Aqane Troa Acatrene La Lapaune Së Kowe La Fene Ka Hnyipixe

1-2. Nemene la nyine tro sa kuca qëmekene troa traqa la fene ka hnyipixe?

ASE hë Iehova thingehnaeane ka hape, troa nyihnane la fene celë hnene la fene ka hnyipixe. (2 Pet. 3:13) Ka tru koi së la hna thingehnaeane cili. Thatre kö së la ijine troa acile la fene ka hnyipixe, ame pe, kola amamane hnene la itre ewekë ka traqa enehila ka hape, easenyi catre hë.​—Mat. 24:32-34, 36; Itre hu. 1:7.

² Ka hekö ju hë easë nyihlue i Iehova, ngo loi e tro palahi sa acatrene la lapaune së kowe la hna thingehnaeane cili. Pine nemen? Pine laka, ijije hi troa ae la lapaun së. Hnei Paulo hna qaja la atr ka pë lapaun ceitu me “ngazo ka canga ajolë së.” (Heb. 12:1) Troa catr la lapaune së, e hne së palahi hna sine ajuine la itre ewekë ka anyipicine ka hape, cahmijë hë la fene ka hnyipixe.​—Heb. 11:1.

3. Nemene la hne së hna troa ce wang ngöne la tane mekune celë?

³ Ame ngöne la tane mekune celë, tro sa ce wang la köni aqane tro sa acatrene la lapaune së kowe la hna thingehnaeane hnei Iehova, ene la fen ka hnyipixe: (1) Troa mekune ajuine la thupene mel, (2) Troa mekune ajuine la mene i Iehova, nge (3) Troa catre huliwa i Iehova. Ketre, tro fe sa ce wang la aqane troa acatrene la lapaune së hnene la maca i Iehova koi Habakuka. Ngo tro sa pane nyiqane ithanatane la itre ewekë ka traqa koi së enehila, nge ka uku së troa acatrene la lapaune së kowe fene ka hnyipixe.

ITRE IJINE TRO SA CATRE LAPAUN

4. Nemene la itre mekune hnei easë hna axeciën e nöjei drai, nge pine nemene matre loi e troa catr la lapaune së?

⁴ Ame e nöjei drai, easa axecië mekun. Easa iëne la itre atr hne së hna nyisineen, me itre nyine iamadrinë, me huliwa maine ini hne së hna troa kuca. Nge hetre mekune fe hne së hna xome ngöne la mele ne trefën, me koi itre nekönatr. Tro së lai a axecië mekune hnyawa, e ka catre la lapaune së. Matre, loi e tro sa isa hnying ka hape: ‘Mama kö ngöne la aqane melenge ka hape, easenyi catre hë troa nyihnane la fene celë hnene la fen ka hnyipixe? Maine hna ajojezi ni pena hnene la itre atr ka mekun ka hape, meci la pun kowe la itre atr?’ (Mat. 6:19, 20; Luka 12:16-21) Tro së lai a atreine axecië mekun hnyawa, e ka xecie koi së ka hape, easenyi catre hë la fene ka hnyipixe.

5-6. Pine nemene matre loi e troa catr la lapaune së? Qaja jë la ketre ceitun.

⁵ Loi e troa catre la lapaune së ngöne la easa cile kowe la itre itupath. Pine nemen? Pine laka, ijije hi tro la iaxösisi, me itre sine kucakuca, me itre xaa itupath ju kö a thapa la madrine së. Ma ame jë lo xötrei ke, easa cile catr. Ngo e qea palaha, ke loi e tro sa catr lapaun, matre tro palahi a nyihlue i Iehova cememine la madrin.​—Rom. 12:12; 1 Pet. 1:6, 7.

⁶ Ame e hnine la itupath, ke canga tro hi sa mekun ka hape, tha tro kö a traqa la fene ka hnyipixe. Hapeu, kolo kö lai a hape, pëkö lapaune së? Waea. Hane hi la ketre ceitun. Ame la kola catrehnine la hnötr, ke canga tro hi sa mekune ka hape, tha tro kö a traqa la ijine hedredrei. Ngo traqa pi kö la ijine hedredrei. Ceitune hi lai memine la easë e hnine la itupath, tha nyipi mama ha koi së la fene ka hnyipixe. Ngo e ka catr la lapaune së, xecie koi së ka hape, tro kö a eatr la itre hna thingehnaean hnei Akötresie. (Sal. 94:3, 14, 15; Heb. 6:17-19) Celë hi lai ka troa uku së troa amë panë Iehova ngöne la mele së.

