2 | ‘Iakeukawany Qa Hnine La Tusi Hmitrötr’

ÖNI TUSI HMITRÖTR: “Ame la nöjei ewekë hna cinyihan ekö, tre hna cinyihan göi troa ini së. Matre, jëne la hne së hna cile huti memine la iakeukawanyi qa hnine la itre hna cinyihan, hetre mejiune së hë.”—ROMA 15:4.

Alien

Ej e hnine la Tusi Hmitrötr la itre mekun ka akeukawanyi së me xatua së troa lepetrije la itre mekun ka ngazo. Kolo fe a hamë mejiune koi së laka, easenyi hë troa apatrene paluane la itre mekun ka akötrëne la mele i easë.

Aqane Troa Xatua Së

Hna hane fe traqa koi së asë la itre ijine hleuhleu me latresi. Ngo ame kö la itre ka dépression maine ka troubles anxieux, ke angatr a melëne lai e nöjei drai, nge tha ka hmaloi kö. Tro la Tusi Hmitrötr a xatua angatr tune kaa?

Tusi Hmitrötr a hamëne la itre mekune ka lolo matre troa nyihnane la itre mekun ka ngazo. (Filipi 4:8) Eje fe a nyialiene la he së hnene la itre mekun ka iakeukawany me ka ithuecatr matre xatua së troa xomihnine la itre akötre së.—Salamo 94:18, 19.
Tusi Hmitrötr a xatua së matre tha tro kö sa mekun ka hape, pëkö ca eloi easë.—Luka 12:6, 7.
Nyimutre la itre xötr ngöne la Tusi Hmitrötr ka amamane ka hape, tha easë casi kö, nge trotrohni së hi hnei Akötresie, lo Atre Xupi së.—Salamo 34:18; 1 Ioane 3:19, 20.
Öni Tusi Hmitrötr, tro kö Akötresieti a apatrene la itre mekun ka ajolë së enehila. (Isaia 65:17; Hna Amaman 21:4) Tro lai a xatua së la kola ngazo la itre mekune me itre aliene hni së.

Ixatua Ne La Tusi Hmitrötr Jessica

Aqane Melëne Ni La Dépression

“Ame lo kola 25 lao macatreng, hna traqa koi ni la mec matre hnene la itre droketre hna öhne ka hape, eni a nyiqane dépression. Eni hmaca a mekune lo itre ewekë ka akötrë ni ekö lo eni a co. Matre itre droketre a qaja ka hape, celë hi lai ka axulune la dépression theng. Ketre, hnenge hna xomi drösinöe me wai psychologue matre xatua ni troa atre hnyawa la pengöne lai mec me aqane troa nyinyine ej.”

Aqane Xatua Ni Hnei Tusi Hmitrötr

“Ame la kola catrehnine la dépression, ke kola traqa koi ni la xou me hnehengazo, nge tha meköle hë ni e jidr, ke kola traqa itrai la itre mekun ka axounyi ni. Tune la hna qaja ngöne Salamo 94:19, ame la kola traqa la nyimu mekun, Akötresieti a akeukawan me aupune la hni së. Celë hi matre, hnenge hna amë ezine la iling la Tusi Hmitrötr me neköi carnet hnenge hna sija la itre xötr ka ithuecatr. Maine thatreine kö ni meköl, eni a e la itre xötr ne la Tusi Hmitrötr matre troa akeukawanyi ni hnene la itre mekuna i Akötresie.

“Tusi Hmitrötr a ithuecatre koi së troa lepetrij la itre mekun ka isazikeu memine la mekuna i Akötresie. Ame ekö, hnenge palahi hna wangaconyi ni, nge ame koi ni pëkö ka hnimi ni. Hnenge hna trotrohnin e thupene laka, itre mekune lai ka tha ihmeku kö memine la itre ini hna hamëne hnei Tusi Hmitrötr. Tusi Hmitrötr a ini së ka hape, ceitu Akötresie me ketre Kem ka ihnim nge ka meku së isa ala cas. Hnenge hna inine troa musinëne la itre mekunang hune la troa nue itre ej troa musinë ni. Nge hnenge mina fe hna inine troa goeë ni tune la aqane goeë ni hnei Akötresie. Celë hi ka xatua ni troa nuetrij la aqane waiewekëng ka ngazo ekö.

“Eni a lapa treqene la ijine tro ha patre la itre mekun ka akötrë së. Atre hi ni laka, ame elany tro ha patre la itre mec ngöne la he së. Celë hi ka xatua ni troa cile catr enehila, me lapa mekun la meleng elany laka, pëhë mecing.”