Itre Hnyinge Ne La Itre Ka e

Kola hapeu la Iesu a qaja ka hape: “The mekune pi kö ka hape, eni a traqa fë tingeting e celë fen”?

Hnei Iesu hna cainöjëne la maca ne tingeting. Ngo ame ngöne la ketre ijin, öni nyidrë kowe la itre aposetolo: “The mekune pi kö ka hape, eni a traqa fë tingeting e celë fen. Tha eni kö a traqa fë tingeting, ngo taua pe. Ke, eni a traqa troa aisane la kem memine la kuku, me thine me nekö jajiny, me ifëtresi hmunë me tresi hmunë.” (Mat. 10:34, 35) Kola hapeu la hnei Iesu hna qaja?

Tha aja i Iesu kö troa aisane la fami. Ngo atre hi nyidrë laka, tro la itre ini nyidrë a thë la itre xaa fami. Celë hi matre, ame la itre ka ajane troa xötrethenge Iesu, me xomi bapataiso, loi e tro angatr a trotrohnine hnyawa laka, troa hetre jol ka troa traqa. Maine tro la föi angatr, maine ketre atrene la fami a icilekeu me angatr, tro lai a jol koi angatr troa trongëne la itre ini Iesu.

Tusi Hmitrötr a ithuecatr kowe la itre keresiano “troa mele tingetinge memine la itre atr.” (Rom. 12:18) Ngo ame ngöne la itre xaa fami, tro la itre ini Iesu a tune la “taua.” Celë hi ka traqa ngöne la ketre a kapa la itre ini Iesu, nge itre xan a icilekeu. Ame e cili, tro angatr (itre ka ce mel ngöne la ca hnalapa) a “ithupëjia” memine la ka inine la Tusi Hmitrötr.—Mat. 10:36.

Ame itre xaa ijin, hetre jol ka traqa kowe la itretre drei Iesu ka ce mel memine la itre sinee i angatr ka tha nyihlue i Iehova kö, nge tro lai a tupath la ihnimi angatr koi Iehova me Iesu. Maine jë, tro la fami angatr a uku angatr troa atrune la ketre feet. Drei la hnei angatr hna troa dreng? Öni Iesu: “Ame la atre hnime catrëne la kem me thine i angeic hung, tre, tha ijiji angeice kö troa ketre atre drei ni.” (Mat. 10:37) Tha kolo kö lai a qaja hnei Iesu ka hape, tha tro kö la itretre drei nyidrë a hnim la keme me thine i angatr. Ngo, nyidrëti pe a ini angatr laka, hetre ewekë ka troa tro pa ngöne la mele i angatr. Maine kola icilekeu la fami së pine la hmi, ngo tro palahi sa hnimi angatr. Ame pe, tro kö a sisitria la ihnimi së koi Iehova.

Nyipici, tha ka hmaloi kö la kola icilekeu hnene la ketre atrene la fami. Ame pe, tha thëthëhmine kö la itretre dreng la hnei Iesu hna qaja koi angatr. Öni nyidrë: “Ame la atre xele ma ajöne la sinöe ne iaxösisi angeic, me xele ma xötrethenge ni, tre, tha ijiji angeice kö troa ketre atre drei ni.” (Mat. 10:38) Celë hi matre, itre keresiano a goeëne la iaxösisi qaathene la fami angatr tune la ketre akötr nyine tro angatr a isa thu. Ngo angatr a ajan tro la aqane ujë i angatr a apujene la elëhni ne la itre atrene la fami angatr, me aijijë angatr troa kapa la maca qa hnine la Tusi Hmitrötr.—1 Pet. 3:1, 2.