Iehova a Thupëne La Nöje i Nyidrë

1. Hnauëne la Iesu a sipo Iehova troa thupëne la itretre drei nyidrë?

AME lo jidr qëmeken tro Iesu a mec, hnei nyidrë hna sipone la ketre ewekë ka sisitria kowe la Keme i nyidrë. Hnei nyidrëti hna sipo Iehova troa thupëne la itretre drei nyidrë. (Ioane 17:15, 20) Nyipici, hnei Iehova palahi hna thupën me nyinyawan la nöje i Nyidrë. Ngo, atre hi Iesu laka, troa akötrëne la itretre drei nyidrë hnei Satana. Ketre, tro angatr a aja ixatua qaathei Iehova matre cile koi Satana.

2. Thenge la Salamo 33:18-20, hnauëne laka, tha tro kö sa xouene la itre jol?

² Kola akötrëne la itre hlue i Iehova enehila, hnene la fene i Satana. Easa cile kowe la itre jol ka troa thapa la madrine së, me tupath la lapaune së koi Iehova. Ngo tune la hne së hna troa ce wange ngöne la tane mekune celë, tha tro pi kö sa xou. Iehova a thupë së, ke öhne hi Nyidrë la itre jol ka traqa koi së, nge aja i Nyidrë palahi troa xatua së. Tro sa ce ithanatan la lue tulu qa hnine la Tusi Hmitrötr, ka amaman laka, lue meke i Iehova “hui angete qoue nyidë.”​—E jë la Salamo 33:18-20.

EASA MEKUN KA HAPE, EASË CAS

3. Eu la ijine easa mekun ka hape, easë cas?

³ Ngacama alanyim la itre trejin e hnine la ekalesia, ngo ame itre xaa ijin easa mekun ka hape, easë cas. Ame la itre jeune, angatr a mekun ka hape, angatre cas, ngöne la angatr a saze ekalesia, maine isigöline la lapaun i angatr ngöne la hna ini. Ame la itre xan thei easë, tha madrine kö angatr, ke angatr a isi memine la itre mekun ka ngazo. Angatr a mekun ka hape, pëkö ka atrein xatua angatr. Ame itre xaa ijin, tha pi tro kö sa fe la hni së koi itre xan, ke easa mekun laka, tha trotrohnin së kö hnei angatr. Maine pena, tro sa mekun ka hape, tha nyipiewekë së kö hnei angatr. Ame la easa mekun ka hape, easë cas, ke easa kucakuca me xou. Ngo, tha aja i Iehova kö tro sa mekune tun. Hnauëne la easa qaja lai?

4. Hnauëne la Elia perofeta a qaja ka hape: “Eni casi pe hi”?

⁴ Tro sa ce wange la tulu i Elia, ketre hlue i Iehova ka mele nyipici. Hnei Iezebela hna sisiny troa humuthi angeic, ame hnei angeic hna kötre mel a 40 lao drai. (1 Ite jo. 19:1-9) Nge, ame lo angeice cas e hnine la ngönemenyi, öni angeic koi Iehova: “Eni casi pe hi la [perofeta].” (1 Ite jo. 19:10, MN) Ngo hnei Obadia hna juetrën la 100 lao perofeta qa ngöne la lue ime i Iezebela. (1 Ite jo. 18:7, 13) Hnauëne kö la Elia a mekun ka hape, angeice cas? Maine jë, angeic a mekun laka, meci asë hë la itre perofeta hnei Obadia hna juetrën. Ketre, angeice jë mekun ka hape, pëhë ka nyihlue i Iehova thupene lo ka traqa ngöne la Wetr e Karemela? Me mekune pena ka hape, pëkö ka atre la ka traqa koi angeic, nge pëkö ka meku angeic. Tha hna qaja asë kö hnei Tusi Hmitrötr la aliene hni Elia. Ngo, ame la ka xecie koi së, ke trotrohnine hnyawa hi Iehova la kepin matre Elia a mekun ka hape, angeice cas. Ketre, atre hnyawa hi Iehova la aqane tro Nyidrëti a xatua Elia.

