itre atr. Ame la kola hnyinge koi së ngöne la hna cainöj, tre, loi e tro sa xötrethenge hnyawa la tulu i Iesu ngöne la götrane cili.—1 Pet. 2:21.
2. Nemene la ka troa xatua së troa maca ngöne la easa sa la ketre hnying?
2 Loi e Troa Pane Dreng: Hnei Iesu hna pane thele la kepin matre kola hnyinge hnene la ketre atr. Ame itre xaa ijin, nyipi ewekë tro sa hnying matre troa atre hnyawa la mekuna ne la ketre atr. Maine kola hnyinge hnene la ketre atr, ka hape, “Hapeu, epuni kö a mejiune koi Iesu?” tre, maine jë angeic a pi atre la kepin matre thaa epuni kö a atrune la Noel. Maine tro epuni a atrehmekune la sipu aja ne lai atr ka hnying, tro hë epuni a atreine eköthe hnyawa la aqane tro epuni a ithanata me angeic.—Luka 10:25-37.
3. Nemene la ka troa xatua së troa xome la itre mekune qa hnine la Tusi Hmitrötr nyine sa hnyawa la itre hnying?
3 Xome Jë La Tusi Hmitrötr Matre Troa Sa La Hnying: Loi e tro pala hi sa xome la Tusi Hmitrötr, matre troa sa la hnying. (2 Tim. 3:16, 17; Heb. 4:12) Ijije hi troa xatua së troa sa hnyawa la ketre hnying, hnene la itus Comment raisonner memine la “Itre Taan Mekun Nyine Ce Ithanatan” ka eje e hnine la itus Les Saintes Écritures — Traduction du monde nouveau. Ngacama thaa kapa kö hnene la ketre atr la musi ne la Tusi Hmitrötr, ngo ijije tro sa ce thawa me angeic la ini hna hamën hnene ej, cememine la thiina ka menyik. Loi e tro mina fe sa xatua angeice troa wanga atrune hnyawa la inamacane ka lolo qa hnine la Tusi Hmitrötr. Maine tro sa nyitipu Iesu hnyawa, tro hë la itre mekune hne së hna xome matre troa sa la itre hnying, a ceitu me “ite [wene pome MN] gole hnine la ite tenge sileva,” kola hape, ka lolo me ka sisitria.—Ite edomë 25:11.
4. Eue la ijine thaa tro kö sa thele troa sa la itre hnying?
4 Tro Kö Së a Sa La Itre Hnying Asë? Maine thatreine kö së troa sa la ketre hnying, thaa tro pi kö sa hmahma troa qaja, ka hape: “Thatre kö ni, ngo ijije tro ni a thele la itre mekun ka troa sa la hnyinge i epun, me bëeke hmaca matre troa ce thawa me epun la itre mekune cili.” Tro hë la atr a kepe së hmaca, e hetrenyi the së la qahmihmi me hane wanga atrunyi angatr. Maine öhne hi së, laka, kola hnying hnene la itre ka icilekeu me easë me thele iwesitrë, tre, loi e tro sa nyitipu Iesu hnene la hna ami ifegone la aqane sa së la hnying. (Luka 20:1-8) Ketre tune mina fe, maine pëkö hni ne aja ne la atr kowe la nyipici nge angeic a pi hune fë mekun, loi e tro sa nyipune la porotrike cememine la metrötr, me xome hnyawa la traeme së matre troa thele lo itre atr ka hetre hni ne ajan.—Mat. 7:6.
5. Nemene la tulu hna amë hnei Iesu göne la aqane troa sa la itre hnying?
5 Atrehmekune hi Iesu, laka, nyipi ewekë tro nyidrëti a mejiune koi Iehova, matre troa eatrëne la hnëqa hna hamë nyidrë, ene la troa “anyipicine la nyipici,” me sa hnyawa la itre hnyinge ne la itre atr ka hetre hni ne ajan. (Ioane 18:37) Hnei Iesu pala hi hna sa la itre hnyinge ne la itre atr “hna hnëkëne kowe la mele ka tha ase palua kö;” drei la ketre manathithi ka tru e tro sa xötrethenge la tulu i nyidrë!—Ite Hu. 13:48.