Itre Hnyinge Ne La Itre Ka e
Hnauëne la kola qaja ngöne 2 Samuela 21:7-9 ka hape, hnei Dravita “hna hnimi Mefiboseth,” ngo ame e thupen, hnei nyidrëti hna upi Mefiboseth koi angetre Gibeona matre ameköti angeic?
Maine jë, celë fe hi la hne së hna mekun ngöne la easa e la xötre celë. Ngo ame ngöne la Tusi Hmitrötr, hetrenyi la lue atr hna hën ka hape, Mefiboseth. Tro sa ce wang la ka traqa e celë, me xomi ini qa ngön.
Ame Saulo joxu ne Isaraela ke, sevene lao nekö i nyidrë trahmany, nge lue jajiny. Ionathana la pane nekö i Saulo. Thupene lai, hnei Saulo me Rizepa hna hnaho Mefiboseth. Ame pe, hnei Ionathana mina fe hna hnaho trahmany me hën ka hape, Mefiboseth. Kolo lai a amamane laka, caasi hi la ëje ne la nekö i Saulo me api nyidrë ka hape, Mefiboseth.
Ame ketre ijin, hnei Saulo joxu hna thele troa lepe la angetre Gibeona, ene lo itre ka ce mel memine la angetre Isaraela. Nge kola qaja ka hape, alanyimu la itre hna humuth. Eje hi, tha ka loi kö la hnei nyidrëti hna kuca. Pine nemen? Pine laka, ame ngöne la hneijine i Iosua, hnene la itre he ne la nöje Isaraela hna axeciëne ka hape, tro angatr a mele tingeting me angetre Gibeona.—Iosua 9:3-27.
Kolo palahi a metrötrëne la isisinyikeu cili göne la ijine i Saulo joxu. Ngazo pe, hnei Saulo hna thele troa humuthe la angetre Gibeona. E cili, hna upezö Saulo me lapa i nyidrë ka hape, “itete kuci madra.” (2 Sam. 21:1) Thupene lai, hnei Dravita hna nyihnai Saulo troa joxu. Nge hnene la angetre Gibeona ka mele pe hna qaja koi angeic la ka traqa. E cili, hnei Dravita hna hnyingë angatr la nyine troa kuca matre qeje menu, me kepe hmaca la nöje hnei Iehova. Tha hnei angatre kö hna sipo manie. Hnene la angetre Gibeona pe hna sipone matre tro la sevene lao matra ne lo atr ka thele troa “apatenyi” angatr a mec. (Num. 35:30, 31) Nge hnei Dravita hna kapa la sipo i angatr.—2 Sam. 21:2-6.
Meci hë Saulo me Ionathana ngöne la ijine cili. Hna humuthi nyidro ngöne la hna isi. Ame pe, mele palakö Mefiboseth lo nekö i Ionathana. Ngo nekönatr petre kö angeic, matre tha hnei angeice kö hna hane ce xöle me Saulo, me humuthe la angetre Gibeona. Ketre, hnei Dravita lo hna isisinyikeu me Ionathana, matre thatreine kö nyidrëti troa humuthe la itre nekö i angeic, tui Mefiboseth. (1 Sam. 18:1; 20:42) Öni Tusi Hmitrötr: “Hne[i Dravita] hna hnimi Mefiboseth, nekö i Ionathana nekö i Saulo, qa ngöne la isisinyikeu Iehova hnei nyido.”—2 Sam. 21:7.
Ame pe, hnei Dravita hna kapa la sipo i angetre Gibeona. Hnei nyidrëti hna hamë angatre la lue nekö i Saulo, Mefiboseth la ketre, me faifi lao api Saulo. (2 Sam. 21:8, 9) Celë hi ka köletrije la ngazo ne la nöj.
Tha ketre ifejicatre kö la hna melën celë. Önine la wathebo i Akötresie: “Tha tro kö a humuthe la ite neköne pine la ite kem.” (Deu. 24:16) Tha tro jë kö Iehova a nue troa humuthe lo lue nekö i Saulo me faifi lao api nyidrë, e pëkö ngazo hnei angatr hna kuca. Önine la wathebo: “Tro ha humuthe la ate pine la ngazo i angeice kö.” Kolo lai a amamane laka, hnei angatre fe hna hane sine la kola humuthe la angetre Gibeona. Celë hi matre, hnei angatr ala seven hna xeni pun la ngazo i angatr.
Kola amamane hnene la hna melën celë ka hape, thatreine kö tro sa kuca la ngazo me qaja e thupen ka hape, hna upi së troa kuca. Öni Tusi Hmitrötr: “Mekuneju la jëne la lue ca i ’ö, mate cile huti la nöjei goje i ’ö asë.”—Ite edomë 4:24-27; Efe. 5:15.