Itre Keme Me Thin—Xatuane Jë La Itre Nekö i Epun Troa Hnimi Iehova

1-2. Hnauëne la kola saze la aqane trotrohnine së la itre eamo qa hnine la Tusi Hmitrötr? Qejepengöne jë.

AME ngöne la ijine faipoipo, lue ka xötrei faipoipo a drenge la cainöje hna cile fë koi nyidro. Anyimua drenge hë nyidro lai cainöj. Ngo ame ngöne la ijine cili, saze hë la aqane drenge nyidro lai cainöj. Hnauën? Hnene laka, thatraqai nyidro lai cainöj, nge tro mina fe nyidro a trongëne la itre eamo hna hamën.

² Ceitune hi lai memine la lue keresiano ka xötrei hnaho. Ame ekö, hnei nyidro hna lapa drenge la itre cainöj thatraqane la itre keme me thin. Ngo pine laka, hetre nekö i nyidroti hë, tro hë nyidro a trongëne la itre eamo hna qaja ngöne la itre cainöj. Ketre hnëqa lai ka tru koi nyidro! Eje hi, ame la kola saze la mele së, tro fe lai a saze la aqane trotrohnine së la itre trepene meköti ne la Tusi Hmitrötr. Celë hi kepine matre, easë itre Temoë Iehova, a e Tusi Hmitrötr lapa. Easa nyitipune la itre joxu ne Isaraela ekö, itre ka lapa mekune la wathebo Iehova e “nöjei drai.”—Deu. 17:19.

3. Nemene la hne së hna troa ce wang ngöne la tane mekune celë?

³ Itre keme me thin, hnei epuni hna kapa la ketre manathith ka tru, ene la troa inine la itre nekö i epun troa hnimi Iehova. Eje hi, tha tro hmekuje kö epun a ini nyudren troa atre Iehova. Ngo loi e tro mina fe epun a xatua nyudren troa hnimi Nyidrë. Tune kaa? Ame ngöne la tane mekune celë, tro sa ce wange la foa lao trepene meköti ne la Tusi Hmitrötr ka troa xatuane la itre keme me thin. (2 Tim. 3:16) Ketre, tro fe sa ce wang la itre manathith hna kapa hnene la itre xaa keme me thin, jëne la hna trongëne la itre eamo qa hnine la Tusi Hmitrötr.

FOA LAO EAMO THATRAQANE LA ITRE KEME ME THIN

4. Nemene la trepene meköt ka troa xatuane la itre keme me thin troa inine la itre nekö i angatr troa hnimi Iehova? (Iakobo 1:5)

⁴ Pane eamo: Sipo ixatua jë koi Iehova. Itre keme me thine fe, catre jë sipo Iehova la inamacan, matre atreine jë epun akökötrene la ihnimi Iehova e kuhu hni ne la itre nekö i epun. (E jë la Iakobo 1:5.) Iehova hi la ka ijije troa xatua epun. Pine nemen? Lue kepin. Ame la hnapan ke, ketre Keme lae Iehova, nge ekö hë Nyidrëti xome la hnëqa ne Kem. (Sal. 36:9) Ame la hnaaluene ke, jëne manathith la itre eamo qaathei Nyidrë.—Is. 48:17.

5. (a) Nemene la ixatua hna hnëkën hnene la organizasio i Iehova kowe la itre keme me thin? (b) Thenge la video, nemene la aqane hiane trejin Amorim me föi nyidrë la itre nekö i nyidro?

⁵ Ame enehila, easa kapa la itre eamo jëne la Tusi Hmitrötr memine la organizasio i Iehova. Itre ej a xatuane la itre keme me thin troa inine la itre nekö i angatr troa hnimi Iehova. (Mat. 24:45) Hetrenyi fe la itre xaa eamo ka lolo catr ngöne lo hna hape, “De l’aide pour les familles,” ka mama ngöne la zonal Hmeke Jë! (qene Wiwi), me ngöne la site së. Ketre, ame ngöne la site jw.org, hetreny la itre hna melën, me itre hna elon, ka troa xatuane la itre keme me thin troa hiane la itre nekö i angatr.b—Ite edomë 2:4-6.

