Ifoto atraqatr ne la ita ne cainöj memine la imaano hna ewath
1922—Caa Hadredre Lao Macatre Enehila
“AKÖTRESIE, atre aijijë së troa hun, jëne Iesu Keriso.” (1 Kor. 15:57) Celë hi tane la topik ne la macatre 1922 ka ithuecatre kowe la Itretre Ini Tusi Hmitrötr ekö. Xecie hnyawa koi angatr laka, e tro angatr a mele nyipici, tro Iehova a amanathithi angatr. Celë hi ka traqa ngöne la macatre cili. Eje hi, hnei angatr hna ketre sipu fejan la itre itus, me huliwane la radio, göne troa tro fë la maca ne la Baselaia. Ame ngöne lo pun ne la macatre 1922, mama hnyawa ha ka hape, Iehova a amanathithine la nöje i Nyidrë. Hnei Nyidrë hna aijijëne la Itretre Ini Tusi Hmitrötr troa kuca la ketre asabele e Cedar Point, e Ohio (Etazini). Ka hetre thangane catre la asabele cili kowe la organizasio i Iehova utihë enehila.
“THATRE KÖ NI KA HAPE, TRO NI A QEJE NEMEN”
Kolo palahi a kökötre la huliwa ne cainöj, nge alanyimu la itre ka pi e la itre itusi së. Hna fejane la itre itusi së ngöne la Bethela e Brooklyn. Ngo ame la itre itus ka hmekön icetröne ke, hna kuca hnene la ketre entreprise. Ngazo pe, hna pane jole la huliwa ne cainöj, ke pë hnyawa ca itus. Celë hi matre hnei trejin Rutherford hna hnyingë trejin Robert Martin, lo atre elemekene la huliwa ngöne la hnë feja itus ka hape, ‘Ijije kö tro sa fejan asë la itre itusi së ngöne la Bethela?’
Hnë feja itus e Concord Street e Brooklyn (New York)
Öni trejin Martin, “Thatre kö ni ka hape, tro ni a qeje nemen. Pëkö uma nge pëkö masine nyine fejan asë la itre itus.” Celë hi matre hnene la itre trejin hna loué la itre uma e 18 Concord Street e Brooklyn, me itöne fe la itre masine nyine feja itus.
Alanyim catre la itre ka qajangazone lai hnë feja itus ka hnyipixe. Tune hi la maseta ne la ketre hnë feja itus, kolo ka fejane ekö la itre itusi së. Ame la nyidrëti a ase vizitëne la hnë feja itusi së, öni nyidrëti jë hi: “Lolo pi hë la troa itöne la itre masin ka hnyipixe. Ngo hetre ka atreine kö huliwan thei epun? Eni a mekun ka hape, tha traqa ju kö koi 6 lao treu, nge isa lapa ha la itre masine i epun!”
Öni trejin Martin, “Ketre nyipici nyidrëti hi, ngo e tro sa mekune tun, ke kösë thëthëhmine hë së laka, tro kö Iesu a ce me easë.” Nyipici trejin Martin ju kö. Tha hmitre ju kö, nge easa fejane la 2 000 lao itus e nöjei drai.
Itre trejin ka huliwa, ezine la itre masine ne feja itus
ITRE HNA KETR JËNE RADIO
Hnene la itre hlue i Iehova hna nyiqane fejane la itre itusi angatr. Ame hë enehila, angatr ha huliwan la ketre aqane cainöj ka hnyipixe, ene la troa cainöj jëne radio. Ame lo sabath hnaipajö ne 26 Eiperem 1922, hnei trejin Rutherford hna nyiqane ithanata ngöne la radio. Kolo petre hi lai a nyiqane xejë la huliwa cili. Hnei nyidrë hna cile fë la cainöj hna hape, “Des millions de personnes actuellement vivantes ne mourront jamais” ngöne lo radio KOG e Los Angeles (Etazini).