5. Hnei Iehova hna ithuecatre tune kaa koi Elia ka hape, tha angeic casi kö?

⁵ Nyimu aqane xatua Elia hnei Iehova. Hnei Nyidrë hna ithuecatr koi Elia troa fe la hni angeic. Alua hnyinge Nyidrë koi Elia ka hape: “Eö a ue e celë?” (1 Ite jo. 19:9, 13) E cili, Iehova a drenge la Elia a fe la hni angeic. Nge, hnei Iehova hna sa koi Elia ngöne la Nyidrëti a amaman la mene i Nyidrë. Ketre hnei Nyidrë hna ithuecatr koi angeic ka hape, nyimutre catr palakö hnei atr ka nyihlue i Nyidrë. (1 Ite jo. 19:11, 12, 18) Ame hë e cili, lapa hnyawa ha la mekuna i Elia, thupene la hna fe la hni angeic koi Iehova, me dreng la aqane sa i Nyidrë. Hnei Iehova hna ahnith koi Elia la ketre huliwa ka nyipiewekë. Hna upi angeic troa sië Hazaela matre joxu ne Suria, me Iehu matre joxu ne Isaraela, me Elisaia matre perofeta. (1 Ite jo. 19:15, 16) Ame la Iehova a hamë Elia la itre huliwa cili, ke göne troa xatua angeic troa mekune palahi la itre ewekë ka loi. Hnei Iehova fe hna thue sinatronge i angeic, ene Elisaia. Ame epuni ke, tune kaa la aqane tro epuni a kapa la ixatua Iehova, ngöne la epuni a mekun ka hape, epuni cas?

6. Nemene la nyine tro epuni a qaja koi Iehova, ngöne la epuni a mekun ka hape, epuni cas? (Salamo 62:8)

⁶ Iehova a hë epun troa thith koi Nyidrë. Öhne hi Nyidrë la hnei epun hna melën, nge tro kö Nyidrëti lai a dreng la itre thithi epun. (1 Thes. 5:17) Madrine catr Nyidrë troa drenge la itre hlue i Nyidrë. (Ite edomë 15:8) Nemene la nyine tro epuni a qaja koi Iehova ngöne la epuni a mekun ka hape, epuni cas? Hnenge pi la itre aliene hni epun koi Iehova tui Elia. (E jë la Salamo 62:8.) Qaja jë koi Nyidrë la itre hnei epun hna hnehengazon memine la itre hna akötre fë. Sipo Iehova jë troa xatua epun matre atre la nyine troa kuca, ngöne la kola traqa la itre mekun ka ngazo. Maine epuni a mekun ka hape, epuni cas a troa isigölin la lapaun i epun ngöne la hna ini, sipo Iehova jë troa hamëne la trengecatr, matre atreine jë epun ithanata. Ijiji epuni fe troa sipo Nyidrë la inamacan, matre atreine qaja amenyiken la itre hnei epun hna inin qa hnine la Tusi Hmitrötr. (Luka 21:14, 15) Maine epuni a lapa fë la itre mekun ka ngazo, sipo Iehova jë troa xatua epun troa ithanata kowe la ketre trejin ka macaj. Sipo Nyidrëti jë fe troa xatuane la trejin hnei epun hna troa wang, matre drei epuni hnyawa me trotrohni epun. Fe pi la hni epun koi Iehova, nge goeëne ju la aqane sa Nyidrë la itre thithi epun. Ketre, kapa ju la ixatua ne la itre xaa trejin. E cili, tha tro hë epuni lai a mekun ka hape, epuni cas.

7. Nemene la ini hnei epun hna xom qa ngöne la hna melën hnei Mauricio?

⁷ Hnei Iehova hna ahnithe koi së asë la itre hnëqa ka nyipiewekë. Xecie koi së laka, madrine catre Iehova kowe la itre huliwa hne së hna kuca e hnine la ekalesia, me ngöne la huliwa ne cainöj. (Sal. 110:3) Hnauëne laka, nyipiewekë tro epuni a catre huliwa i Iehova, ngöne la epuni a mekun ka hape, epuni cas? Hane hi la hna melëne hnei Mauricio, ketre trejin trahmany.b Thupene la hnei Mauricio hna xomi bapataiso, hnene la ketre sinee i angeic hna iananyi me Iehova. Öni Mauricio, “Ame la eni a öhnyi angeic a nyiqane iananyi me Iehova, ke eni ha luelu. Eni a hnyinge ka hape, tro jë kö ni a metrötrëne la hnenge hna sisiny me mele nyipici koi Iehova. Ame koi ni, eni cas, nge pekö ka atreine trotrohni ni.” Nemene la ka xatua Mauricio? Öni angeic, “Hnenge hna catre cainöj, celë hi ka xatua ni matre tha tro hmaca kö ni a meku ni hi, me lapa fë la itre mekun ka ngazo. Madrine catre ni troa ce cainöj memine la itre xan, matre tha eni hmaca kö a mekun ka hape, eni cas.” Ngacama tha ijiji së kö troa cainöj trootro memine la itre trejin, ame pe, easa ithuecatrekeu ngöne la easa ce cainöj me angatr jëne tus me telefon. Nemene fe la ka xatua Mauricio? Öni angeic: “Hnenge hna huliwa catr kowe la ekalesia. Hnenge fe hna nue trengecatr troa hnëkën me cile fë la itre hnëqang e hnine la ekalesia. Itre huliwa lai ka amekunë ni laka, Iehova me itre trejin a hnimi ni.”

