1 | Thith—“Nu Asë Pi Koi Nyidrë La Itre Hnei Nyipunieti Hna Hnehengazon”

ÖNI TUSI HMITRÖTR: “Nu asë pi koi [Akötresie] la itre hnei nyipunieti hna hnehengazon, ke nyidrëti a meku nyipunie.”—1 PETERU 5:7.

Alien

Aja i Iehova tro sa qaja koi Nyidrë la itre jol hne së hna lapa fë e kuhu hni së. (Salamo 55:22) Ngacama ka co ju hë maine ka tru la jol hne së hna melën, ngo loi e tro sa thele ixatua jëne la thith. Iehova a nyipiewekën la itre hnei easë hna hnehengazon. Maine easa ajane troa tingetinge la hni së, ke loi e tro sa thith.—Filipi 4:6, 7.

Aqane Troa Xatua Së

Ame la kola tithi së hnene la ketre mec ka ajolëne la mekuna së, ke kösë easë casi pe hi. Nge tha trotrohni së kö hnene la itre sinee i easë. (Ite Edomë 14:10) Ngo, ame la easa fe la hni së koi Akötresie, easa öhne laka, Nyidrëti a drei së me trotrohni së. Öhne hi Iehova la hne së hna melën, la itre akötre së, me itre jol hne së hna cile kow, matre Nyidrë a upi së troa qaja asë koi Nyidrë ngöne la thith.—2 Aqane lapa ite joxu 6:29, 30.

Ame la easa thith koi Iehova, kola acatrene la mejiune së laka, Nyidrëti a hnehengazo së. Casi hi la mekuna së memine la atre cinyihane la Salamo, ka hape: “Hnei nyipëti hna öhne la akötreng ; trotrohnine kö nyipëti la meleng ngöne la nöjei iakötrë.” (Salamo 31:7, MN) Kola xatua së la easa atre laka, Iehova a akötr la easa cile kowe la itre jol. Tha Nyidrëti hmekuje kö a akötr, ngo Nyidrëti fe a xatua së me akeukawanyi së jëne la Tusi Hmitrötr.

Ixatua Ne La Tusi Hmitrötr Julian

Thangane La Hnenge Hna Hnehengazo Menu

“Hna tithi ni hnene la lue mec hna hape, troubles anxieux me trouble obsessionnel compulsif (TOC). Traqa pi kö la ijine eni a meci ne xou. Maine ka loi hi ni enehila, ngo tha qea ju kö, kola traqa koi ni la xou me hnehengazo menu. Nge the qaja palaha la kola tiqa hnei atr. Eni a xouene la hna troa qaja hnei itre xan.

“Tru la hna xatua ni hnene la itre sineeng ka atre hnyawa la mecing. Ngo ame itre xaa ijin, tha kapa kö ni la hnei angatr hna qaja. Ame pe, eni a olene la ixatua i angatr.

“Jole catre koi ni troa thith ngöne la ijine kola traqa koi ni la xou me itre TOC. Nyipiewekë tro ni a nue trengecatr matre troa ithanata koi Iehova ngöne la thith. Ame itre xaa ijin, kola jole la heng, ke tru palaha la itre mekun. Nge, ame e cili, thatreine hë ni qaja la ka ej e kuhu hning.”

Aqane Xatua Ni Hnei Tusi Hmitrötr

“Hnenge hna inin e hnine la Tusi Hmitrötr laka, tha nyipiewekë kö troa qea maine eköthe hnyawan la itre thithi së, matre tro Iehova a kapa. Maine thatreine kö ni qaja asë la aliene hning koi Iehova, ke eni hi a qaja koi Nyidrë ka hape: ‘Iehova fe, epi xatua ni hnei Nyipë.’ Ngacama tha ka qea kö, drenge hi ni ka hape, Nyidrëti a trotrohni ni me sa la thithing. Ketre, hnenge fe hna thele ixatua thene la itre droketre. Madrine catre ni, ke jëne la lue ixatua cili, nango loi hë ni. Hetre eloine la troa nue trengecatr matre easenyine la Keme së me kapa la ixatua qaathei Nyidrë.”