Nyitipune Jë Së La Nöjei Perofeta—Zefania
1. Nemene la ewekë ka mama ekö, ngöne lo ijine Zefania a perofeta, nge hnauëne laka tulu lai ka loi koi së enehila?
1 Ame ngöne la ketre hneijine ekö, tre tha hmahma ha la angetre Iudra troa hmi amamanyi koi Baala. Ame hë la kola humuthi Amona Joxu, tre nekönatre la ka nyi hna i nyidrë; Iosea la ëjen. (2 A. l. ite jo. 33:21–34:1) Ame ju hi ngöne la ijine cili, Iehova pë hë a upi Zefania jë troa tro fë la maca i Nyidrë. Ngacama ka hane fe Zefania sine la lapa i Joxu, ngo tha hnei angeice kö hna qaja sinëne la maca ne iameköti Iehova kowe la hna nyijoxu ne Iudra. (Zef. 1:1; 3:1-4) Catre pi së tui Zefania, nge the nue kö së la ihnimi së kowe la itre sinee së, troa angazone la aqane nyihlue i Iehova hne së. (Mat. 10:34-37) Nemene la maca hna tro fë hnei Zefania, nge nemene hë la thangan?
2. Nemene la nyine troa kuca, matre tro fe sa hane mele ngöne la drai ne elëhni Iehova?
2 Thele Iehova Jë: Iehova hmekuje hi la ka atreine amelene la itre atr ngöne la drai ne elëhni Nyidrë. Celë hi kepine matre Zefania pë hë a upe jë la angetre Iudra ekö troa thele Iehova, me thele la meköt, memine la menyik e ijine petre kö. (Zef. 2:2, 3) Ceitui easë enehila me Zefania ekö, ke easa thuecatrene la itre atr troa thele Iehova. Ngo easë fe a thupëne laka, tha easë kö a “hmaca qa thei Iehova.” (Zef. 1:6) Easa thele Iehova, la easa inine la Wesi Ula i Nyidrë, me sipo Nyidrë troa eatrongë së. Easa thele la meköt la easa mele thenge la itre trepene meköt. Nge, easa thele la menyik, ngöne la easa inine troa idrengethenge, me canga trongëne la itre hna amekötine hnene la organizasio i Iehova.
3. Pine nemene laka, loi e tro pala hi sa catre cainöj?
3 Thangane Ka Loi: Hetre thangane pi hë la hnei Zefania hna cainöj kowe la itre xa atre Iudra, me koi Iosea fe, ke hnene lai joxu hna nyiqaane thele Iehova, ngacama nekönatre petre kö nyidrë. Iosea pë hë a iupi jë troa xatua nyidrë troa apatrene la itre idrola qa ngöne la nöj. (2 A. l. ite jo. 34:2-5) Ame enehila, tre ceitune la itre hni ne la itre atr memine la itre pala gojeny, me gaa tëëtë, me itre ka ithiny; nge ame itre xan, tre ceitu me hnadro ka loi, ka hamë wen. (Mat. 13:18-23) Nge maine tro sa catre traane la maca ne la Baselaia, tro hë Iehova lai a amanathithine la itre trenge catre së.—Sal. 126:6.
4. Hnauëne laka, tro kö sa ‘treqe Iehova’?
4 Önine la itre xa atre Iudra ka hape, ma pëkö hnei Iehova hna troa hane kuca koi angatr. Ngo, öni Iehova ka hape, hana cahmijë drai Nyidrë. (Zef. 1:12, 14) Tro hmekuje hi a mele hnene la itre ka zae fei Nyidrë. (Zef. 3:12, 17) Haawe, ‘treqe Iehova jë kö hne së,’ nge epi tro sa madrine qa ngöne la hne së hna ce nyihlue i Nyidrë memine la itre trejine me easë, ngöne la cas!—Zef. 3:8, 9.