TANE MEKUN 35
The Mano Kö “Itö Ixatua”
“The mano kö ithuecatrekeu me itö ixatua.”—1 THES. 5:11.
NYIMA 90 Itö Ithuecatre Jë Së
MEKUN KA TRUa
1. Thenge la 1 Thesalonika 5:11, nemene la huliwa hne së hna troa kuca?
HNENE kö la ekalesia i epun hna hane xup maine nyihnyawan la ketre Uma Ne Baselaia? Maine eje hi, mekune hi epun lo pane icasikeu hnei epun hna sine e cili. Tru catre la ole i epun koi Iehova ngöne la ijine cili. Pine laka, tru palaha la madrine i epun, matre thatreine hë epun thing la pane nyima. Kola atrunyi Iehova hnene la itre Uma Ne Baselaia. Ngo kola atrunyi Nyidrëti catr hmaca kö, ngöne la easa kuca la ketre aqane xupi uma. Ketre huliwa lai ka sisitria kö, hune la itre uma hna xup. Kola qaja la troa xup la lapaun ne la itre atr ka traqa e hnine la itre Uma Ne Baselaia. Ka nyipiewekë koi Paulo aposetolo la huliwa cili, ngöne lo angeic a cinyanyine la mekun ngöne 1 Thesalonika 5:11, xötr ka nyitrepene la tane mekune celë.—E jë.
2. Nemene la hne së hna troa ce wang ngöne la tane mekune celë?
2 Paulo aposetolo la ketre tulu göne la aqane troa ithuecatrene la itre trejin. Angeic a utipi angatr. Ame ngöne la tane mekune celë, tro sa ce wang la aqane xatuane angeic la itre trejin (1) troa xomihnine la itre jol, (2) troa thele tingeting, me (3) troa acatren la lapaun i angatr koi Iehova. Tro sa ce wange fe la aqane tro sa nyitipu Paulo matre ithuecatr kowe la itre trejin enehila.—1 Kor. 11:1.
PAULO A XATUANE LA ITRE TREJIN TROA XOHMININ LA ITRE JOL
3. Tune kaa la aqane goeëne Paulo la huliwa?
3 Tru catre la ihnimi Paulo kowe la itre trejin. Hnei angeice hna hane cile kowe la itre jol, matre ijiji angeice hi troa utipin me trotrohnine la itre trejin ka hane melëne lai. Ketre, hna hane fe traqa koi Paulo la troa pë mani, nge hnei angeic hna huliwa matre troa hetreny la ka nyipiewekë koi angeic, me itre ka ce tro me angeic. (Itre hu. 20:34) Ka cai itate angeic. Ame la angeic a traqa e Korinito, hnei angeic hna ce huliwa me Akula me Perisila. Ngo ame “nöjei Sabath” angeic a cainöj kowe la angetre Iudra me angetre Geres. Ame hë la kola traqa hnei Sila me Timoteo, “kolo pala hi a tru hnei huliwa i Paulo göi troa cainöjëne la trengewekë i Akötresie.” (Itre hu. 18:2-5) Tha thëthëhmine kö Paulo la huliwa ka nyipiewekë koi angeic, ene la troa nyihlue i Iehova. Pine laka, Paulo la ketre tulu ka lolo göne la aqane troa tulu ewekë göi huliwa, matre ijiji angeic hi troa ithuecatr kowe la itre trejin. Hnei angeic hna amekunë angatr laka, tha tro kö a nue la itre jol ne la mel, memine la huliwa i maseta troa sewe angatr troa “tuluthe la ka nyipiewekë,” ene la itre igötranene la hmi Iehova.—Fil. 1:10.
