Nyitipune Jë Së La Nöjei Perofeta—Iona
1. Nemene la itre thiina ka lolo ka mama ekö thei Iona?
1 Maine tro nyipunieti a meku Iona, nemene koi nyipunieti la pengö i angeic? Ame itre xan, öni angatre ka hape, ka kötre huliwa, maine pë utipine pena. Ngo angeice la ketre atr ka hetre ipië, me ka catr, nge ka nue la mele i angeice koi itre xan. Tro sa nyitipu Iona tune kaa?—Iako. 5:10.
2. Tro sa nyitipune tune kaa la aqane ipië i Iona?
2 Hni Ka Ipië: Hnei Iona hna pane kötr ananyine la götrane hna upi angeice troa tro kow, ene la nöje Asuria. Ijije tro sa trotrohni angeic, ke celë hi ketre nöje ekö lai ka iaxösisi catr; celë hi matre ati ëje i Nineve ju pë hë ka hape “lapate kuci madra.” (Nah. 3:1-3) Ngo hnei Iehova hna haji Iona, nge hnei angeic hna kapa la hnëqa memine la hni ka ipië, ngöne la kola nyi hnaaluene upi angeic. (Ite edomë 24:32; Iona 3:1-3) Ngacama hnei Iona hna pane cil, ngo hnei angeice kö hna kuca la aja i Iehova. (Mat. 21:28-31) Nge tune kaa fe së, maine traqa ju hane haji së maine upi së pena troa cainöj ngöne la ketre götrane ka jol koi së, tro kö sa catre kuca la huliwa së, ene la troa cainöj?
3. Pine nemene matre nyipi ewekë koi së troa hetrenyi la trenge catr, me atreine nue mel thatraqane la huliwa ne cainöje trootro?
3 Catre Pi Nge Nue Pi La Mele i Nyipunie Koi Itre Xan: Ame hë la Iona a öhne laka zö i angeice hi la kolo ha troa lö la he, me meci fe la itre ka huliwa, tha hnei angeice kö hna cile troa nue la mele i angeice koi angatr. (Iona 1:3, 4, 12) Ame hë e thupen, hnei angeice hna eatrëne la hnëqa i angeic, me lö Nineve eë, matre thele hnë tro angeic a cainöjëne la iameköti Iehova. Tha aqane ujë ne ka kötre hnëqa kö la, ngo aqane ujë ne la ketre perofeta i Akötresieti ka catre pe! (Iona 3:3, 4) Nge tune kaa fe së enehila? Nyipi ewekë troa sipo Akötresieti la trenge catre matre tha tro kö sa xou troa cainöj, ngacama hetre icilekeu. (Ite hu. 4:29, 31) Nyipi ewekë fe troa nue la mele së, ene la traeme së me itre hne së hna hetrenyi thatraqane la huliwa ne cainöje trootro.—Ite hu. 20:24.
4. Pine nemene matre nyipi ewekë tro sa xomi ijine troa inine la tulu hna hamëne koi së hnene la itre perofeta?
4 Maine tro nyipunieti a thele troa xomi ini qa ngöne la pengöne la ketre perofeta i Iehova, tune la hna amamane hnene la Tusi Hmitrötr, tro hë nyipunieti a kepe thangane ka loi. Qa ngöne lai, isa hnyinge jë ka hape: ‘Maine eni ju fe, nemene fe la hnenge hna troa kuca? Tune kaa la aqane tro ni a nyitipune la itre thiina ka loi ne la itre perofeta celë?’ (Heb. 6:11, 12) Tro la itre xa tane mekune ne la Huliwa Ne Baselaia a amamane koi së la itre xa ini hne së hna xome qa ngöne la tulu ne la itre perofeta i Iehova.