NGÖNE LA KOLA TRAQA ITRAI LA ITRE JOL KA TRU

8. Nemene la thangane koi së la kola traqa la itre jole ka tru?

⁸ Nyipici laka, ame ngöne la itre drai ne la pun, tro sa ixelë memine la itre jol. (2 Tim. 3:1) Ngo ame itre xaa ijin, kola asesëkötrë së ngöne la kola traqa la itre jole cili. Maine jë troa traqa koi së la jol göi mani, maine kola tithi së hnene la ketre mec ka pë nyin, maine kola mec pena la ketre sinee së. Ame ngöne la itre ijine cili, thatreine hë së la nyine troa kuca, nge the qaja palaha la kola traqa itrai la itre jol. Ngo the thëthëhmine kö së laka, tro kö Iehova a thupë së me xatua së ngöne la itre ijine cili.

9. Qaja jë la itre jol ka traqa koi Iobu.

⁹ Goeëne la aqane xatua Iobu hnei Iehova. Hna traqa itrai koi angeic la itre jole ka tru. Ame ngöne hi la ca drai, hna thuemacanyi Iobu ka hape, meci hë la itre öni, me itre hlue i angeic, uti fe hë la itre nekö hnimina i angeic. (Iobu 1:13-19) Pë ju kö ijine i angeic troa treije pine la itre nekö i angeic, nge kolo hmaca fe hë a tithi angeic hnene la ketre mec ka apuingazon la ngönetrei angeic. (Iobu 2:7) Tru catr la akötr i Iobu, matre öni angeic: “Eni a sisine la meleng, nge xele hë ni ma mel.”​—Iobu 7:16, MN.

10. Tune kaa la aqane xatua Iobu hnei Iehova, matre cil kowe la itre jol? (Wange ju la icetrön.)

¹⁰ Iehova a thupë Iobu. Pine laka, tru catr la ihnimi Iehova koi Iobu, matre hnei Nyidrë hna xatua angeic troa cile catr qëmeken la itre jol. Hnei Iehova hna amekunë angeic la edraiën la inamacan i Nyidrë, me ihnimi Nyidrë kowe la itre hna xup. Hnei Nyidrëti hna qejepengöne la emingömingöne la itre öni. (Iobu 38:1, 2; 39:9, 13, 19, 27; 40:15; 41:1, 2) Ketre hnei Iehova mina fe hna aijijë Elihu, ketre hlue i Nyidrë troa ithuecatr me akeukawanyi Iobu. Öni Elihu koi angeic, tro kö Iehova a amanathithin la itre hlue i Nyidrë ka catre mele nyipici. Ngo hnei Iehova fe hna upi Elihu troa hamë eamo ka troa akeukawanyi Iobu. Hnei Elihu hna amekunë Iobu laka, wanamamike angeic qëmeke i Iehova, Atre Xup la fen hnengödrai, nge tha tro kö angeic a goeëne catrën la jol ka traqa. (Iobu 37:14) Hnei Iehova fe hna ahnith koi Iobu troa thithi fë lo köni sinee i angeic ka akötrë angeic. (Iobu 42:8-10) Tune kaa la aqane xatua së enehila hnei Iehova ngöne la easa cile kowe la itre jol ka tru?

11. Nemene la itre mekun qa hnine la Tusi Hmitrötr ka troa xatua së troa cil kowe la itre jol?

¹¹ Tha Iehova hmaca kö a ithanata meköt koi së tui Iobu ekö, ngo jëne pë hë la Tusi Hmitrötr. (Rom. 15:4) Nyidrëti a akeukawanyi së jëne la itre hna thingehnaean. Tro sa ce wang la itre xaa mekun qa hnine la Tusi Hmitrötr, ka troa akeukawanyi së ngöne la easa melën la itre jol. Iehova a qaja ka hape, pëkö ketre ewekë, ka troa “thepe së qa ngöne la ihnimi [Nyidrë].” (Rom. 8:38, 39) Ketre, Nyidrëti a easeny “koi angat’ asë angete hë nyidë” ngöne la thith. (Sal. 145:18) Öni Iehova, maine tro sa mejiun koi Nyidrë, tro së lai a atreine cil kowe la itre jol ka traqa koi së, me madrin ngacama easa akötr. (1 Kor. 10:13; Iako. 1:2, 12) Kola amekunë së hnene la Trengewekë i Akötresie laka, ka pë pengöne la itre jole së enehila, hune la itre manathith hne së hna troa kapa elany. (2 Kor. 4:16-18) Iehova a thingehnaean koi së laka, tro kö Nyidrëti a apatrene la qaane la itre akötre së, ene Satana Diabolo me itre sine xöle i angeic. (Sal. 37:10) Hnei epuni kö hna hane inine gufan la itre xötr ne la Tusi Hmitrötr, ka troa xatua epun troa cil kowe la itre itupath elany?