6. Nemene la aqane xatua Joe me fami nyidrë hnene la organizasio i Iehova?

⁶ Nyimutre la itre keme me thin ka olene kowe la organizasio i Iehova. Öni Joe, ketre kem: “Ketre hnëqa ka tru la troa xatuane la köni nekönatr troa hnimi Iehova. Hnenge palahi me föeng hna sipo ixatua koi Iehova ngöne la thith. Nge tha qea ju kö thupene la nyio a ase thith, nyio a kapa la ketre zonal maine ketre video ka ihmeku memine la jole ka traqa koi eahun. Maine patre ju la ixatua i Iehova, tro ha heti hun hnene la itre jol.” Hnei Joe me ifënekö i nyidrë hna öhne laka, ka hetre thangane catr la itre zonal me video kowe la köni nekö i nyidro.

7. Hnauëne laka, nyipiewekë tro la itre keme me thin a amamai tulu? (Roma 2:21)

⁷ Hnaaluene eamo: Amamai tulu jë. Itre nekönatr a goeëne la aqane ujë ne la kem me thin me nyitipu nyidro. Nyipici, pëkö keme me thin ka pexej. (Rom. 3:23) Ame pe, ame la itre keme me thine ka inamacan ke, angatr a isine matre tro palahi a amamai tulu kaloi kowe la itre nekönatr. (E jë la Roma 2:21.) Önine la ketre kem: “Ceitune hi la itre nekö së me ketre éponge hna kuiëne hnine la tim. Saqe hi angatr xolouthe asë koilo. E qaja ha së la ketre ewekë, nge tha ka ihmeku kö memine la itre thiina së, canga tro hi la itre nekö së a ameköti së.” Haawe itre keme me thin, maine epuni a ajane tro la itre nekö i epuni a hnimi Iehova, loi e troa mama koi nyudren ka hape, epuni fe a hnimi Nyidrë.

8-9. Nemene la ini hne së hna kapa qa ngöne la tulu i Andrew me Emma?

⁸ Nyimu aqane troa inine la itre nekönatr. Hane hi la hna qaja hnei Andrew, ka 17 lao macatre. Öni angeic: “Hnei kaka me nenë, hna lapa qaja koi ni la enyipiewekëne troa thith. Ame e nöjei hej, ngacama ase hë ni thith, ngo kaka hmaca kö a ce thithi me ni. Hnei kaka palahi me nenë hna qaja koi ni ka hape: ‘Neköng, the mano kö thithi koi Iehova.’ Hna ketri ni hnene la tulu i nyidro. Tha xouenge hë enehila troa thith, nge eni ha goeë Iehova ceitu me Kemeng ka tru ihnimin.” Itre keme me thine fe, tro la ihnimi epun koi Iehova a xatuane la itre nekö i epun.

⁹ Hane fe la tulu i Emma. Hnene la keme i angeic hna trotrij la hnalapa, nge tru la itre gufa i nyidrë. Öni Emma: “Ame itre xaa ijin, pë hnyawa ca manie i nenë. Ngo hnei eahlo palahi hna qaja la aqane xatuane Iehova la itre xaa trejin. Nge mama hi ka hape, ka mejiune catre eahlo koi Nyidrë. Öhne hi ni laka, eahlo a trongëne la itre ini hnei eahlo hna hamëne koi ni.” Nemene la ini koi epun, itre keme me thin? Loi e tro epuni a amamai tulu kowe la itre nekö i epun, ngacama tru la itre jol.—Gal. 6:9.

10. Eu la itre ijin tro la itre keme me thine ne Isaraela a ithanata me itre nekö i angatr? (Deuteronomi 6:6, 7)

¹⁰ Hnaakönine eamo: Ithanata lapa jë me itre nekö i epun. Hnei Iehova hna amekötine kowe la angetre Isaraela, troa xatuane la itre nekö i angatr troa atre Nyidrë. (E jë la Deuteronomi 6:6, 7.) Ame e nöjei drai, ijije hi tro la itre keme me thine a inine la itre nekö i angatr troa hnimi Iehova. Itre nekö trahmanyi a ce tro helep me keme i angatr, me inine troa tra feja, me menu. Ame pena la itre nekö jajiny, angatr a ce lapa memine la thine i angatr, matre inine troa ca imaano, me kuca la itre xaa jol e kuhu hnalapa. Ame e cili, itre keme me thine a ce huliwa me itre nekö i angatr, me porotrikëne la itre nyipi porotrik. Tune la troa qeje Iehova, me aqane hnimi angatr hnei Nyidrë.

