Pine Nemene Matre Tru La Itre Atr Ka Imethinë?

Ka xulu qa kaa la imethinë? Maine easa ajane troa atre, loi e tro sa pane ce wang la aliene la hna hape, imethinë. Nge tro fe sa ce wang la kepin matre kola imethinë la itre atr, memine la aqane haöthe la fene hnengödrai hnene la thiina cili ka ngazo.

Nemene La Aliene La Hna Hape, Imethinë?

Kola qaja la easa methinën me xele ma wang la ketre atr. Easa elëhni koi angeic nge easa ajane troa akötrë angeic. Tha ka canga paatre kö la thiina cili.

KEPIN MATRE KOLA IMETHINË

Nyimutre la itre kepin matre kola imethinë la ketre atr. Tha angeice kö a imethinë pine la hna kuca hnei itre xan, ngo pine la pengöi angatr. Angeic a mekuhni angatr laka, itre atr ka ngazo nge tha tro kö angatr a saze. Angeice fe a wangaconyi angatr me goeë angatr ceitu me itre ithupëjia. Ame koi angeic, angatre la qaane la itre jol. Ngo maine jë, hna qanangazo me akötrë angeic ekö. Celë hi matre, angeice ha imethinë.

AQANE HAÖTHE LA FEN HNENE LA IMETHINË

Ijije hi tro la ketre atr a methinë itre xan, ngacama tha iöhnyi kö angeic me angatr. Maine jë, hna ajojezi angeic hnene la aqane waiewekë ne la itre sinee i angeic, maine itre atr hnei angeic hna metrötrën.

Nyimenyime hi la aqane kökötr e kuhu hni ketre la imethinë. Celë hi matre, canga haöthe hi la fen hnene la thiina cili. Ngo hetre ketre kepin matre kola imethinë. Tro sa pane nue la Tusi Hmitrötr troa qaja la qaane la thiina cili.

TUSI HMITRÖTR A QAJA LA QAANE LA IMETHINË

Ketre iatr ka amamane la pengöne la imethinë. 1. Itre ithuemacanyi ka thoi, itre gurup me ëternet me itre nuvel. 2. Thatre kö la aqane mel me itre xaa nöj me hmi. 3. Kola xouen troa saze la itre ewekë me troa atrekënö la itre ewekë i angatr memine la ka troa traqa elany. 4. Kola imethinë, kola ië hna hnim, kola iwangatrehmekunyi atr, me isi.

THA ITRE ATR KÖ LA QAANE LA IMETHINË. Ej a nyiqan e hnengödrai ngöne lo kola icilekeu me Akötresie hnene la ketre angela hna hën e thupen ka hape, Satana Diabolo. Eje hi, ‘atre ihumuthi Diabolo qaane lo qaan.’ Satana la “atre thoi nge keme ne la thoi,” matre angeic a ukune la itre atr troa imethinë me isi. (Ioane 8:44; 1 Ioane 3:11, 12) Tusi Hmitrötr a qaja ka hape, ka ngazo angeic me iakötrë, nge atraqatre la trenge elëhni angeic.—Iobu 2:7; Hna Amaman 12:9, 12, 17.

ITRE ATR KA NGAZO SË MATRE CANGA TRO HI SA IMETHINË. Hnei Adramu lo pane atr, hna nyitipu Satana, matre tha atr ka pexeje hmaca kö angeic. Ame la pun, itre atr ka ngazo hë së nge ka tha pexeje kö. (Roma 5:12) Hnene la imethinë hna upi Kaina, nekön haetra i Adramu, troa humuthi Abela, jini angeic. (1 Ioane 3:12) Nyipici, alanyimu la itre atr ka ihnimi me utipin. Ngo pine laka, itre atr ka ngazo së, matre nyimutre kö la itre ka hnimi angatre kö, me meciun, me piine la ewekë i itre xan, me pi tru.—2 Timoteo 3:1-5.

KA ISAPENGÖNE ME ITRE XAN MATRE KOLA IMETHINË. Easa mel ngöne la fen ka ngazo nge ka upi la itre atr troa imethinë. Celë hi lai ka mama ngöne la aqane mekun me aqane ujë ne la itre atr. Pëhë ihnim me utipine i angatr. Angatr a ixelemawai ke, tha ceitui itre xane kö me angatr. Angatre fe a ixöjetrij, me iqaqa, me qanangazo itre xan, me huliwa thoi, me atrekënö. Eje hi, “fene hnengödrai asë a lapa fene la musi ne la atre ka ngazo.”—1 Ioane 5:19.

Nyipici, Tusi Hmitrötr a qaja la qaane la imethinë. Ngo eje fe a qaja la aqane tro sa thipetrije la thiina cili ka ngazo.