Nyitipune Jë Së La Nöjei Perofeta—Mika
1. Nemene la hna hnyingëne ekö hnei Mika, nge pine nemene matre tha gufa ju kö la hnei angeice hna cainöj?
1 ‘Eue la ijine troa traqa la pune kowe la fene celë?’ Ma celë jë fe hi la hna hnyingëne ekö hnei Mika perofeta, ngöne lo angeic a tro fë la maca ne iameköti qaathei Iehova kowe la baselaia ne Isaraela me Iuda. Tha gufa ju kö la hnei angeice hna catre cainöj. Ke ame ngöne lo macatre 740 M.P.K., hnei Mika hna hane melëne la ijine kola eatr lo trenge ewekë i Iehova koi angetre Samaria. (Mika 1:6, 7) Nge ame hë e thupen, lo macatre 607 M.P.K., kolo fe a hane lepi Ierusalema. (Mika 3:12) Nemene la aqane tro sa lapa treqene la iameköti qaathei Iehova ngöne la hneijine së, tui Mika ekö?
2. Nemene la aqane tro sa amamane ka hape, easa treqene hnyawane la drai Iehova, nge pine nemen?
2 Lapa Treqene Ju Kö: Öni Mika ngöne la tus i angeic ka hape: “Tro ni a teqe Iehova, tro ni a mejiune la Akötesie ate amele ni.” (Mika 7:7) Ngo tha hnei Mika kö hna lapa menu, uti hë la ijine hna sa. Hnei angeice pe hna eatrëne la hnëqa ne perofeta. Loi e eje mina fe the së la “thina ka hmitöte me thina ka ijiji Akötesie,” ngöne la easa treqene la drai Iehova. (2 Pet. 3:11, 12) Iehova a itreqe, matre nue ijine kowe la itre atr troa ietra. (2 Pet. 3:9) Haawe, epi tro sa nyipine la ithuecatre qaathei Akötresie, ka upi së troa hane itreqe tune la itre perofeta ekö.—Iako. 5:10.
3. Pine nemene matre, loi e tro sa sipone lapaane koi Iehova la uati hmitrötre i Nyidrë?
3 Mejiune Ju Koi Iehova: Ngacama hace la hnëqa hna ahnithe koi Mika, ngo hnei angeice hna sipone koi Iehova la trenge catre troa eatrëne la hnëqa cili. (Mika 3:8) Celë hi kepine matre kola ithuecatre koi së fe hnene la Wesi Ula i Iehova troa mejiune kowe la trenge catre i Nyidrë. Nyidrëti a hamën atrune la trenge catr kowe la itre ka kucakuca, matre atreine angatre troa eatrëne la itre hnëqa hnei Nyidrëti hna ahnithe koi angatr. (Sal. 84:5, 7; Is. 40:28-31) Hnei nyipunieti fe kö hna hane melëne lai, ngöne la nyipunieti a huliwa koi Nyidrë? Hnei nyipunieti kö hna lapaa majemine sipone koi Iehova la uati hmitrötre i Nyidrë, göi troa xatua nyipunie?—Luka 11:13.
4. Pine nemene laka tulu ka loi fe koi së enehila lo aqane mele i Mika ekö?
4 Ame ngöne la mele i Mika ka pexej, hnei angeice pala hi hna amë panëne la aja i Akötresie. Mele ju hë angeice nyipine la itre atr ka qali thiina, ngo aja i angeic troa mele nyipici koi Akötresie. Hna hane tupathi së fe ngöne la nöjei drai. Ngo epi tro pala hi sa acatrene la aja së troa “tro ngöne la atesiwa i Iehova Akötesi shë epine palua.”—Mika 4:5.