4. Tune kaa la aqane xatuane Paulo me Timoteo la itre trejin ka qëmeke kowe la icilekeu?
4 Thupene la hna acile la ekalesia ne Thesalonika, hna traqa koi angatr la icilekeu. Pine laka, tha öhnyi Paulo kö me Sila hnene la itre ka icilekeu, angatr a uti sane pi la “itre trejine kowe la itre trene mus,” me sue ka hape: “Angatr la itretre icilekeu memine la itre hna amekötin hnei Kaisara.” (Itre hu. 17:6, 7) Pane mekune jë la kola xou hnene la itre keresiano ka xötrei xomi bapataiso, la angatr a öhne laka, kola icilekeu hnene la nöj. Maine ju tro angatr a kucakuca ngöne la huliwa i Iehova, ngo hnei Paulo me Sila palahi hna thupëne matre tro la ekalesia e cili a kepe ixatua. Öni Paulo kowe la angetre Thesalonika ka hape: Eahuni a “upi Timoteo, trejin me eahun . . . matre akeukawane me acatrene la lapaune i nyipunie. Qa ngöne lai, tha tro kö a enienijë ketre hnene la itupathe celë.” (1 Thes. 3:2, 3) Hnei Timoteo fe hna hane öhne la icilekeu ngöne la traon hnei angeic hna mele ngön, e Lusetara. Hnei angeic hna öhne la aqane akeukawane Paulo la itre trejin e cili, me öhne la iwanakoime i Iehova. Celë hi matre hnei angeic hna akeukawane la itre trejin ne Thesalonika laka, tro kö Iehova a ce me angatr.—Itre hu. 14:8, 19-22; Heb. 12:2.
5. Nemene la itre thangane ka loi hnei Bryant hna kapa, jëne la ixatua ne la ketre qatre thup?
5 Nemene la ketre aqane akeukawane Paulo la itre trejin? Ame lo angeic me Banaba a bëek a tro Lusetara, me Ikonio, me Anetioka, hnei nyidroti hna ‘acile la itre qatre thup ngöne la itre ekalesia.’ (Itre hu. 14:21-23) Xecie koi së laka, hna akeukawane la itre ekalesia hnene la itre qatre thup cili, tune fe enehila. Önine la ketre trejin Bryant ka hape: “Ame lo eni a 15 lao macatre, hnei kaka hna trotriji hun, nge hna upetröneë nenë. Matre, kucakuca catre ni.” Nemene la ka xatua Bryant troa elë hun la jole cili? Öni angeic: “Hnei Tony, ketre qatre thup hna lapa ithanata me ni ngöne la itre ijine icasikeu me itre xaa ijine ju kö. Hnei nyidrë hna qaja koi ni la hna melën hnene la itre trejin. Ngacama hna traqa koi angatr la itre jol, ngo ka madrine palahi angatr. Ketre, hnei nyidrë hna ce thawa me eni la tusi Salamo 27:10 me qaja la tulu i Hezekia joxu. Hnei angeic hna mele nyipici koi Iehova, ngacama ka ngazo la tulu ne la kem i angeic.” Nemene la itre thangane ka loi hnei Bryant hna kapa? Öni angeic: “Jëne la itre ithuecatr hneng hna kapa qaathei Tony, hnenge hna hane xome la ketre huliwa ka thue madrine koi ni, ene la huliwa ne pionie.” Itre qatre thup fe, catre jë thele la itre ka tui Bryant, itre ka ajane troa kapa la itre “tenge ewekë ka loi.”—Ite edomë 12:25.
6. Tune kaa la aqane huliwane Paulo la itre hna melëne ekö, matre ithuecatr kowe la itre trejin?
6 Hnei Paulo hna amekunëne la itre trejin laka, jëne la men i Iehova, hnene “la itretre anyipicine ka ala nyim” hna cile kowe la itre itupath ka nyimutre. (Heb. 12:1) Atre hi angeic laka, tro la hna melëne hnene la itre trejin ekö a thue trengecatr kowe la itre trejin, me xatua angatr troa goeën hutine la “traon ne la Akötresie ka mel.” (Heb. 12:22) Ka nyipici fe hi lai, koi së enehila. Drei thei easë la hna tha akeukawan ngöne la easa e la aqane xatua Gideona, me Baraka, me Dravita me Samuela me itre xane ju kö, hnei Iehova? (Heb. 11:32-35) Nge tune kaa fe la itre tulu ne lapaun ngöne la hneijine së? Alanyimu la itre trejin ka cinyany kowe la hnalapa ne xomi meköt, me qaja la aqane acatrene la lapaun i angatr, ngöne la angatr a e la itre hna melëne hnene la itre xaa trejin enehila.