12. Nemene la hnei Iehova hna ajan tro sa kuca, matre kepe eloin la itre ini qa hnine la Tusi Hmitrötr?

¹² Aja i Iehova tro sa xomi ijin troa inine la Tusi Hmitrötr me lapa mekun ej. Ame la easa trongëne la itre hne së hna inin, kola acatrene la lapaune së me easenyi së kowe la Keme së e hnengödrai. Celë hi lai ka troa xatua së troa xomihnin la itre itupath. Iehova fe a hamëne la uati hmitrötr kowe la itre ka trongëne la Trengewekë i Nyidrë. E cili, uati hmitrötr a hamë së “la men atraqatr” matre xomihnine la nöjei pengöne itupath.​—2 Kor. 4:7-10.

13. Pine nemene matre ka nyipiewekë la itre hna hnëkën hnene “la hlue ka nyipici me ka inamacan”?

¹³ Hnei Iehova hna nyijëne “la hlue ka nyipici me ka inamacan” troa hnëkëne la itre itus, me itre video, me itre miuzik, ka acatren la lapaune së me xatua së troa hmek. (Mat. 24:45) Nyipiewekë tro sa huliwan hnyawan la itre ewekë cili hnei Iehova hna hnëkëne koi së. Hnene la ketre trejin föe qa Etazini hna olene kowe la itre hna hnëkën hnene la hlu. Öni eahlo: “Ame ngöne la 40 lao macatre ne nyihlue i Iehova ni, anyimua tupath la lapauneng.” Hna mec la qaaqa i eahlo hna fena hnei loto, meci fe hë la kem me thine i eahlo hna tith hnene la ketre mec ka pë nyin. Nge alua tithi eahlo hnei cancer. Nemene la ka xatua eahlo troa xomihnine lai? Öni eahlo: “Hnei Iehova palahi hna thupë ni. Jëne la itre hna hnëkën hnene la hlue ka nyipici me ka inamacan, Nyidrëti a xatua ni troa xomihnine la akötreng. Haawe, casi hi la mekunang me Iobu, la angeic a qaja: ‘Tro palahi ni a thiina ka meköt, uti hë la tro eni a mec!’ ”​—Iobu 27:5, MN.

14. Tune kaa la aqane nyijëne Iehova la itre trejin, matre xatua së ngöne la itre ijine jol? (1 Thesalonika 4:9)

¹⁴ Hnei Iehova hna inine la nöje i Nyidrë troa ihnimikeu me itö ixatua ngöne la itre ijine akötr. (2 Kor. 1:3, 4; e jë la 1 Thesalonika 4:9.) Tui Elihu, itre trejin a xatua së matre tro sa mele nyipici ngöne la itre jol. (Itre hu. 14:22) Thupene la hna tithe la föi Diane hnei mec, hnene la ekalesia hna ithuecatr me xatua angeic tro palahi a mele nyipici koi Iehova. Öni angeic: “Ketre ijine lai ka jole catre koi nyio. Ngo hnei nyio palahi hna öhne la iwanakoime i Iehova. Hnene la itre trejin hna hë nyio, me wai nyio, me haluthi nyio ngöne la nyio a akötr. Celë hi ka xatua nyio troa catr. Pine laka, tha ka xomi loto kö ni, hnene la itre trejin hna ati ni koi itre icasikeu me cainöj.” Ketre manathith ka tru la troa sine la fami Iehova ka ihnim!

OLENE JË KOI IEHOVA LA HNA THUPË SË

15. Pine nemen matre xecie koi së laka, tro sa atreine cil kowe la itre jol?

¹⁵ Tro asë hi së a cil kowe la itre jol. Ngo tune la hne së hna ce wang, tha easë casi kö, ngöne la kola traqa la ketre jol. Iehova palahi a thupë së, tune la ketre kem ka ihnim. Nyidrëti a ce me easë me dreng la easa hë, nge aja i Nyidrë troa xatua së. (Is. 43:2) Xecie koi së laka, tro Iehova a xatua së troa cil kowe la itre jol, jëne la thith, la Tusi Hmitrötr, me itre hna hnëkën hnene la hlue ka nyipici me ka inamacan memine la itre trejin.

16. Tune kaa la aqane tro sa lapa thei Iehova?

¹⁶ Easa olen koi Iehova la hna thupë së! “Tro ha la ite hni shë a madine koi nyidë.” (Sal. 33:21) Easa amaman la ole së koi Iehova, ngöne la easa nyipiewekëne la itre hnei Iehova hna hnëkën koi së, matre xatua së. Nge loi e tro fe sa isin troa lapa thei Iehova. Kolo lai a hape, maine tro sa catr drengethenge Iehova me kuca la loi, ke tro hë Nyidrëti lai a thupë së uti hë epin!​—1 Pet. 3:12.