TANE MEKUN 20
Tusi Hna Amaman—Pun Kowe La Itre Ithupëjia Me Akötresie
“Hnene la itre trengewekë ne la itre u, hna acasi angatr kowe la götran hna hën qene Heberu ka hape, Amagedro.”—HNA AMA. 16:16.
NYIMA 150 Thele Akötresieti Jë Matre Mele Nyipunie
MEKUN KA TRUa
1. Nemene la hna qaja hnene la tusi Hna Amaman göne la itre ka nyihlue i Akötresie?
KOLA qaja ngöne la tusi Hna Amaman laka, hna acil la Baselaia i Akötresie, nge hna ukapië Satana a tro e celë fen. (Hna ama. 12:1-9) Celë hi matre, madrine hë e koho hnengödrai, nge tru la akötre së e celë fen. Pine nemen? Ke Satana a nu la trenge elëhni angeic kowe la itre ka catr nyihlue i Iehova e celë fen.—Hna ama. 12:12, 15, 17.
2. Nemene la ka troa xatua së troa cile catr?
2 Nemene la ka troa xatua së troa cile catr qëmekene la icilekeu i Satana? (Hna ama. 13:10) Ame la ka troa xatua së, ke, ene la troa atre la itre ewekë ka troa traqa elany. Ioane aposetolo a qaja ngöne la tusi Hna Amaman la itre xaa manathith hne së hna troa kapa, tune la troa apatrene la itre ithupëjia me Akötresie. Tro sa ce wang la aqane qejepengöne Hna Amaman la itre ithupëjia cili, memine la ka troa traqa koi angatr.
“HNA MEKÖLE GOEËN” LA ITRE ITHUPËJIA ME AKÖTRESIE
3. Nemene la hna meköle goeën ngöne la tusi Hna Amaman?
3 Ame ngöne la pane xötr ne la tusi Hna Amaman, ke, kola qaja “la itre ewekë cili, kösë itre hna meköle goeën.” (Hna ama. 1:1) Kola qejepengöne la itre ithupëjia i Akötresie jëne la itre iatr, ene la itre öni ka ses. Ame la ketre öni ka ses, “kola fetra qa hnine la hnagejë.” Nge “ka treen lao jian me seven lao he.” (Hna ama. 13:1) Thupei nyën, ke “kola mejë qa ngöne la ihnadro la ketre öni ka ses.” Ej a ithanata tune la drakona, me ‘autine fe la eë qa hnengödrai kowe la fen.’ (Hna ama. 13:11-13) Nge ase jë hi lai, kolo pena fetra “la öni ka ses ka madra palulu,” hna tith hnene la ketre föe ne gojeny. Ame la köni öni ka ses cili, itre ej a nyihatrene la itre ithupëjia me Iehova memine la Baselaia i Nyidrë. Haawe, nyipiewekë tro sa atrepengöi itre ej hnyawa.—Hna ama. 17:1, 3.
FOA LAO ÖNI KA SES
Itre ej a “xulu qa ngöne la hnagejë.” (Dan. 7:1-8, 15-17) Kola qaja la itre mus ka hetre thangane catr kowe la nöje i Iehova qane lo hneijine i Daniela. (Wange ju la paragarafes 4, 7)
4-5. Daniela 7:15-17 a xatua së tune kaa troa trotrohnine la itre hna meköle goeën?
4 Qëmekene troa atre la itre ithupëjia, loi e tro sa pane trotrohnine la aliene la itre iatr. Tusi Hmitrötr hmekuje hi la ka ijij troa qejepengön. Ase hë qejepengöne la itre xaa iatr ne la tusi Hna Amaman ngöne la itre xaa tus ne la Tusi Hmitrötr. Hnei Daniela perofeta hna meköle goeëne la “[4 lao] öni ka tru a xulu qa ngöne la hnagejë.” (Dan. 7:1-3) Nge angeice fe a qaja la alien. Ame la itre öni cili, ke kola nyihatrene la 4 lao “joxu,” maine mus. (E jë la Daniela 7:15-17.) Kolo hi lai a amamane laka, ame la itre öni ka ses hna qaja ngöne la tusi Hna Amaman, ke, kolo fe a nyihatrene la itre mus.