HNEI PAULO HNA AMAMAN LA AQANE TROA THELE TINGETING MEMINE LA ITRE TREJIN
7. Nemene la ini hne së hna xome qa ngöne la eamo i Paulo ngöne Roma 14:19-21?
7 Easë fe a xatuane la itre trejin ngöne la easa thele tingeting e hnine la ekalesia. Tha tro kö a nue la itre sipu mekuna së troa thë la cas ne la ekalesia. Nge, tha tro kö së a catre fë mekun e tha hna ena kö la ketre trepene meköt. Hanawang la ka traqa kowe la ekalesia ne Roma. Hetreny e hnine la ekalesia cili, la itre keresiano ne Iudra, me itre atre ne fen. Qaane lo kola apatrene la Wathebo i Mose, ke tha hna wathebone hmaca kö la itre xaa xen. (Mar. 7:19) Celë hi matre, tha cile kö la itre xaa trejin ne Iudra troa xome la nöjei pengöne xen, ngo tha hna kuca tune kö hnei itre xan. Ame hna nyiqane traqa pi la gomegom e hnine la ekalesia. Celë hi matre, hnei Paulo hna amexej la enyipiewekën troa thele tingeting, öni angeic: “Ka loi e tha tro kö a öni la ketre mitr, maine iji waina, maine kuca la ketre ewekë ka akeine la trejine me nyipunie.” (E jë la Roma 14:19-21.) Hnei Paulo hna qaja kowe la itre trejin laka, e tro angatr a iwesitrë, tro lai a hetre ethane kowe la itre xaa trejin me kowe la ekalesia. Hnei angeic hna saze la aqane mele i angeic, matre tha tro kö a akeine la itre xan. (1 Kor. 9:19-22) Haawe, maine aja së troa xatua itre xan me thele tingeting, tha tro pi kö sa aciane la iwesitrë me catre fë mekun.
8. Nemene la aqane ujë i Paulo qëmekene la ketre jol ka thë la cas ne la ekalesia?
8 Tune kaa la aqane tro sa ujë, e traqa ju la isazikeu e hnine la ekalesia göne la ketre mekun ka tru? Hnei Paulo hna amamai tulu ka loi göne lai. Ame ngöne lo hneijin ne la itre pane keresiano, hnene la itre xaa trejin hna ukun la itre atre ne fen troa xötrehatrenyi angatr, wanga troa xöjetriji angatr hnene la angetre Iudra. (Gal. 6:12) Tha celë fe kö la mekuna i Paulo. Tha hnei angeice kö hna catre fë mekun, ngo hnei angeice pe hna tro fë la jole cili, koi itre aposetolo me itre qatre thup e Ierusalema. (Itre hu. 15:1, 2) Hetre eloine la aqane ujë i angeic kowe la itre keresiano cili, ke tingetinge hmaca ha la ekalesia.—Itre hu. 15:30, 31.
9. Tune kaa la aqane tro sa nyitipun la tulu i Paulo?
9 E traqa ju la ketre jol ka tru e hnine la ekalesia, nyipiewekë tro sa thele eamo thene la itre trejin hnei Iehova hna acil, matre hetre tingeting. Hnene la organizasio hna amamai së la nyine troa kuca thenge la itre trepene meköt, jëne la itre itusi së maine itre hna amekötin. Maine tro sa trongëne la itre hna amekötine cili hune la troa catre fë mekun, ke easë hi lai a thele tingeting e hnine la ekalesia.
10. Nemene la ketre aqane kuca i Paulo, matre thele tingeting e hnine la ekalesia?
10 Hnei Paulo fe hna thele tingeting e hnine la ekalesia, ngöne la angeic a qaja la itre thiina ka loi ne la itre trejin, me cile troa qeje gele i angatr. Hnei angeic hna e wengëne ngöne la pun la tusi angeic kowe la angetre Roma, la ëjene la itre trejin me qaja la itre thiina ka lolo me pengöi angatr. Loi e tro sa nyitipu Paulo, ene la troa qaja atrun la itre thiina ka lolo ne la itre trejin. Easë hi lai a thue aja koi angatr troa ce mel, nge celë hi ka troa xupe draiëne la ekalesia ngöne la ihnim.