Ma traqa jë kö koi 25 000 lao atr ka dreng la cainöj ngöne radio. Nyimutre catre mina fe la itre ka cinyanyi troa qaja la madrine i angatr koi Trejin Rutherford. Ame hi lai ketre ke, Willard Ashford, ka mele e Santa Ana, e Californie. Nyidrëti a olene koi trejin Rutherford la hna cile fë la cainöj “ka iahlë me ka ithuecatr.” Öni nyidrë: “Eloine pe, hetre radio, ke maine ju, tha tro kö eahuni a hane drenge la cainöj, ke köni ka wezipo e celë hnalapa.”
Ame hë lo wiike thupen, hna cile fë la itre xaa cainöj ngöne radio. Ame hë lo pune la macatre, kola mekune hnene la Ita Ne Thup ka hape, “ma 300 000 jë kö lao atr ka drenge la itre cainöj hna tro fë jëne radio.”
Ame hë la kola drenge lai hnene la Itretre Ini Tusi Hmitrötr, ke celë hi ka thuecatr koi angatr troa xupe e Staten Island, la ketre hnë amë la station radio. Nge tha nanyi kö qa ngöne la Bethela e Brooklyn. Celë hi lai WBBR hna huliwane hnene la Itretre Ini Tusi Hmitrötr, matre troa haöth la itre xaa götrane hnene la maca ne la Baselaia.
“ADV”
Ame ngöne la Ita Ne Thup ne 15 Juun 1922, hna ithuemacanyine ka hape, ame e 5 koi 13 Semitrepa 1922 troa kuca la ketre asabele katru e Cedar Point (Ohio). Tru catre la madrine ne la Itretre Ini Tusi Hmitrötr ka tro Cedar Point.
Ngöne la pane cainöje i trejin Rutherford, öni nyidrë kowe la atrene la icasikeu: “Xecie hnyawa koi ni laka, tro Joxu a . . . amanathithine la asabele celë, nge tro fe lai a ketr la fene hnengödrai.” Nge hnene asë hi la itre ka cile fë cainöj hna ithuecatr matre troa catre cainöjëne la maca ka loi.
Itre atrene la asabele ne 1922 e Cedar Point (Ohio)
Ame hë lo Draikatru 8 Semitrepa, traqa koi 8 000 lao atr ka traqa troa drenge la cainöje i trejin Rutherford. Aja i angatr tro trejin Rutherford a qaja la aliene lai hna hape, “ADV,” hna makëne ngöne la pepa ne ihë. Ame hë la angatr a isa lapa göhnen, ma öhne hi angatr la ketre imaano hna ewath acon, nge ka thip hun la ita ne cainöj. Ame trejin Arthur Claus, ke angeic a traqa qa Tulsa e Oklahoma. Ka lolo hnyawa la göhne i angeic, ke drenge hnyawa hi angeic la itre cainöj. Ame pena la ejolen ekö ke, pëkö système de sonorisation ka tune enehila, ka aijijë së troa drenge hnyawa la itre cainöj.
“Ka lolo catre la cainöj”
Ame hë lo kola nyiqan, hna qaja hnene la ciaman ka hape, ame la itre ka traqa hmitr, ke tha tro kö angatr a lö hnine la icasikeu ngöne la kola cainöj hnei trejin Rutherford. Ame hë lo 9h30, hnei trejin Rutherford hna pane amexeje lo itre trengewekë i Iesu ngöne Mataio 4:17 ka hape: “Calemi hë la Baselaia ne hnengödrai.” Ame hë la nyidrë a nyiqane qaja la aqane tro la itre atr a drenge la maca ne la Baselaia, öni nyidrëti jë hi: “Hnei Iesu hna qaja ka hape, ame ngöne la ijine nyidrëti hë la, tro nyidrë a menuëne la itre atre i nyidrë: tro nyidrëti a acasine la itre ka nyipici me mele nyipici.”
Öni trejin Arthur Claus: “Ka lolo catre la cainöj.” Ngazo pe, hna traqa la mec koi Arthur, ene pe trotrije pi angeic la icasikeu. Ngo, tha aja i angeice kö, ke atre hi angeic ka hape, tha ijiji angeic hmaca kö e drëhe troa bëeke hmaca.