5 Tro hë sa ce wang la itre hna meköle goeën ngöne la tusi Hna Amaman. Tro fe sa ce wang la aqane qejepengöne Tusi Hmitrötr la aliene la itre hna meköle goeën. Tro sa nyiqane memine la itre öni ka ses: Itre ej a nyihatrei drei? Nemene la pun koi itre ej? Nge nemene la aliene koi së?
MAMA HA LA ITRE ITHUPËJIA ME AKÖTRESIE
ÖNI KA SES KA SEVEN LAO HE
Ej a “fetra qa hnine la hnagejë.” Ka treen lao jian me seven lao he. Ame hune la itre jian, treene lao korona. (Hna ama. 13:1-4) Ej a nyihatrene la itre mus hna acil qane ekö. Ame la seven lao he, ke kola nyihatrene la 7 lao musi ka tru, ka hetre thangane catr kowe la nöje i Akötresie. (Wange ju la paragarafes 6-8)
6. Drei la öni ka ses ka seven lao he hna qaja ngöne Hna Amaman 13:1-4?
6 Drei la öni ka ses ka seven lao he? (E jë la Hna Amaman 13:1-4.) Ceitune hi la öni cili memine la leopar, nge ame la itre wacan, kösë waca ne bea, nge ame la që, ceitu me që ne liona. Nge 10 lao jiane ej. Ame ngöne la tusi Daniela mekene 7, kolo fe a mama la 4 lao öni cili. Ngo, ame ngöne Hna Amaman mekene 13, hna acasine la 4 lao öni cili ngöne la ca öni. Matre, ame la öni ka ses ka seven lao he, ke tha eje kö a nyihatrene la ca mus. Ej a “musi kowe la nöjei tribu, me atr, me qene hlapa, me nöj.” Easa trotrohnine laka, tru catre kö la musi ne ej hune la itre xaa mus. (Hna ama. 13:7) Kolo hi lai a amamane ka hape, ame la öni ka ses cili, ke kola nyihatrene la itre mus hna acil qane ekö.b—Ate cai. 8:9.
7. Drei la seven lao he ne la öni ka ses?
7 Drei la seven lao he ne la öni ka ses? Ame ngöne Hna Amaman mekene 17, kola qejepengöne la iatr ne la öni ka ses hna qaja ngöne Hna Amaman mekene 13. Hna Amaman 17:10 a hape: “Kola qaja la sevene lao joxu: Kei hë la ala faif, nge kola mus hnei ketre, nge tha mejë pala kö la ketre; ngo e mejë hë angeic, tha tro kö angeic a cil aqeany.” Ame ngöne la fene i Satana, seven lao mus ka nyihatrene la itre “he,” ke, ka hlemu la musi angatr. Kola qaja la itre mus ka hetre thangane kowe la nöje i Iehova qane ekö. Ame lo Ioane a cinyanyine la tusi Hna Amaman, patre hë lo 5 lao mus, ene la musi Aigupito, Asuria, Babulona, Madai me Peresi, me Geres. Nge kola cil la hnaasikisine mus, ene Roma. Matre drei pë hë la hnaasevenene he?
8. Drei la hnaasevene he ne la öni ka ses?
8 Tune la hne së hna troa ce wang, tro la itre hna perofetane hnei Daniela a amamane koi së ka hape, drei la hna sevenene he. Drei la mus ka cil qane lo kola nyiqan la “drai i Joxu” utihë la itre drai ne la pun? (Hna ama. 1:10) Kola qaja la lue mus ka ce huliwa, ene la musi Agele me Amerika. Eje hi lo hnaasevenene he ne la öni ka ses hna qaja ngöne Hna Amaman 13:1-4.
ÖNI KA SES KA LUE JIAN KÖSË NEKÖI MAMOE
Ej a “mejë qa ngöne la ihnadro” me “ithanata tune la drakona.” Hna hëne ej fe ka hape, “perofeta thoi” ke, ej a ‘autine la eë qa hnengödrai’ me kuca la itre iamamanyikeu ka tru. (Hna ama. 13:11-15; 16:13; 19:20) Musi Agele me Amerika la öni ka ses ka lue jian kösë neköi mamoe, nge hna hëne fe ka hape, perofeta thoi, ke ej a amenune la nöjei atr, me “upi angatr troa kuca la hnasaatr ne lo öni ka ses” ka sevene lao he. (Wange ju la paragarafe 9)