7. Nemen la hna mekun hnei itre xan, nge nemen la nyine tro sa hmekën?

⁷ Nyipiewekë tro sa acatrene la lapaune së matre troa catre cainöj. Tru hnei ka mekune ka hape, tha ka nyipici kö la maca ka loi hne së hna tro fë. (Mat. 24:14; Ezek. 33:32) E tha hmeke kö së, ke tro ha löthi së hnene la itre mekuna i angatr. Celë hi matre, loi e tro palahi sa acatrene catrëne la lapaune së. Tro sa ce wang la köni ewekë ka troa xatua së ngöne la götrane cili.

TROA MEKUNE AJUINE LA THUPENE MEL

8-9. Hnauëne laka, kola acatrene la lapaune së, la easa mekune ajuine la thupene mel?

⁸ Ame la pane ewekë ka troa acatrene la lapaune së, ke ene la troa mekune ajuine la thupene mel. Thupene mel la ka anyipicine ka hape, tro ha eatr la itre hna thingehnaeane hnei Akötresie. Maine tro sa mekun ajuine la kepin matre hna hamëne la thupene mel, memine la thangane koi së, ke tro ha catrecatre la lapaune së kowe la mele ka lolo ngöne la fene ka hnyipixe. Hnauëne la easa qaja lai?

⁹ Pane mekune jë la aliene la thupene mel. Hnei Iehova hna upe la nekö hnimina i Nyidrë ka cas, lo ka ce mele me Nyidrë qan ekö, matre troa mel e celë fen. Ame lo Iesu e celë fen, hnei nyidrëti hna cile kowe la nöjei pengöne itupath. Hna axösisi nyidrë utihë la kola humuthi nyidrë. Hane hi la hatrene ihnim ka tru i Iehova! Eje hi, tha tro kö Iehova lai a nue troa axösisine me humuthe la nekö i Nyidrë, matre tro hi a hohopatre la ijine mele ne la itre atr. (Ioane 3:16; 1 Pet. 1:18, 19) Pine laka, hnei Iehova hna hamë së la thupene mel, haawe tro fe Nyidrëti lai a hane aijijë së troa mele utihë epine palua ngöne la fene ka hnyipixe.

TROA MEKUNE AJUINE LA MENE I IEHOVA

10. Thenge la Efeso 3:20, nemene la hna atreine kuca hnei Iehova?

¹⁰ Ame la hnaaluene ewekë ka troa acatrene la lapaune së, ke ene la tro sa mekune ajuine la mene i Iehova. Atreine hi Nyidrëti eatrëne asë la itre hnei Nyidrëti hna thingehnaean. Jole kowe la itre atr troa mekun ka hape, troa hetre mele ka pë pun me fene ka hnyipixe elany. Pine nemen? Pine laka, pëkö emenene la itre atr troa eatrëne la itre hnei Iehova hna thingehnaean. Eje hi, Iehova la Akötresie ka Tru Trenge Men. (Iobu 42:2; Mar. 10:27) Celë hi matre, nyine haine la itre hnei Nyidrëti hna thingehnaean!​—E jë la Efeso 3:20.