Thupene la itre menetr, loi hmaca angeic. Ame ju hi la angeic a mekun troa bëek, drenge ju hi angeic la kola xexe. Öni angeic, “Pi tro hë ni e cili a goeën!” Mekune jë hi angeic troa elë hun la uma, matre troa drenge me goeëne lai cainöj qa koho. Traqa koi 23 lao macatre i trejine Claus la ijine cili. Matre hnei angeic hna thele la ketre aqane troa elë hune la uma! Ame hë la angeic a traqa e koho, angeic a öhne laka, “drenge hnyawa hi angeic la cainöj.”
Ngo ame la Arthur a traqa e koho, ce angeic hë memine la itre xaa sinee i angeic. Ame hi lai ketre ke, Frank Johnson. Nge hnei Franck hna canga nyenyap koi Arthur me hape: “Pëkö hele i eö ka idrei?”
“Öö, hane hi la,” öni Arthur.
Öni Frank, “Ase hë sa la itre thithi eahun. Öhne i eö caha imaano? Hna jei faone lai. Ngo drenge hnyawa ju la hna qaja hnene la Atre Amekötin.a Ame e drëhe la nyidrëti qaja ka hape: ‘Catre jë cainöj, cainöjëne jë,’ thupa pi hë lo lai hna hnöth.”
Arthur me itre sine lapa i angeic a nango itreqe me sine hele. Easenyi hë tro trejin Rutherford a traqa kowe lo ijine hna sa. Hnene laka, tru palaha la trenge madrine i trejin Rutherford, hnei nyidrëti jë hna suen ka hape: “Loi e tro sa itre Temoë ka mele nyipici koi Joxu. Catre jë së uti hë la troa lepe apatrenyi Babulona. Catre jë së qaja la maca. Loi e tro la fene hnengödrai a atre ka hape, Iehova la Akötresie, nge Iesu Keriso la Tane la itre ka mus, nge Joxu ne la itre joxu. Ijine hi la ka sisitria. Ase hë acile la Joxu së! Haawe, catre jë cainöj, cainöjëne jë, cainöjëne jë ka hape, ase hë acile la Joxu së ngöne la Baselaia!”
Öni Arthur ka hape, hnei angatr e cili hna thupa la itre eno, ame hna aca mama pi la itre hna makëne ngöne la maano. Mama ha la aliene la hna hape, “ADV” (ngöne la qene Papale ke “advertise” kola hape, “cainöjëne jë”). Hna makëne ka hape: “Cainöjëne Jë La Joxu Me Baselaia.”
KETRE HULIWA KA TRU
Hnene la asabele ne Cedar Point hna xatuane la itre trejin, troa catre cainöjëne la maca ne la Baselaia. Nge ame la itre ka pi sine la ihë cili, ke tru la madrine troa kepe angatr. Önine jë hi la ketre colporteur (lo hna hëne enehila ka hape, pionie) ne Oklahoma (Etazini) ka hape: “Ame la götrane hne huni hna cainöj, ke ej ngöne la götrane ka si charbon, nge ka pëkö mani la itre atr e cili.” Öni nyidrëti ka hape, ame la itre atr a kapa la zonal l’Âge d’Or, “angatr a treij.” Öni nyidrëti hmaca jë hi: “Madrine catr eahun troa akeukawanyi angatr.”
Trotrohnine hi la Itretre Ka Ini Tusi Hmitrötr la enyipiewekëne la itre trengewekë i Iesu ngöne Luka 10:2, kola hape: “Tru catre la nyine menuën, ngo xalaithe hi la itretre menu.” Ame hë ngöne lo pune la macatre, angatr a isa nue trengecatre matre troa cainöjëne la maca ne la Baselaia.
a Hna lapa hë trejin Rutherford ka hape, “Atre Amekötine” pine laka, ketre atre iameköti nyidrëti ekö e Missouri (Etazini).