9. Drei la “öni ka ses ka lue jian kösë neköi mamoe”?
9 Ame ngöne Hna Amaman mekene 13, hna nyihatrene la musi Agele me Amerika hnene la “öni ka ses ka lue jian kösë neköi mamoe, ngo ej a ithanata tune la drakona.” Nge “ej a kuca la itre ewekë ka tru nyine hain, nge goi autine fe ej la eë qa hnengödrai kowe la fen, qëmeke i nöjei atr.” (Hna ama. 13:11-15) Celë hi matre, ame ngöne la mekene 16 me 19, kolo fe a hëne ej ka hape, “perofeta thoi.” (Hna ama. 16:13; 19:20) Daniela fe a qaja la itre xaa aqane ujë ne la musi Agele me Amerika ngöne la kola qaja ka hape, troa “kete pengöne kö la aqane iapatenyi angeic.” (Dan. 8:19, 23, 24) Nge celë hi ka traqa ngöne lo Hnaaluene Isi Katru. Hnene la musi Agele me Amerika hna ce kuca lo lue ibob atomiques hna kuiëne ngöne la Pacifique. Celë hi aqane autine “la eë qa hnengödrai kowe la fen” hnene la musi Agele me Amerika.
ÖNI KA SES KA MADRA PALULU
Hna tith la öni cili hnene la föe ne gojeny, ene Babulona Atraqatr. Ej la hnaaeitrene joxu. (Hna ama. 17:3-6, 8, 11) Ame lo xötrei, föe ne gojenyi a thel troa musinëne la öni ka ses. Ngo e thupen, hnene la öni ka ses hna apatrenyi angeic. Ame la föe cili, ke kola nyihatrene la itre hmi ka thoi. Nge ame la öni ka ses, ke kola nyihatrene la Organisation des Nations unies (ONU), ka isigöline la itre mus. (Wange ju la paragarafes 10, 14-17)
10. Drei la “hnasaatr ne la öni ka ses”? (Hna Amaman 13:14, 15; 17:3, 8, 11)
10 Hetre ketre öni ka ses hna öhne hnei Ioane. Ceitu hnyawa hi ej memine lo öni ka ses ka sevene lao he, ngo ka madra palulu pe ej. Tusi Hna Amaman a hëne ej ka hape, “hnasaatr ne lai öni ka ses” maine “hnaaeitrene joxu.”c (E jë la Hna Amaman 13:14, 15; 17:3, 8, 11.) Kola qaja ka hape, tro la “joxu” cili a pane mama, me patr, me mama hmaca e thupen. Nge celë hi ka traqa kowe lo Organisation des Nations unies (ONU) ka cilëgöline la itre musi ne la fen! Hna pane hëne la joxu cili ka hape, Société des Nations, nge hnene ej hna patr ngöne lo Hnaaluene Isi Katru, me fetra hmaca memine la ëj hna hape, ONU.
11. Nemene la ka troa aelëhnine la itre öni ka ses, nge pine nemene matre tha tro pi kö sa xou?
11 Hnene la itre öni ka ses ne la tusi Hna Amaman ka nyihatrene la itre mus, hna thelejëne troa icilekeu me Iehova memine la itre hlue i Nyidrë. Itre ej a acasine “la nöjei joxu ne fen” kowe la isi Amagedro, ene “la isi ne la drai ka tru i Akötresie, ka Tru Trenge Men.” (Hna ama. 16:13, 14, 16) Ngo tha tro pi kö sa xou. Tro la Akötresie së Iehova a canga amelene la itre ka isigöline la musi Nyidrë.—Ezek. 38:21-23.
12. Nemene la ka troa traqa kowe la itre öni ka ses?
12 Nemene la ka troa traqa kowe la itre öni ka ses cili? Kola sa ngöne Hna Amaman 19:20: “Ame hna xolouthe la öni ka ses memine la perofeta thoi, itre ka kuca la itre ewekë nyine hain qëmekene la öni ka ses, itre ewekë ka amenune la itretre kapa lo hatren ne la öni ka ses, me amenune la itretre nyihluene lo hnasaatr ne lai öni ka ses. Hna ce kuiën amele nyidro kowe la hneopegejë eë me gaz.” Ngacama angatr palahi a isa cilëne la itre göhnë i angatr, ngo tro angatr a sesëkötr la Akötresie a apatrene palua angatr.