11. Nemene la aqane tro sa thele tingeting e traqa ju iwesitrë e hnine la ekalesia?
11 Troa traqa e xaa ijin laka, itre keresiano ka macaj a tha itrotrohni me iwesitrë. Celë hi ka traqa koi Paulo me Banaba. Aja i ketre tro Mareko a ce tro me nyidro troa cainöj ngöne la ketre götran, ngo xele kö ketre. Hnei nyidro “hna icatrë” me isa ijei. (Itre hu. 15:37-39) Ngo hnei Paulo, me Banaba me Mareko hna elë hun la jole cili. Angatr a amaman e cili laka, ka sisitria la tingeting me cas e hnine la ekalesia. Nge e thupen, hnei Paulo hna qaja aloine Banaba me Mareko. (1 Kor. 9:6; Kol. 4:10) Loi e tro fe sa canga iloi memine la itre trejin ne la ekalesia, me thele palahi la ka loi thei angatr. Aqane tro hi së lai a acatrene la tingetinge me cas ne la ekalesia.—Efe. 4:3.
HNEI PAULO HNA ACATREN LA LAPAUN NE LA ITRE TREJIN
12. Nemene la itre jole ka tupath la lapaun ne la itre trejin?
12 Easë fe a xatuane la itre trejin ngöne la easa acatrene la lapaune i angatr koi Iehova. Ame itre xan, kola hnyimasai angatr hnene la itre fami angatr ka tha hmi kö, me itre sine huliwa maine sine ini angatr. Ame pena itre xan, hetre sine mec i angatr maine kolo pena hleuhleu la mele i angatr. Ame la itre xaa trejin, ekö hë angatr nyihlue i Iehova, nge aja i angatr troa canga apatren la fen celë. Itre ewekë lai ka tupathe palahi la lapaune së. Hnene fe la itre pane keresiano ekö, hna hane cile kowe la itre jole cili. Hnei Paulo hna xatua angatr tune kaa?
Tui Paulo, tune kaa la aqane tro sa ithuecatr koi itre xan? (Wange ju la paragarafe 13)b
13. Nemene la ixatua hnei Paulo hna hamëne kowe la itre trejin hna hnyima fë, pine la lapaun i angatr?
13 Paulo a acatrene la lapaun ne la itre trejin jëne la Itre Hna Cinyihan. Ame la itre xaa keresiano ne Iudra, ke thatreine kö angatr sa kowe la fami angatr, ka thaipiëne la hmi Keresiano. Hna acatrene la lapaune i angatr hnene la tusi Paulo koi angetre Heberu. (Heb. 1:5, 6; 2:2, 3; 9:24, 25) Ijiji angatre hë troa isigöline la lapaune i angatr, qëmeken la itre ka icilekeu. Ame enehila, ijije fe hi tro sa xatuane la itre trejin hna hnyima fë, troa huliwan la itre itusi së, matre isigölin la lapaun i angatr. Maine hetre itre nekötrahmany maine jajiny hna thaipiën, ke angatr a mejiun kowe la Atre Xup, ijije hi tro sa xatua angatr jëne la lue boroshür hna hape, La vie a-t-elle été créée ? me Cinq questions à se poser sur l’origine de la vie.
Tui Paulo, tune kaa la aqane tro sa ithuecatr koi itre xan? (Wange ju la paragarafe 14)c
14. Ngacama Paulo a nue ijine troa cainöj me hamë ini, ngo nemene mina fe la hnei angeic hna kuca?
14 Paulo a ithuecatr kowe la itre trejin troa amaman la ihnimi angatr jëne la “itre huliwa ka loi.” (Heb. 10:24) Tha hnei Paulo hmekuje kö hna xatuane la itre trejin jëne la itre eamo, ngo jëne mina fe la itre huliwa ka loi hnei angeic hna kuca koi angatr. Ame lo kola traqa la ketre jiin atraqatr e Iudra, hnei angeic hna tro fë ixatua kowe la itre trejin e cili. (Itre hu. 11:27-30) Ngacama angeic a nue ijine troa cainöj me hamë ini, ngo hnei angeic fe hna thele jëne troa xatuane la itre ka pë ewekë. (Gal. 2:10) Angeic hi lai a acatrene la lapaun ne la itre trejin laka, tro kö Iehova a thupë angatr. Ketre tune mina fe enehila, ame la easa saen troa xatuane la itre trejin hna lepe hnei hulö, me nue la traeme së memine la hne së hna atrein, ke easë hi lai a acatrene la lapaun i angatr. Ceitune hi lai memine la easa kuië ahnahna thatraqane la huliwa ne cainöj e cailo fen. Itre ewekë lai ka acatrene la lapaune ne la itre trejin laka, tha tro jë kö Iehova a nuetriji angatr.