11. Eu la ketre ijine ka lolo tro la itre keme me thin a porotrik me itre nekö i angatr?

¹¹ Saze catre la itre hnedrai. Ame ngöne la itre xaa nöj, pëhë ijine kowe la itre keme me thine troa porotrik memine la itre nekö i angatr. Itre keme me thin a huliwa, nge itre nekönatr a ini. Matre loi e tro la itre keme me thin a thele ijine troa pane porotrik me itre nekö i angatr. (Efe. 5:15, 16; Fil. 1:10) Ame la ketre ijine ka lolo, ke ngöne la kola kuca la Hmi Ne La Fami. Öni Alexandre, ketre trejine nekötrahmany: “E nöjei wiik, hnei kaka palahi hna isine troa kuca la hmi ne la fami. Tha hnei nyidrëti kö hna nue la ketre ewekë troa ajolëne la hmi ne la fami. Ame hë la kola ase, eahuni a nango ce porotrik.”

12. Nemene la nyine troa hmekën hnene la itre kem me thin ngöne la ijine hmi ne la fami?

¹² Nemene la nyine tro epuni a kuca, matre tro la itre nekö i epun a pi sine la hmi ne la fami? Ce wange jë me nyudren lo itus Gojenyi Kowe La Nyipi Mel! E cili, tro hë la itre atrene la fami epun a isa qeje mekun. Maine epuni a ajane tro la itre nekö i epun a fe la itre aliene hni nyudren, me qaja la itre jol ka traqa koi nyudren, the ameköti nyudreni kö, maine iwesitrë ngöne la ijine hmi ne la fami. Nge, e tro nyudren a qaja la mekuna i nyudren, nge tha ka ihmeku kö memine la itre trepene meköt, the canga elëhni kö. Olene jë pe koi nyudren, nge nue nyudrene pi troa ithanata. Tro hë epuni lai a atreine xatua nyudren, ke atre hë epun la itre aliene hni nyudren.

13. Eu la itre xaa ijin, tro la itre keme me thin a inine la itre nekö i angatr troa easenyi koi Iehova?

¹³ Itre keme me thin, thele jë la itre ijine ngöne la drai, matre troa xatuane la itre nekö i epun troa easenyi koi Iehova. The treqene kö la ijine ne ini Tusi Hmitrötr, matre troa acatrene la ihnimi nyudren koi Iehova. Öni Lisa, ketre thin ka hape: “Hnenge me föeng hna inine la itre nekö i nyio, troa atre Iehova jëne la itre hna xup. Matre ame lo kola elo me sesësesë la kuli hanekönatr, catre hnyawa la hni nyudren! E cili, hnei nyio hna qaja koi nyudren ka hape, ame la Atre Xup, ke ka ihnyima, nge ka madrine fe Nyidrë, tu së.”

14. Pine nemene matre nyipiewekë tro la itre keme me thin a xatuane la itre nekö i angatr troa iëne hnyawa la itre sinee i nyudren? (Ite Edomë 13:20)

¹⁴ Hnaafoane eamo: Xatuane jë la itre nekö i epun troa hetre nyipi sinee. Tusi Hmitrötr a qaja hnyawane ka hape, ijije hi tro la itre sinee së a uku së, troa kuca la itre ewekë ka loi, maine ka ngazo pena. (E jë la Ite Edomë 13:20.) Itre keme me thin, atre kö epun la itre sinee ne la itre nekö i epun? Atre hnyawa kö epun la pengöi angatr? Iöhnyi hë epun me angatr? Tro epuni a xatuane tune kaa la itre nekö i epun troa hetre sinee ka hnimi Iehova? (1 Kor. 15:33) Maine aja i epun troa xatuane la itre nekö i epun, hëne jë la itre trejin ka macaj kowe la hnalapa i epun.—Sal. 119:63.

