Thupëne Hnyawa Kö La Mekuthetheue Së
1. Nemene la tane la asabele ka ketrepengön nge ka ca drai ne la macatre ne huliwa 2013, nge nemene la hna troa ithanatane ngöne la porogaram?
1 Hetrenyi la itre ewekë ka traqa koi së e nöjei drai ka adrone la mekuthetheue së. Celë hi kepine matre qaane la drai 1 Semitrepa 2012, kola nyiqaane la tane la asabele ka ketrepengön nge ka ca drai ne la macatre ne huliwa 2013 hna hape, “Thupëne Kö La Mekuthetheue Së.” (1 Tim. 1:19) Hna eköthe la porogarame cili matre troa isa xatua së, troa wange hnyawa la aqane tro sa xome la ahnahna cili ka sisitria hne së hna kapa qaathene la Atre Xupi së.
2. Nemene la itre hnyinge ka nyipi ewekë hna troa sa ngöne la asabele?
2 Thele Jë Troa Sa La Itre Hnyinge Celë: Tro la porogarame a sa la sevene lao hnyinge ka nyipi ewekë göi mekuthetheue së:
• Nemene la ewekë ka hetre ethanyine kowe la mekuthetheue së?
• Tro sa inine tune kaa la mekuthetheue së?
• Nemene la ka aijijë së troa qaja ka hape ka gufa së qaa ngöne la madra ne la nöjei atr asë?
• Kola qeje së tune kaa hnene la aqane mekune me trongëne së la itre trepene meköti ne la Tusi Hmitrötr?
• Nemene la nyine tro sa kuca matre tha tro kö sa athixötrëne la mekuthetheue ne la itre trejin?
• Itre thöthi fe, tro epuni a cile catre tune kaa e traqa ju thele troa ajojezi nyipunie?
• Nemene la itre manathithi hna kapa hnene la itre ka ujë thenge la mekuthetheue i angatr, hna eatrongëne hnei uati hmitrötr?
3. Tro sa kepe thangane ka loi tune kaa qaa ngöne la asabele së?
3 Hnene la ixatua i Iehova, matre easa atreine troa cile huti ngöne la kola catre hnei Satana troa angazone la mekuthetheue së. Jëne la Wesi Ula i Akötresie memine la organizasio i Nyidrë, kola qaja hnene la Tretretro së ka ihnimi ekoho hnengödrai, ka hape: “Dei la gojeny, tro nyipunie a trongën’ ej.” (Is. 30:21) Jëne la asabele celë, Iehova hi lai a xatua së. Celë hi matre canga hnëkë jë matre troa sine asë la porogaram. Drenge hnyawa ju nge mekune ju la aqane troa trongëne la itre mekune ka ketri epun. Ce ithanatane jë la porogaram, cememine la hnepe lapa i epun. Maine tro sa trongëne la itre ini hne së hna kapa, tro hë lai a aegöcatrenyi së matre tro pala hi sa “hetenyi la mekuthethewe ka loi,” nge tro fe a xatua së matre tha tro kö a huli së hnene la itre nyine iamadrinë ne la fene i Satana ka tha troa cile hut.—1 Pet. 3:16.