13. Nemene la hna uku së troa kuca hnene la itre mus?
13 Kola hapeue lai koi së? Pine laka, itre keresiano së, nyipiewekë tro sa mele nyipici koi Akötresie me kowe la Baselaia. (Ioane 18:36) Celë hi matre, tha easë kö a lö hnine la kuci politik. Ngo tha ka hmaloi kö, ke itre mus a uku së troa ce mekun me ce huliwa me angatr. Ame la itre ka keithenge la mekuna i angatr, ke, tro ha kapa la hatrene la öni ka ses. (Hna ama. 13:16, 17) Maine tro la keresiano a kapa la hatrene cili, tro ha nuetriji angeic hnei Iehova, nge pë fe hë mel ka epine palua koi angeic. (Hna ama. 14:9, 10; 20:4) Loi e tro sa isine troa iananyi memine la politik, ngacama akötrë së ju hë!
PUN KA NGAZO KOWE LA FÖE NE GOJENYI KA HLEMU CATR
14. Thenge la Hna Amaman 17:3-5, nemene la hna meköle goeëne hnei Ioane?
14 Öni Ioane aposetolo, “sesëkötre ju hi ni la eni a goeë angeic.” Kola goeë drei? La ketre föe ka tith la öni ka ses ka madra palulu. (Hna ama. 17:1, 2, 6) Hna hë angeic ka hape, “Babulona Atraqatr,” me “föe ne gojeny ka hlemu catr.” Nge angeic a “kuci ngazo memine la itre joxu ne fen.”—E jë la Hna Amaman 17:3-5.
15-16. Drei lae “Babulona Atraqatr,” nge hne së hna atre tune kaa?
15 Drei lae “Babulona Atraqatr”? Ame la föe cili, tha eje kö a nyihatrene la itre mus, ke, tusi Hna Amaman a qaja ka hape, ej a kuci ngazo memine la itre joxu ne fen. (Hna ama. 18:9) Ame la ej a tith la öni ka ses, ke kolo hi lai a hape, ej a thel troa musinë angeic. Ketre, tha ej kö a nyihatrene la huliwa ne salem ne la fene i Satana, ke ase hë nyihatrene hnene la “itre ka salem e cailo fen.”—Hna ama. 18:11, 15, 16.
16 Tusi Hmitrötr a jele “atre nyixetë” la itre ka nyi ka hmi, ngo ka kuci idrola pe, maine nyisineene la fen. (1 A. l. ite jo. 5:25; Iako. 4:4) Ngo ame ngöne la ketre götran, eje pe a hëne la itre ka mele nyipici koi Iehova ka hape, “jajinyi ka pë ethan.” (2 Kor. 11:2; Hna ama. 14:4) Ame ekö, hna fetra qa Babulona la nöjei hmi ka thoi. Matre, Babulona Atraqatr a nyihatrene la nöjei hmi ka thoi.—Hna ama. 17:5, 18; wange ju la tane mekun ngöne jw.org “Qu’est-ce que Babylone la Grande ?”
17. Nemene la ka troa traqa koi Babulona Atraqatr?
17 Nemene la ka troa traqa koi Babulona Atraqatr? Kola sa hnene la tusi Hna Amaman 17:16, 17: “Ame lo treene lao jian memine la öni ka ses hnei eö hna goeën, tro angatr a methinëne la föe ne gojeny, me thapa la nöjei ewekë i angeic, matre cile xöe pi angeic. Thupene lai, tro angatr a öni la itre ijöne i angeic me dreuthetriji angeic. Ke tro Akötresie a amë hnine la itre hni angatr la aja troa sajuëne la mekuna i nyidrë.” Tro Iehova a nyijëne la öni ka ses ka madra palulu, ene la ONU, troa apatrene trij la nöjei hmi ka thoi.—Hna ama. 18:21-24.
18. Nemene la itre ewekë i Babulona Atraqatr nyine tro sa nuetrij?
18 Kola hapeue lai koi së? Loi e tro palahi la ‘hmi së a wië me pë engazon qëmeke i Akötresie.’ (Iako. 1:27) Celë hi matre, loi e tro sa nuetrij la itre ini ka thoi qaathei Babulona Atraqatr, me itre feet, me itre huliwa i fen, memine la kuci iöni! Ketre, loi e tro fe sa xatuane la itre atr troa trotriji Babulona Atraqatr, wanga tro fe angatr a hane ce xeni pun me angeic.—Hna ama. 18:4.
