Nemene La Ka Upi Së Troa Cainöj?
1. Nemene la hna upi së hnene la ihnimi troa kuca?
1 Ame la troa cainöjëne la maca ka loi ne la Baselaia i Akötresie, tre celë hi ketre huliwa ka sisitria hne së hna aeatrëne enehila. Nge ame la easa hane xome la huliwa cili, tre aqane amamane hi së lai ka hape, easa drenge thenge lo lue pane wathebo ka tru; ene la troa hnimi Iehova, me hnime la atre lapa ezi së. (Mar. 12:29-31) Ihnimi hi la ka upi së troa catre cainöj.—1 Ioane 5:3.
2. Tro sa amamane tune kaa ka hape, easa hnimi Iehova?
2 Ihnim i Së Koi Iehova: Tro la etrune la ihnim i së koi Iehova, a upi së troa qeje Nyidrë kowe la itre atr. Kola e enehila la 6 000 lao macatre ne Satana a sili ithanata Akötresie. (2 Kor.4:3, 4) Ame la thangane lai, tre itre atr a mekune ka hape, Akötresieti a dreuthe trije la itre atr ka ngazo ngöne la ifereno, maine ketre igötranen la Tirinite Nyidrë, nge tha pi semesinene kö Nyidrëti la itre atr. Ame itre xan, tre öni angatre fe ka hape, pëkö Akötresie. Epi tro sa kuca, matre troa atre hnene la itre atr la trenge nyipici göne la Tretretro së e hnengödrai! Tro la aqane anyipici Nyidrëti hne së a aelëhni Satana, nge tro pena ha a amadrinë Iehova.—Ite edomë 27:11; Heb. 13:15, 16.
3. Pine nemene matre hatrene ihnim la troa cainöje kowe la atre lapa ezi së?
3 Ihnimi Kowe La Atre Lapa Ezi Së: Ame la easa cainöje kowe la ketre atr, easë hi lai a amamane la ihnim i së koi angeic. Nyipi ewekë tro la itre atr a drenge la maca ka loi ngöne la itre hneijine celë ka jol. Ala nyimu la itre atr ka tune la angetre Nineve ekö ne lo hneijine i Iona, “itete tha ’te la ime maca me mi angat.” (Iona 4:11) Maca ka loi a aijijëne la itre atr troa atre la nyine troa kuca matre hetre mele ka loi, me madrin. (Is. 48:17-19) Kolo fe a thue mejiune koi angatr. (Rom. 15:4) Maine tro angatr a drenge la maca, me trongëne la hnei angatre hna inin, “tro ha mele” la itre atr cili.—Rom. 10:13, 14.
4. Nemene la huliwa laka, tha tro pi kö Iehova a thëthëhmin?
4 Ame la itre nekönatre ka loi thiina, tre tha angatre kö a hnimi keme me thine ngöne la itre xa hnepe ijine hi. Ka hnimi keme me thine pe ngöne la nöjei ijin. Haawe, tro fe la ihnim i së koi Akötresie, me kowe la atre lapa ezi së a upi së troa cainöj ngöne la nöjei ijine ka ijij, ngo tha ene casi kö ngöne la itre ijine hna sa. The mano kö së cainöj. (Ite hu. 5:42) Tha tro jë pi kö Iehova a thëthëhmine la itre hatrene ihnimi cili.—Heb. 6:10.