ITRE TRENGAMO QA HNINE LA TUSI HMITRÖTR | LEVITIKO 4-5
Tro Sa Hamë Iehova La Ka Sisitria
Ame thene la angetre Isaraela, ijije fe kowe la itre ka pë ewekë troa iloi me Iehova. Tro Iehova a kapa la huuje i angatr, e tro angatr a hamën la ka sisitria. Ijiji angatr troa hamë farine, ngo Iehova a ajan tro angatr a hamë farine “ka loi,” kolo farine hna amë thatraqane la itre atr hna wangatrun. (Ge 18:6) Ame enehila, ngacama ka co hi la itre trengecatre së, ngo Iehova a madrine la itre huuj ne iatrunyi hne së hna hamën koi Nyidrë.—He 13:15.
Maine tha ijiji epuni kö troa huliwa i Iehova tun ekö, nemene la aqane xatua epun hnene la mekune celë?