Keesi Zuti Së
1. Tune kaa la aqane tro la itre Keresiano a tune la atr ka trene metie?
1 Ame la trene metie ke nyimu pengöne jiane huliwa hnei angeic hna amë e hnine la keesi zuti angeic. Ame itre xaa jiane huliwa, tre hna xome hmekuje hi thatraqane la huliwa hna troa kuca, ngo ame itre xan, tre hna huliwane pala hi. Ame la atr ka maca troa huliwa, tre, eje pala hi e hnine la keesi zuti angeic la itre jiane huliwa hna huliwane lapaan. Nge celë hi itre hnei angeice lai hna atreine huliwane hnyawa. Kola ithuecatr hnei Tusi Hmitrötr kowe la itre Keresiano troa isa catre xom la huliwa ne cainöj, nge troa ketre “ate kuci huliwa ka pë nyine ahmahman.” (2 Tim. 2:15) Nemene la jiane huliwa ka sisitria e hnine la keesi zuti së? Wesi Ula i Akötresieti hi la jiane huliwa ka sisitria hne së hna xom matre troa “inine” la itre atr. (Mat. 28:19, 20) Haawe, loi e tro sa thele troa maca ngöne la aqane troa ce “thawa hnyawa [me angatr] la wesi ula ka nyipici.” Ngo, hetre itre xa jia ne huliwa hne së hna xome lapaan hnine la keesi zuti së, nge nyipi ewekë tro la itre Keresiano a atreine huliwane hnyawan.—Ite edromë. 22:29.
2. Nemene la itre jiane huliwa nyine tro sa xom matre troa inine la Tusi Hmitrötr memine la itre atr?
2 Itre Jiane Huliwa Nyine Ini Tus: Nemene la itre xaa jia ne huliwa hne së hna xom e tröne la Tusi Hmitrötr? Ame la pane jia ne huliwa hne së hna xome göi troa inine la itre atr, tre, ene la itusi hna hape, Nemene La Nyipi Ini Hna Hamën Hnei Tusi Hmitrötr? Thupene la itusi cili, ijije hi tro sa inine la itre atr jëne la itusi celë hna hape, “Thupë Nyipunieti Ju Kö Ngöne La Ihnimi Akötesie”. Celë hi itusi lai ka troa xatua angatr troa trongëne la itre trepene meköt i Akötresie ngöne la nöjei drai ne la mele i angatr. Haawe, loi e tro sa maca ngöne la aqane tro sa huliwane la lue itusi cili. Loi e tro sa hane amë fe e hnine la keesi zuti së la itre xaa boroshür. Tune la boroshür, Itre Maca Ka Lolo Qaathei Akötresie! Celë fe ketre jiane huliwa lai ka lolo göi troa nyiqane inine la Tusi Hmitrötr memine la itre atr. Maine hetrenyi la itre atr ngöne la teritoare së ka thatreine e tus maine ka ithanatane la ketre qene hlapa, ngo co hi maine pëkö itus ngöne la qene hlapa i angeic, ijije hi troa xome la boroshür hna hape, Drei Akötresieti Jë Matre Mele Epine Palua. Hetrenyi fe la ketre jiane huliwa ka troa eatrongëne la itre hnainin kowe la organizasio, ene lo boroshür, Itre Drei La Ka Kuca La Aja i Iehova Enehila? Hetrenyi la itre xa video ka ixatua matre troa inine la itre atr, tune lo hna hape, Nemene La Aqane Trongene La Ini Tusi Epun?, me Ka Tune Kaa La Itre Icasikeu Hun?, me Dieu a-t-il un nom? Itre jiane huliwa lai nyine tro sa inine troa huliwane hnyawa.
3. Nemene la ixatua hne së hna troa kapa qa ngöne la itre Huliwa Ne Baselaia ka troa xulu?
3 Ngöne la itre Huliwa Ne Baselaia ka troa xulu, kola troa xatua së troa atreine huliwane hnyawa la itre itus hne së hna amë e hnine la keesi zuti së göi troa inine la itre atr. Maine tro sa thele troa huliwane hnyawa la itre jiane huliwa cili, tro hë së lai a atreine xötrethenge la eamo i Paulo koi Timoteo, hna hape: “Wai ’ö kö memine la aqane ini ; cile huti ju kowe lai ; ke maine eö a kuca lai tro eö a amele eö kö, me angate fe hna dei ’ö.”—1 Tim. 4:16.