‘Hamëne Pi La Mele i Nyipunie’ Matre Xatuane La Itre Ka Ini Tusi Hmitrötr Me Nyipunie
1. Nemene la nyine tro sa catre kuca matre troa xatuane la atr ka ini Tusi Hmitrötr?
1 Maine easa ajane troa xatuane la ketre atre ini Tusi Hmitrötr, me tro xomi angeic uti hë la ijine tro angeic a sa xepu, tre, thaa ijije kö la troa nango inine koi angeice la hna qaja hnei Tusi Hmitrötr e nöjei wiik. Hnei Paulo aposetolo hna aceitunëne la aqane imelekeu i nyidrë memine la itre hnei nyidrëti hna inin, ceitu me ketre thin ka hnime catrëne la itre nekö i nyiidro. Hetre madrine së mina fe la easa nue “la mele [së]” matre troa xatuane la itre ka ini Tusi Hmitrötr me easë troa kökötr ngöne la götrane ua.—1 Thes. 2:7-9.
2. Pine nemene matre loi e tro sa hnim me wanga atrune la itre hnainin, nge tro sa amamane tune kaa?
2 Catre Jë Së Wanga Atrunyi Angatr: Ame la atre ini Tusi Hmitrötr a trongëne la hnei angeice hna inin, tre, kolo fe a hane upi angeic hnene la mekuthethewe i angeice troa ananyine la itre atr ka thaa hane kö trongëne la itre trepene meköti ne la Tusi Hmitrötr. (1 Pet. 4:4) Ketre, maine jë tro ha xele ma wai angeic hnene la fami angeic. (Mat. 10:34-36) Loi e tro hmaca ha keukawa la hni angeic e drenge hi angeic la aqane hnimi angeic me wanga atrunyi angeice hne së. Drei la eamo hna hamëne hnene la ketre mesinare ka macaj, ka hape: “Maine ase hë së ini Tusi Hmitrötr, tre, the tro kö sa canga tro trije la atr. Maine ijije hi, tre, loi e tro sa pane lapalapa, me nango porotrik me angeic.” Hmekëne ju së la itre ijine tro sa hamëne la ixatua ka ijije kowe la hnainin. Maine jë tro sa hë angeic ngöne telefon, maine wai angeice pena ngöne la ijine angeic a wezipo. Ijije kö tro sa lapa ezine la hnainin ngöne la hna icasikeu, me xatua angeic troa thupëne la ha nekö i angeic.
3. Tro sa xatuane tune kaa la hnainine matre tro angeic a kapa la ixatua qaathene la ekalesia?
3 Ixatua Qaathene La Ekalesia: Maine thaa nanyi kö la götrane hnei epuni hna cainöje ngön qa ngöne la hnalapa ne la hnainin, hapeu matre traqa fë la itre trejine ka ce cainöje me epun, matre troa hane atre angatre hnei angeic? Maine ijij, loi e troa hëne la itre xaa trejin, me itre qatre thup matre troa ce sine me easë la ini Tusi Hmitrötr. Ketre, maine ka cile huti la aqane ini Tusi Hmitrötre ne la atr, the hmitre kö troa hë angeice troa hane sin la itre icasikeu ngöne la Uma Ne Baselaia. Tro lai a ithuecatre koi angeice hnene la hna ce madrine me porotrike memine la itre atre ne la ekalesia; nge maine jë tro hë angeic a hane sine la lapa ne la itre trejine ngöne la ua.—Mareko 10:29, 30; Heb. 10:24, 25.
4. Nemene hë la thangane elany la hne së hna catre huliwa?
4 Ame la keme maine thin ka thaa mano kö hna inine la itre nekö i angeic ngöne la götrane ua, tre, tro ha elitrauje la madrine i angeice ngöne la ijine kola ketre iëne hnei nyudreni troa nyi hlue i Iehova me tro ngöne la nyipici. (3 Ioane 4) Tro fe sa hane madrine e troa nue la mele së matre troa xatuane la itre ka ce ini Tusi Hmitrötr me easë.