Mama Kö Koi Epun La Itre Thiina Ka Sihngödri Akötresie?

Öhne kö së la huliwa ne la Atre Xup, la easa goeëne la engen, me itre wëtresij, maine ngöne la kola kaca la tim? Jëne la itre hna xup, kola mama la itre thiina ka sihngödri Iehova. (Ro 1:20) Ame la easa pane cile me mekune la hne së hna goeën, easa öhne la itre thiina i Akötresie, tune la men, me ihnim, me inamacan, me meköt, me aqane hame i Nyidrë.—Sa 104:24.

Nemene la itre xa huliwa i Iehova hne së hna öhne e nöjei drai? Mele ju hë së e hnine la traon, ngo ijiji së hi troa öhne la itre waco me itre sinöe. E tro sa xomi ijine troa goeëne la itre hna xup hnei Iehova, tro lai a xatua së troa trotrohnine la ka nyipiewekë, nge tha tro kö së a hnehengazo menu. Ketre, tro fe lai a acatrene la lapaune së laka, ijiji Iehova hi troa thupë së epine palua. (Ma 6:25-32) Maine hetre nekö i epun, xatua nyudreni jë troa atrepengöne la itre thiina ka sisitria i Iehova. Haawe, e tro palahi sa goeëne la itre hna xup, tro hë së lai a easenyi catr kowe la Atre Xup.—Sa 8:3, 4.

GOEËNE JË LA VIDEO, ITRE EWEKË HNA XUP A AMAMANE LA LOLO I AKÖTRESIE—LAI ME ITRE HAN, NGE SA JË CAHU ITRE HNYING:

• Pine nemene matre easa goeëne la nyimu han?

• Pine nemene matre kola saze la itre xa han thenge la götrane hne së hna cile ngön?

• Pine nemene matre ka nyimu han la hnengödrai?

• Nemene la itre han ka ketrepengöne hnei epun hna goeëne xötreithi epun?

• Pine nemene matre nyipiewekë tro sa xomi ijine troa goeëne la itre hna xup?