Akökötrene Jë La Ihnimi Epun

1. Nemene la itre ini hnei epuni hna öhn, la epuni a nyiqane ini Tusi Hmitrötr?

MEKUNE palahi epuni lo epuni a nyiqane inine la Tusi Hmitrötr? Drei jë kö la madrine i epun, troa atre la ëje i Akötresie, me inine ka hape, tha Nyidrëti kö a dreuthe la itre atr ngöne la ifereno. Nge tune kaa la epuni a atre laka, tro epuni a iöhnyi hmaca memine la itre sinee i epuni ka mec, me ce mel me angatr ngöne la fen hna aparadraison?

2. Nemene la itre xaa ewekë hnei epuni hna kuca la epuni a ini Tus? (Efeso 5:1, 2)

² Qaane lo epuni a nyiqane ini Tusi Hmitrötr, kolo ha kökötre trootro la ihnimi epuni koi Iehova. Celë hi ka uku epuni troa trongëne la itre ini hnei epuni hna kapa. Epuni ha axecië mekun thenge la itre trepene meköti Akötresie. Nge lolo hë la itre thiina me aqane ujë i epun, ke epuni a ajan troa amadrinë Akötresie. Tune la nekönatr a nyitipune la kem me thine i nyën hnei nyën hna hnim, epuni a nyitipune la Keme i epun e hnengödrai.—E jë la Efeso 5:1, 2.

3. Nemene la itre hnying nyine tro sa isa hnyingën?

³ Loi e tro sa isa hnying ka hape: ‘Ka tru kö la ihniming koi Iehova enehila, hune lo eni a xomi bapataiso? Nge tune kaa la thiinang, eni kö a nyitipu Iehova me hnime la itre trejin? Maine epuni a öhne ka hape, “patre hë lo ihnimi [epuni] hnapan” ke the kucakuca kö. Celë fe hi lai ka traqa kowe la itre pane keresiano. Tha hnei Iesu kö hna nuetriji angatr, matre tha tro kö nyidrëti lai a nuetriji së. (Hna ama. 2:4, 7) Atre hi nyidrë laka, ijije hi tro sa acatrene hmaca lo ihnimi easë hnapan.

4. Nemene la hne së hna troa ce wang ngöne la tane mekune celë?

⁴ Ame ngöne la tane mekune celë, tro sa ce wange la aqane tro sa akökötrene la ihnimi së koi Iehova me koi itre xan. Nge tro fe sa ce wange la itre manathithi hne së me itre xan hna troa kapa, e tro sa amamane la ihnimi easë.

AKÖKÖTRENE JË LA IHNIMI EPUNI KOI IEHOVA

5-6. Nemene la itre jol hnei Paulo hna cile kow, nge nemene la ka xatua angeic troa catre huliwa i Iehova?

⁵ Ngacama madrine catre Paulo troa huliwa i Iehova, ngo tru la itre jol hnei angeic hna cile kow. Hnei Paulo ekö hna trongëne la itre gojenyi ka nany, ngacama tha ka hmaloi kö. Ame ngöne la itre ijine cili, anyimua qëmeke jë kö angeic kowe la mec “pine la itre hneopegejë, me itre atrekënö.” Goi qanangazo angeic fe hnene la itre ithupëjia. (2 Kor. 11:23-27) Nge ame pena la itre xaa trejin, ke pëkö hni ne ole i angatr kowe la itre trengecatr hnei Paulo hna nu matre xatua angatr.—2 Kor. 10:10; Fil. 4:15.

⁶ Nemene la ka xatua Paulo troa catre huliwa i Iehova? Hnei Paulo hna thele troa atre hnyawa la pengöi Iehova, jëne la Itre Hna Cinyihan, me jëne la itre hnei angeic hna melën. Hnei Paulo hna öhn e cili laka, tru la ihnimi Iehova koi angeic. (Rom. 8:38, 39; Efe. 2:4, 5) Nge celë hi ka akökötrene la ihnimi angeic koi Nyidrë. Hnei Paulo hna amamane la ihnimi angeic koi Iehova, jëne la aqane “huliwa i [angeic] ekö me enehila kowe la ange ka hmitrötr.”—Heb. 6:10.

7. Nemene la ketre aqane tro sa akökötrene la ihnimi së koi Iehova?

⁷ Ijije hi tro sa akökötrene la ihnimi easë koi Akötresie, e tro sa inine ajuine la Tusi Hmitrötr. Ame la epuni a e Tusi Hmitrötr, thele jë la thiina i Iehova ka mama ngöne la xötr. Isa hnyinge jë ka hape: ‘Nemene la ka amamane ngöne la hna melëne celë, laka tru la ihnimi Iehova koi ni? Nge nemene la ka upi ni troa hnimi Nyidrë?’

