Epuni Kö a Uthe Trongëne La Ijine Troa Nyialiene La Pepa Göi Madra, Hna Hape, DPA?
Ame la itre ka troa nyialiene lo pepa hna hape, DPA (pepa Pas de sang,) tre, kolo hmekuje hi lo Itretre Anyipicine i Iehova hna bapataisone hë. Pine laka, “tha ’te kö nyipunie la ewekë ka troa traqa elany” haawe, nyipi ewekë catre tro epuni a canga axeciën, me cinyihane la itre drösinöe nyine troa xom me aqane inyië epun, e traqa ju koi epuni la ketre jole ka tru, ene la ketre mec. (Iako. 4:14; Ite Hu. 15:28, 29) Hna hnëkëne la video Soigner sans transfuser — Besoins et droits du patient. Loi e troa goeëne ej, nge thupene lai troa wange hmaca la hnei epuni hna inin me xatua epun jëne la itre hnyinge hna qaja e cahu fen.—Ithuemacany: Pine laka kola amaman hnene la video la itre xaa aqane xöj la itre atr, haawe qanyi itre keme me thine kö troa axeciën maine thaa tro pëhë la itre nekönatr a hane goeën la itre götrane cili.
(1) Pine nemen matre kolo hmaca ha wange hnene la itre xaa droketre la aqane waiewekë i angatr göi xomi madra? (2) Hamëne jë la köni ceitun ngöne la itre aqane ixöj ka jole catr, hna kuca nge pëkö madra hna hamën. (3) Ije droketre ka ixöj e cailo fen ka amaman la aja i angatr troa xöje la itre ka wezipo ngo thaa tro kö a hamë madra? Pine nemen matre angatr a ajan troa kuca tune lai? (4) Nemene la ka mama ngöne la itre pital göne la aqane huliwane la madra? (5) Nemene la itre ethan la xomi madra ngöne la kola inyiën la ka wezipo? (6) Nemene la hna qaja hnene la itre droketre ka nyimutre, ngöne la itre thangane ka loi hna kapa qa ngöne la troa isa iën la itre xaa aqane troa nyinyin la meci së hune la troa xomi madra? (7) Nemene la qaan la meci hna hape ka anémie? Nemene la ifego nyine troa melën hnene la itre atr hna tith hnene la meci cili, nge thaa tro kö a hetre ethane koi angatr? Nemene la nyine troa kuca matre thaa tro kö a sasaithi tulu? (8) Nemene la aqane troa kuca matre troa akökötren la etrune la itre globules rouges ngöne la ngönetrei ne la ketre atr ka wezipo? (9) Nemene la itre hna kuca ngöne la kola xöj la ketre atr, matre thaa tro kö a tru la madra ka neni menu? (10) Hapeue la kola nyinyine la meci ne la itre nekönatr maine itre atr pena hna nyinyape fë a tro pital, ka loi fe kö koi angatr lo lai mekun, ene laka troa isa ië hna ajan? (11) Nemene la ketre trepene meköti ka tru ka ketr la mele ne la atr, nge aqane inyië ka loi? (12) Pine nemen matre nyipi ewekë catr kowe la itre Keresiano troa canga mekune la aqane inyië hnei angatr hna troa xom? Tro sa kuca tune kaa lai?
Isa qanyi së kö thenge la mekuthethewe së hna inine hnei Tusi Hmitrötr, troa isa iën la itre aqane inyië hna amamane ngöne la video. Hane kö epuni axecië mekun göne la itre aqane troa inyië thatraqai epun me itre nekö i epun, nge ase kö epuni nyialiene lo lai pepa, hna hape, DPA? Maine epuni a aja itre xaa ithuemacanyi ngöne la itre mekune celë, pane wange hnyawa ju la mekene 7 ne la itus “Ihnimi Akötesie” memine la itre xaa mekune hna hamën nyine nyixan. Wange ju fe la sinetrongene la Huliwa Ne Baselaia ne Nofeba 2006, hna hape “Tro Sa Goeëne Tune Kaa La Itre Mutine La Madra Memine La Itre Hna Amekötine Hnei Pital Göi Sipu Madra Së?” Thupene lai, loi e troa xecie koi epun, laka, ase hë epuni cinyanyine hnyawa la itre aja i epun hune la pepa i epun, hna hape, DPA. Loi e troa thuemacane la itre droketre me itre ka inyië, me itre atrene la fami epun ka thaa Temoë kö, la itre hnei epuni hna axeciëne hë.
[Hna eköhagen götran 3]
• Hapeu, ase kö epuni axeciëne la itre drösinöe me itre aqane inyië hnei epuni memine la itre nekö i epuni hna troa xom?
• Maine traqa ju elany la ketre eatr ka tru koi epun, hapeu hetrenyi kö thei epuni la ketre pepa DPA hna nyialiene hnyawa?