11. Qaja jë la ketre hna thingehnaeane hnei Iehova. (Wange ju la hna eköhagen “Itre Xaa Hna Thingehnaeane Ka Eatr.”)

¹¹ Pane mekune jë la itre hna thingehnaeane ekö hnei Iehova laka ame koi së, tha tro fe kö a eatr. Hnei Iehova lo hna qaja koi Aberahama me Sara ka hape, troa hetre nekö i nyidro ngacama qatr hë nyidro. (Gen. 17:15-17) Hnei Nyidrëti fe hna qaja koi Aberahama ka hape, tro la itre matra i angeic a lapane la nöj e Kanana. Nyipici laka, hna pane thahluëne la nöje i Iehova e Aigupito, matre kösë tha tro kö eatr lo hna thingehnaean. Ngo hna eatre ju kö. Ketre, hnei Iehova hna thingehnaeane koi Elisabeth ka hape, tro eahlo a hnaho, ngacama qatre föe hë eahlo. Nge, öni Nyidrëti fe koi Maria ka hape, tro angeic a hnahone la nekö i Nyidrë, ngacama nyipi jajinyi palakö angeic. Kolo fe lai a eatrëne lo hna thingehnaeane hnei Iehova ekö e Edrena laka, tro la nekö i Nyidrë a traqa e celë fen!​—Gen. 3:15.

12. Nemene la hna ini së hnene la tusi Iosua 23:14 me Isaia 55:10, 11 göne la mene i Iehova?

¹² Ame la easa mekune ajuine la itre hna thingehnaeane hnei Iehova memine la aqane eatr itre ej, easë a haine la mene i Nyidrë. Nge kolo fe a acatrene la lapaune së laka, tro sa mele elany ngöne la fene ka hnyipixe. (E jë la Iosua 23:14; Isaia 55:10, 11.) Ketre, ijiji easë hë troa xatuane la itre atr troa hane mejiune kowe la mel elany ngöne la fene ka hnyipixe. Öni Iehova göne la hnengödrai me fene ka hnyipixe ka hape: “Nyine mejiune kow, nge ka nyipici la itre trengewekë celë.”​—Hna ama. 21:1, 5.

CATRE JË HULIWA I IEHOVA

13. Tune kaa la aqane tro la itre icasikeu a acatrene la lapaune së? Qejepengöne jë.

¹³ Ame la hnaakönine ewekë ka troa acatrene la lapaune së, ke ene la tro sa catre huliwa i Iehova. Pane mekune jë la itre eloine hne së hna kapa qa ngöne la itre icasikeu. Öni Anna, ketre trejine föe ka catre huliwa i Iehova drai ka pexej ka hape: “Itre icasikeu a acatrene la lapauneng. Ame itre xaa ijin, tha ka maca kö la trejine troa cile fë hnëqa, nge casi palahi la itre ini hna hamën, ngo ame pe, kola xatua ni troa trotrohnine hnyawa la itre xaa ini qaathei Iehova. Nge celë hi ka acatrene la lapauneng.”b Nge the qaja palaha la itre mekune hna hamëne hnene la itre trejin. Tha kolo kö lai a acatrene la lapaune së?​—Rom. 1:11, 12; 10:17.

14. Tro la huliwa ne cainöj a acatrene tune kaa la lapaune së?

¹⁴ Kolo fe a acatrene la lapaune së hnene la huliwa ne cainöj. (Heb. 10:23) Traqa koi 70 hë lao macatre ne nyihlue i Iehova hnei Barbara. Öni eahlo: “Hnenge hna öhne laka, kola acatrene la lapauneng hnene la huliwa ne cainöj. Ame la eni a qaja koi itre xan la itre hna thingehnaeane hnei Iehova, kola catrecatre la lapauneng.”

15. Tro la ini Tusi cas a acatrene tune kaa la lapaune së? (Wange ju la iatr.)

¹⁵ Kolo fe a acatrene la lapaune së la easa ini Tusi cas. Nyipiewekë koi Susan troa hetre porogaram ne ini Tusi cas. Öni angeic: “Ame e sabath, eni a hnëkëne la Ita Ne Thup koi wiik ka troa xulu. Ame e lundi me mardi, eni a hnëkëne la icasikeu ne la wiik. Nge ame pë hë ngöne la itre xaa drai, eni a ithel göne la ketre mekun.” Hnei Susan hna trongëne hnyawa la porogaram i angeic, matre kolo palahi a acatrene la lapaune i angeic. Ame pena la ka xatua Irène, ketre trejine föe ka huliwa qane ekö ngöne la hnalapa ne xomi meköt, ke ene la troa sine thele la itre hna perofetan. Öni eahlo: “Nyine haine la aqane eatr hnyawa la itre hna perofetan.”c

