Nyipi Ewekë Kowe La Itre Ka Catre Cainöj Troa Sine Thele La Itre Mekune Ngöne La Thith
1. Nemene la ka xatua Iesu matre thaa tro kö a ajeanyi nyidrë qa ngöne lo pane huliwa i nyidrë?
1 Hnei Iesu hna aloine la itre meci ne la itre atr me helëne la itre dremoni ngöne la jidri ka pexej. Ame la drai thupen, traqa pi hi lo itretre dreng, nge öni angatre koi nyidrë, ka hape: “Kola thele enëtilai hnei angat’ asë” me upi nyidrë tro pala hi a kuca la itre huliwa ka hetre menen. Ngo thaa hnei Iesu kö hna nue la itre ewekë cili troa ajeanyi nyidrë qa ngöne la pane huliwa i nyidrë, ene la troa cainöjëne la maca ka loi. Hnei nyidrëti hna sa, ka hape: “Tro shë kowe la ite xa lapa e koilo, mate tro ni a cainöjëne fe e cili, ke celë hi hnenge hna trongën.” Nemene la ka xatua Iesu troa lapa xome pala hi lai mekune cili? Hnei nyidrëti hna catre troa canga mejë e hmakanyi sine jidr matre troa thithi me sine thele la itre mekun. (Mar. 1:32-39) Ketre, troa xatua së tune kaa troa catre cainöj hnene la hna sine thele la itre mekune ngöne la thith?
2. Nemene la nyine tro sa sine thel ka troa xatua së troa catre xome pala hi la huliwa ne cainöj?
2 Nemene La Nyine Troa Sine Thel? Hnei Iesu hna öhne laka, “kucakuca ha [la itre atr], nge isa ije hë, tune la nöjei mamoe ka pa ate thupën.” (Mat. 9:36) Ketre tune mina fe, loi e tro sa mekune hnyawa laka, nyipi ewekë kowe la itre atr troa drenge la maca ka loi. Tro fe sa lapa mekun la enyimenyimene la itre drai. (1 Kor. 7:29) Loi e tro sa sine thele la itre huliwa i Iehova me itre thiina i Nyidrë, memine fe la hnëqa së ka tru troa Itretre Anyipicine i Iehova; loi e tro fe sa mekune hnyawa laka, thatre fe kö la itre atrene la teritoare së la itre nyipici ka sisitria hne së hna kapa qa hnine la Wesi Ula i Akötresie.—Sal. 77:11-13; Is. 43:10-12; Mat. 13:52.
3. Eue la tro sa sine thele la itre mekun?
3 Eue La Troa Sine Thele La Itre Mekun? Tui Iesu, hetrenyi la itre atr ka canga hlë e hmakany, ke, pëkö mejene ilu. Itre xan a sine thele la itre mekune qëmekene troa meköl e jidr. (Gen. 24:63) Ngacama nyimutre la itre jole së ngöne la drai, ngo loi e tro pala hi sa xomi ijine troa sine thele la itre mekun. Ame la itre xan, angatr a sine thele itre ej ngöne kar. Itre xane pena a xome la ijine angatr a xeni e hnaipajö, matre troa lapa mekune hnyawa la itre ewekë. Nyimutre fe la itre atr ka ujë tune lai qëmekene troa cainöj, ngacama hnepe ijine hi, ngo kolo matre troa xatua angatr troa hetre trenge catre troa cainöj.
4. Pine nemene matre loi e tro sa sine thele la itre mekun?
4 Maine tro sa sine thele la itre mekun ngöne la thith, tro hë lai a akökötrene la aja së troa nyihlue i Iehova, me xatua së troa thele pala hi troa amë panëne la hmi koi Iehova, me acatrene la aja së troa catre cainöj. Hnene laka hnei Iesu lo Hlue ka tru i Akötresie hna kepe thangane la hna sine thele la itre mekun, haawe, tro fe hë së a hane kepe thangane lai.