PATRE HË LA ITHUPËJIA KA TRU I IEHOVA
DRAKONA ATRAQATR KA PALULU TUNE LA EË
Hnei Satana “hna hamëne la mus kowe la öni ka ses.” (Hna ama. 12:3, 9, 13; 13:4; 20:2, 10) Troa kuië Satana, ithupëjia me Iehova, ngöne la hnaop ka jui nge ka thatrehmekun koi 1 000 lao macatre. Nge e thupen, troa kuië angeic ngöne la “hneopegejë eë me gaz.” (Wange ju la paragarafes 19-20)
19. Drei la “drakona atraqatr ka palulu tune la eë”?
19 Tusi Hna Amaman fe a qaja la ketre “drakona atraqatr ka palulu tune la eë.” (Hna ama. 12:3) Eje hi lo ka isi me Iesu memine la itre angela i nyidrë. (Hna ama. 12:7-9) Ej a isi memine la nöje i Akötresie, nge qaathei angeic la men ne la itre öni ka ses, ene la itre mus. (Hna ama. 12:17; 13:4) Drei la drakona? Kolo “un ekö, lo hna hëne ka hape, Diabolo me Satana.” (Hna ama. 12:9; 20:2) Angeic la ka mus kowe la itre ithupëjia me Iehova.
20. Nemene la ka troa traqa kowe la drakona?
20 Nemene ka troa traqa kowe la drakona? Thenge la hna qaja ngöne Hna Amaman 20:1-3, tro la ketre angela a kuië Satana ngöne la hnaop ka jui nge ka thatrehmekun. Kösë angeic e hnine la kalabus. Tro angeic a lapa e cili koi “1 000 lao macatre,” matre thatreine hë angeic “amenune la itre nöj.” Nge e thupen, troa triji angeic me itre dremoni angeic kowe “la hneopegejë eë me gaz.” (Hna ama. 20:10) Pane mekune jë la elolone la mele së elany, e patre hë Satana me itre dremoni!
21. Nemene la ka troa thue madrine koi së?
21 Hnene la tane mekune celë hna xatua së troa trotrohnine la itre hna meköle goeën ngöne la tusi Hna Amaman! Hne sa hna atrepengöne hnyawa la itre ithupëjia me Iehova, memine la pun koi angatr. Tune la hna qaja ngöne Hna Amaman 1:3, “madrine la atre e catrëne la hna perofetan celë me itre ka dreng”! E patre hë la itre ithupëjia me Iehova, nemene la itre manathith hna troa kapa hnene la itre hlue i Nyidrë? Tro la tane mekun ka troa xulu a sa la hnyinge celë.
NYIMA 23 Iehova a Nyiqaane Mus
a Tusi Hna Amaman a huliwane la itre iatr matre qejepengöne la itre ithupëjia me Akötresie. Nge tusi Daniela a qaja la aliene la itre iatr cili. Ame ngöne la tane mekune celë, tro sa ce wang la itre hna perofetan ngöne la tusi Hna Amaman, nge hna hane fe qaja hnei Daniela. E cili, tro hë së lai a atreine wangatrehmekune la itre ithupëjia me Akötresie. Nge tro fe sa ce wang la ka troa traqa koi angatr.
b Ame la ketre ewekë ka amamane laka, hna nyihatrene la itre mus hnene la öni ka ses ka seven lao he ke, hnene laka, “treen lao jian” ej. Ame la naba 10 ngöne la Tusi Hmitrötr, ke kola nyihatrene la ka pexej.
c Pëkö “korona” hune la itre jian ne la hnasaatr ne la öni ka ses. Celë hi ka aisapengönë ej memine la öni ka ses ka sevene lao he. (Hna ama. 13:1) Pine laka “angeic a xulu qaathene lo ala seven” lao joxu, matre angatr la ka hamë mus kowe ej.—Wange ju la Itus ngöne jw.org “Qu’est-ce que la bête de couleur écarlate de l’Apocalypse chapitre 17 ?”