“TRO KÖ EJ A TRAQA”

16. Hnauëne laka thatraqai easë fe la hnei Iehova hna qaja koi Habakuka? (Heberu 10:36, 37)

¹⁶ Ekö hë la itre xaa hlue i Iehova treqene la fene ka hnyipixe. Ame koi easë, ke hmitre catr troa eatrëne la hna thingehnaean hnei Iehova. Atre hi Iehova la ka ej e kuhu hni së, matre öni Nyidrë koi Habakuka: “Thatraqane la ijine hna sa la amaman, nge tro ej’ a ewekë ngöne la pun, nge tha tro kö a thoi ; ngacama hmit’ ej, teqene kö ej ; ke tro kö ej’ a traqa, nge tha tro kö a hmit.” (Hab. 2:3) Hapeu, thatraqai Habakuka hmekuje hi la hna perofetane celë, maine thatraqai së fe? Jëne la ixatua i Iehova, hnei Paulo hna ce thawa la hna perofetane cili, matre troa ithuecatre kowe la itre keresiano ka lapa treqene la fene ka hnyipixe. (E jë la Heberu 10:36, 37.) Ngacama hmitr koi së troa eatr la hna thingehnaeane hnei Iehova, ngo xecie koi së laka, “tro kö ej’ a traqa, nge tha tro kö a hmit!”

17. Hnene la ketre trejine föe hna trongëne tune kaa la eamo i Iehova koi Habakuka?

¹⁷ Alanyim la itre hlue i Iehova ka trongëne la eamo i Nyidrë laka, ‘troa itreqe hnyawa.’ Ame la itre xan, ke ekö hë angatr itreqe. Tui Louise, ketre trejin föe ka nyihlue i Iehova qane lo macatre 1939. Öni eahlo: “Eni a mekun ekö ka hape, tro Amagedro a traqa lo eni a ini e lycée. Ngazo pe, tha traqa ju kö. Ame la ka xatua ni, ke ene la troa e lo itre hneng hna hëne ka hape, ‘itre tulu ne itreqe’. Tui Noa, Aberahama, Iosefa, me itre xane ju kö. Hnei angatr hna pane itreqe qëmekene troa kapa la itre hnei Iehova hna thingehnaeane koi angatr. Ame la troa itreqe, ke celë hi ka xatua ni troa acatrene la lapauneng laka, easenyi hë troa traqa la fene ka hnyipixe.” Casi hi la mekuna i Louise memine la itre trejin ka nyihlue i Iehova qan ekö!

18. Tro la itre ewekë xötreithi së a acatrene tune kaa la lapaune së kowe la hnei Iehova hna thingehnaeane, göne la fene ka hnyipixe?

¹⁸ Nyipici, tha easë palakö ngöne la fen ka hnyipixe. Ngo pane mekune jë la itre ewekë ka lapa xötreithi së, tune la itre wëtresij, itre sinöe, itre öni, me itre atr. Itre ewekë lai hne së hna öhne enehila ngacama ame ekö, patre palakö itre ej. Ngo ame la hetrenyi pi, ke hnei Iehova hna xup itre ej. (Gen. 1:1, 26, 27) Aja i Iehova fe troa acile la fene ka hnyipixe, nge e cili, pëhë sine mec, nge tro sa mele uti hë epine palua. Tro kö Iehova lai a eatrëne la aja i Nyidrë! Eje hi, ngöne la ijine hnei Nyidrëti hna sa, tro kö a ej la fene ka hnyipixe.​—Is. 65:17; Hna ama. 21:3, 4.

19. Tro epuni a acatrene tune kaa la lapaune i epun?

¹⁹ Qëmekene troa traqa la fene ka hnyipixe, acatrene jë la lapaune i epun. Akökötrene jë la ole i epun kowe la thupene mel. Mekun ajuine jë la mene i Iehova. Nge catre jë fe huliwa i Iehova. E cili, tro fe epuni a tune “lo itre ka kapa la hna thingehnaean, ke hnei angatre hna lapaun me xomihni.”​—Heb. 6:11, 12; Rom. 5:5.