Nyitipune Jë Së La Nöjei Perofeta—Ioela
1. Tro sa amamane tune kaa laka hetrenyi së la metrötr ngöne la huliwa ne cainöj?
1 Drei lae Ioela perofeta? Ame hi la hne së hna atre göi angeic, tre ene laka “nekö i Pethuela” angeic. (Ioela 1:1) Maca i Iehova hi la hna qaja atrun hnene lai perofeta cili, ngo tha qaja kö angeice la hnëqa i angeic. Easë mina fe a hane thele troa qaja atrunyi Iehova ngöne la hna cainöje trootro, me qeje Tusi Hmitrötr, ngo tha easë kö a thele troa mama koi itre atr. (1 Kor. 9:16; 2 Kor. 3:5) Nge ketre kola hamë trenge catre koi së hnene la maca hne së hna tro fë. Ngo nemene la itre mekune hna qaja hnei Ioela perofeta, nge ka troa hamë mejiune me ithuecatre koi së enehila?
2. Ame la easa atre laka, calemi hë la drai Iehova, nemene la hne së hna ajane troa kuca?
2 “Calemi Hë La Drai Iehova.” (Ioela 1:15): Ekö catre hë cinyihane la hnaithanata celë, ngo enehila hi la ijine kola eatre hnyawa. Kola mama jëne la aqane ngazo ne la mele e cailo fen, memine la kola tha semesine së maine hnyima sai së hnene la itre atr laka, easa melëne la itre drai hnapin ne la fene celë. (2 Tim. 3:1-5; 2 Pet. 3:3, 4) Ame la easa goeëne laka calemi hë la pun, tre sipu kepine hi lai ka upi së troa amë panëne la huliwa ne cainöje ngöne la mele së.—2 Pet. 3:11, 12.
3. Pine nemene matre nyipi ewekë troa cainöje enehila, la easa öhne laka calemi hë la akötr atraqatr?
3 “Iehova La Hunapo Ne La Nöje i Nyidë.” (Ioela 3:16): Ame la ewekë hna amamane hnene la xötre celë, tre kolo hi a qaja la iameköti Iehova ngöne la ijine akötr atraqatr. Easa madrine la easa atre ka hape, ame ngöne la ijine cili, tro Iehova a amelene la itre hlue i Nyidrë ka mele nyipici. (Hna ama. 7:9, 14) Ame la easa nyiqaane cainöj me goeëne la aqane xatua së me hamë trenge catre së hnei Iehova, tre kolo fe hi lai a catre la lapaune së, nge hetrenyi fe së la xomihni ahoeany ka troa aijijë së troa melëne la akötr atraqatr.
4. Pine nemene matre ijije hi tro sa lapa treqene hnyawa la itre drai elany, me madrin?
4 Ngacama itre xa atr a goeëne la maca i Ioela ceitu me ketre maca ne hnëjin, ngo celë hi lai ka thue mejiune kowe la itre hlue i Akötresie. (Ioela 2:32) Qa ngöne lai, the tro kö sa xouene la itre drai elany, ngo epi tro pe sa catre cainöjëne la maca ka loi ne la Baselaia i Akötresie, me trongëne la trenge ewekë hna qaja hnene la tus i Ioela 2:23: “Madinejë me aciacine göi Iehova Akötesi nyipunie.”