Tui Paulo, tune kaa la aqane tro sa ithuecatr koi itre xan? (Wange ju la paragarafe 15-16)d
15-16. Tune kaa la aqane tro sa xatuane la itre trejin ka nanazij?
15 Hnei Paulo palahi hna xatuan la itre ka nanazij. Hnei angeic hna utipi angatr me ithanata amenyikeny. (Heb. 6:9; 10:39) Ame la angeic a cinyany kowe la angetre Heberu, hnei angeic hna qaja la hnaewekë “së” matre amaman ka hape, thatraqai angeic fe la itre eamo hnei angeic hna hamën. (Heb. 2:1, 3) Tui Paulo, loi e tro palahi sa xatuan la itre ka nanazij. Easa thel troa acatrene la lapaun i angatr ngöne la easa nyipi angatr. Aqane tro hi së lai a amaman la ihnimi së koi angatr. Tro kö lai a ketri angatr hnene la aqane ithanata së hune la itre hne së hna qaja.
16 Hnei Paulo hna amexej kowe la itre trejin laka, tha ka gufa kö la huliwa i angatr ekö koi Iehova. (Heb. 10:32-34) Celë fe hi la nyine tro sa kuca kowe la ketre trejin ka nanazij. Hnyingë angeic jë la aqane atre Iehova angeic, me aqane xatua angeic ekö hnei Nyidrë. Amexeje jë koi angeic laka, tha thëthëhmine kö Iehova la ihnimi angeic ekö koi Nyidrë, nge tha tro jë kö Nyidrëti a nuetriji angeic. (Heb. 6:10; 13:5, 6) Itre ithuecatre hi lai, ka troa xatuane la itre trejin troa catr nyihlue i Iehova.
“THE MANO KÖ ITHUECATREKEU”
17. Ngöne nemene götran la easa ajane troa maca?
17 Tune la atr ka xupi uma, tro hë angeice lai a atreine huliwa hnyawa thupene la itre macatre. Ketre tu së fe, itre macatre thupen, tro hë së lai a atreine xatuane la itre trejin. Ijiji hi tro sa xatuane la ketre trejin troa xomihnine la jol i angeic, me qaja la itre tulu ne la itre hlue i Iehova ekö ka hane melëne la jole cili. Ketre easa thele tingeting ngöne la easa qaja aloine la itre trejin ne la ekalesia. Loi mina fe tro sa thel troa cas me canga iloi ngöne la kola iwesitrë e hnine la ekalesia. Ijije fe tro sa acatrene la lapaune ne la itre trejin, ngöne la easa amaman koi angatr la aqane troa isigölin la lapaun i angatr, me xatua angatr e nöjei drai.
18. Nemene la hne së hna ajan tro palahi a kuca?
18 Ka madrine catr la itre trejin ka sine la huliwa ne xupi uma ne Baselaia. Ketre tu së fe, madrine catre së troa acatrene la lapaun ne la itre trejin. Ame la thangan la huliwa së, ke ka epine palua, tha ka ceitu kö memine la ketre uma ka troa patr! Haawe, “the mano kö ithuecatrekeu me itö ixatua.”—1 Thes. 5:11.
NYIMA 100 Kepe Angatre Ju
a Tha ka hmaloi kö la mele së enehila. Itre trejin a cile kowe la itre jol. Ngo, ijije hi tro sa xatua angatr, e hne së hna thel la itre aqane troa ithuecatr. Celë hi matre loi e tro sa ce wange la tulu i Paulo.
b ITRE FOTO: Ketre kem a amaman kowe la nekö i nyidrëti jajiny, la aqane troa isigölin la lapaune i nyiën göne la Noël.
c ITRE FOTO: Lue trefën a tro kowe la ketre götran hna lepe hnei hulö matre ixatua.
d ITRE FOTO: Ketre qatre thup a wange la ketre trejin trahmany ka nanazij. Nyidrëti a amamai angeic la itre foto i nyidroti ekö, lo nyidroti a sine la Ini Koi Itre Pionie. Kolo hmaca amekunë nyidro lo itre ijine nyidroti a ce madrin. Celë hi ka thue aja koi angeic troa bëek hmaca koi Iehova. E thupen, angeic hmaca huliwa catre koi Iehova.