AQANE TROA THIPETRIJE LA IMETHINË
3 | Troa Xometrije La Itre Mekun Ka Aciane La Imethinë
Öni Tusi Hmitrötr:
“Saze pi hnene la hna ahnyipixene la aqane mekun i nyipunie, matre tro hë nyipunieti a isa tupathe la aja i Akötresie laka, ka lolo, nge ka iamadrinë, nge ka pexej.”—ROMA 12:2.
Aliene La Xötr:
Ame koi Akötresie, ka nyipiewekë la itre mekuna së. (Ieremia 17:10) Celë hi matre, tha tro hmekuje kö sa thipetrije la itre trengewekë me aqane ujë ka imethinë. Loi e tro fe sa thipetrije la thiina cili qa ngöne la itre mekun me aliene hni së. E cili, tro ha “ahnyipixene” la itre thiina së nge tro hë sa atreine thipetrije la imethinë.
Nyine Tro Sa Kuca:
Loi e tro sa isa waipengö së me aqane goeëne së la itre atr ka traqa qa ngöne la itre xaa nöj, me ka isapengöne han ne ngönetrei me easë. Isa hnyinge jë së ka hape: ‘Tune kaa la aqane goeëne ni la itre atr cili? Hnenge kö hna thele troa atre angatr hnyawa? Maine hnenge pena hna dreng la hna qaja göi angatr?’ Tha tro kö sa goeëne la itre ithuemacanyi ngöne Ëternet me itre film ka aciane la imethinë.
Tusi Hmitrötr a xatua së troa xometrije la imethinë qa ngöne la mekun me hni së
Tha ka hmaloi kö troa isa waipengö së. Ngo Tusi Hmitrötr a xatua së troa “isa waipengöne la itre mekun me itre aja ne la hni” së. (Heberu 4:12) Ngo nyipiewekë tro sa catre inine ej. Loi e tro sa pane goeëne la aqane mekuna së memine la itre ini qa hnine la Tusi Hmitrötr, me thele la itre mekun ka amadrinë Akötresie. Tro la Tusi Hmitrötr a xatua së troa “akeine la itre itra etë atraqatr,” me xometrije la imethinë qa ngöne la mekun me hni së.—2 Korinito 10:4, 5.