Tro Fë Huliwa Ne Qeje Drai Ne Amekunën: Troa Nyiqaane e 1 Maac
1. Eue la troa nyiqaane tro fë huliwa ne qeje Drai Ne Amekunën, nge pine nemene matre ka qea kö la ijine ihë ngöne la macatre celë?
1 Ame e Drai Ka Tru ne Maac drai 1, easa troa nyiqaane la huliwa ne ihë göi troa ce sine me easë la Drai Ne Amekunën. Troa kuca la Drai Ne Amekunën e Maac drai 26, kola hape ame la hnepe ijine ihë, tre ka nango qea kö ej hune lo itre macatre ka ase hë. Tro lai a aijijëne la itre atr ka nyimutre troa kapa la pepa ne ihë, ka lolo catre hnyawa lai kowe la itre ekalesia ka tru la teritoare nyine tro angatr a cainöje kow.
2. Nemene la itre hna amekötine göi troa isa hetre ipepa ne ihë, me göi troa kuca hnyawa asë la itre teritoar?
2 Hnëkë Hnyawa Jë: Tro la itre qatre thup a amekötine la aqane troa huliwane la itre teritoar, nge tro kö angatr a qaja ka hape, eue la ijine troa amë pe la itre pepa ne ihë ngöne la itre hnalapa ka pë atren. Maine hetre munëne pala kö la itre pepa ne ihë nge ase asë hë kuca la itre teritoar, ijije troa huliwane itre ej ngöne la itre götrane gaa tru atr hne së hna tro ngön. Tro la atre thupëne la huliwa ne cainöj a hmekëne matre tro pala hi a hetre ipepa ne ihë hune la hna xawa itus ne la ekalesia, ngo the aca xome asë kö itre ej. Tro hi sa xome la ka ijije nyine tro sa thawa trongëne ngöne la wiik.
3. Nemene la nyine tro sa mekune hnyawa ngöne la ijine easa tro fë trongëne lo itre pepa ne ihë?
3 Nemene La Nyine Tro Sa Qaja? Loi e tro hi a ahopatrene la itre mekun, matre ijije troa ketr la nöjei pengöne la atr asë. Hetre aqane tro fë ihë ngöne la götrane 4 nyine tro sa qaja ngöne la teritoare së. Eje hi laka, e maine troa kepe së hnene lai atr maine hetre hnyinge i angeic, the nuetriji angeice kö troa canga sesë koi ketre hnalapa. Ame la easa tro fë la pepa ne ihë e mecixeni me sabath, hamëne pi fe lo itre zonale e ijij. Ame e drai 2 Maac, loi e tro hi sa hamëne lo itre ipepa ne ihë, nge pane nue pi pë hë lo troa nyiqaane inine la Tusi Hmitrötre memine la itre atr.
4. Pine nemene matre nyipi ewekë tro sa catre tro fë la pepa ne ihë?
4 Aja së troa traqa atrune la itre atr kowe la Drai Ne Amekunën. Tro la cainöje a qejepengöne hnyawa ka hape drei lae Iesu. (1 Kor. 11:26) Tro eje a amamane hnyawa la aqane troa xatua së hnene la meci nyidrë. (Rom. 6:23) Nge tro fe eje a amamane hnyawa la kepine matre ka nyipi ewekë catre koi së matre tha tro pi kö a thëthëhmi nyidrë. (Ioane 17:3) Epi tro sa catre troa tro fë la pepa ne ihë!