15. Tro la itre keme me thin a xatuane tune kaa la itre nekö i angatr troa hetre nyipi sinee?

¹⁵ Hane hi la hna melëne hnene la ketre kem, Tony. Nyidrë a qaja la aqane kuca i nyidrë me föi nyidrë, matre xatuane la itre nekö i nyidro troa hetre nyipi sinee. Öni nyidrë: “Ame ekö, hnei nyio hna lapa hëne la itre trejin, trahmany me föe ka isa macatrene kö kowe la hnalapa. Eahuni a ce xen, me kuca la hmi ne la fami. Itre ijine lai ka xatua eahun troa iatre hnyawa memine la itre trejin ka hnimi Iehova. Manathith ka tru la eahuni a kapa ngöne la hnalapa, la itretre thupëne la sirkoskripsio, me itre mesinare, me itre xane ju kö. Hnene la tulu i angatr hna xatuane la itre nekö i nyio troa hnimi Iehova.” Itre keme me thine fe, xatuane jë la itre nekö i epun troa hetre nyipi sinee.

CATRE PI!

16. Nemene la nyine tro epuni a kuca e traqa ju trotriji Iehova hnene la ketre nekö i epun?

¹⁶ Nemene la nyine tro epuni a kuca, e traqa ju qaja koi epun hnene la ketre nekö i epun ka hape, xele hë angeic ma nyihlue Iehova? Itre keme me thine fe, the mekune pi kö ka hape, zöi epun la nyëne a trotriji Iehova. Hnei Iehova hna isa hamë së la atreine troa ië ewekë. Nge isa qanyi së kö iëne ka hape, tro sa nyihlue i Iehova maine waea. Maine hnene la nekö i epun hna iëne troa trotriji Iehova, catre pi pe! Ke ame e ketre ijin, tro hmaca kö nyën a bëek. Nge mekune kö lo ceitune ne la nekötrahmany ka paatr. Hnei nyëne lo hna pane trotrij la hnalapa, ngo hnei nyëne hmaca hna bëek. (Luka 15:11-19, 22-24) Maine jë, tro itre xan a qaja ka hape, “Ketre ceitune hi lai, nge tha ka nyipici kö!” Ngo tro sa ce wang la hna melën hnei Elie.

17. Nemene la ka ketri epun ngöne la hna melën hnei Elie?

¹⁷ Öni Elie: “Hnei kaka me nenë hna kuca asë la hnei nyidro hna atrein, matre troa acian e kuhu hning la ihnim koi Iehova me kowe la Tusi Hmitrötr. Ngo ame hë lo eni a nekötrahmany, hnenge hna nyiqane tha idrei.” Hnei Elie hna mele thoi koi Iehova, me thipetrij la ixatua ne la keme me thine i angeic. E thupen, hnei angeic hna trotrije la hnalapa, me kuca la itre huliwa ka sis. Ame itre xaa ijin Elie a porotrikë Tusi Hmitrötr memine la ketre sinee i angeic. Öni Elie: “Ame la eni qeje Iehova kowe la sineeng, eni hmaca a meku Nyidrë. Kola tro la itre drai, nge kolo hmaca a cia e kuhu hning la itre itine nyipici hna tran ekö hnei kaka me nenë.” Ame hë la pun ke, bëeke hmaca ha Elie koi Iehova.c Pane mekune jë la madrin ne la keme me thine i angeic. Eje hi, tha luzi kö lo itre ini hna hamë angeic ekö!—2 Tim. 3:14, 15.

18. Tune kaa la aqane goeën epun la itre keme me thin ka xatuane la itre nekö i angatr troa hnimi Iehova?

¹⁸ Itre kem me thine fe, ketre manathith ka tru la hnei epuni hna kapa, ene la troa xatuane la itre nekö i epun troa nyihlue i Iehova. (Sal. 78:4-6) Nyipici, tha hnëqa ka co kö! Ngo eahuni pe a madrin me olene catrëne koi epun, la hna inine la itre nekö i epun troa hnimi Iehova. Madrine catre Iehova la Nyidrëti a öhnyi epun a eatrëne hnyawa la hnëqa i epun.—Efe. 6:4.