8. Pine nemene matre kola akökötrene la ihnimi së koi Iehova, hnene la thith?

⁸ Ame la ketre aqane tro sa akökötrene la ihnimi së koi Iehova, ke ene la tro sa thithi koi Nyidrë e nöjei drai. (Sal. 25:4, 5) E cili, Nyidrëti a sa la itre thithi së. (1 Ioane 3:21, 22) Öni Khanh, ketre trejine föe qa Asie, ka hape: “Hnenge hna nyiqane hnimi Iehova lo eni a atre Nyidrë, ngo hna kökötre catre la ihniminge koi Nyidrë la Nyidrëti a sa la itre thithing. Celë hi ka uku ni troa amadrinë Nyidrë.”b

AKÖKÖTRENE JË LA IHNIMI EPUNI KOI ITRE XAN

9. Nemene la ka amamane ka hape, kolo palahi a kökötr la hnimi Timoteo kowe la itre trejin?

⁹ Itre macatre thupene la Paulo a xome la hmi keresiano, hnei nyidrëti hna atre la ketre nekötrahmany ka lolo thiina, Timoteo la ëjen. Tru la ihnimi Timoteo koi Iehova, me kowe la itre atr. Öni Paulo kowe la angetre Filipi: “Pëkö ketre atr thei eni ka tui [Timoteo] ke angeic a hnehengazo nyipunie.” (Fil. 2:20) Tha Paulo kö e celë a haine la aqane thupëne Timoteo la ekalesia maine cile fë cainöj, ngo ene la aqane hnime angeic la itre trejin. Tha luelue kö së laka, tru la madrin ne la itre trejin la Timoteo a wange la ekalesia i angatr.—1 Kor. 4:17.

10. Hnei Anna me föi angeic hna amamane tune kaa la ihnimi nyidro kowe la itre trejin?

¹⁰ Ketre tu së fe, easa thele la itre aqane troa xatuane la itre trejin me easë. (Heb. 13:16) Tro sa ce wange la hna melëne hnei Anna, kolo trejine hna qaja ha ngöne lo ketre tane mekun. Thupene la ketre wene atraqatr, hnei Anna me föi angeic hna tro troa wange la ketre fami ne Temoë Iehova. Hnei nyidroti hna öhne laka, hna feje la hune uma i angatr matre ka dro asë hi la itre iheetre i angatr. Öni Anna: “Hnei nyio hna xom la itre iheetre i angatr matre troa wasin, me aeanin, me sa. Tha ka tru kö la hnei nyio hna kuca, ngo ame pe, hna acatren la aqane imelekeu i eahun utihë enehila.” Pine laka tru la ihnimi Anna me föi angeic kowe la itre trejin, matre hnei nyidroti hna xatua angatr.—1 Ioane 3:17, 18.

11. (a) Hna ketr tune kaa la itre xan hnene la aqane amamane së la ihnimi së koi angatr? (b) Thenge la Ite Edomë 19:17, tune kaa Iehova la easa amamane la ihnimi easë?

¹¹ Öhne hi la itre trejin la itre trengecatr hne së hna nu matre nyitipu Iehova, la easa loi thiina me amamane la ihnimi së koi angatr. Ame itre xaa ijin, thatre kö së ka hape, hna ketri angatr hnene la aqane ujë i easë koi angatr. Tha thëthëhmine kö Khanh lo itre trejin ka xatua eahlo ekö. Öni eahlo: “Eni a olen kowe la itre trejine föe ka xatua ni ngöne la service i eni. Hnei angatr hna trothei ni, me hë ni troa ce xeni me angatr, me ami ni hmaca e koilo hnalapa. Eni a öhne laka, ka tru catr la hnei angatr hna kuca koi eni. Nge angatr lai a kuca, ke angatr a hnimi ni.” Nyipici laka, tha tro asë kö la itre atr a olene kowe la itre hne së hna kuca koi angatr. Öni Khanh göne la itre ka xatua eahlo: “Eni a ajan troa olene koi angatr, ngo thatre kö ni ka hape, angatr a lapa ekaa enehila. Iehova kö la ka atre, matre eni a thith koi Nyidrë troa amanathithi angatr.” Nge nyipici Khanh hi lai. Öhne hi Iehova la itre huliwa ka loi hne së hna kuca koi itre xan, ngacama itre huliwa ka co hi. Nyidrëti a wangatrune la itre huuje cili, nge tro kö Nyidrëti a të koi së.—E jë la Ite Edomë 19:17.

12. Tune kaa la aqane tro la itre trejin trahmany a amamane la ihnimi angatr kowe la ekalesia? (Goeëne ju fe la itre iatr.)

¹² Tune kaa la aqane tro la itre trejin trahmany a amamane la ihnimi angatr kowe la itre trejin me xatua nyudren? Hnei Jordan, ketre trejin nekötrahmany hna hnyingëne kowe la ketre qatre thup la aqane tro angeic a xatuane la ekalesia. Hnene la qatre thup hna olene la itre huliwa hnei angeic hna kuca ha, me qaja koi angeic la itre xaa nyine kuca matre tro palahi a huliwa catr kowe la ekalesia. Hnei nyidrë hna ithuecatr koi Jordan troa canga traqa ngöne la hnë icasikeu matre ibozu memine la itre trejin, me hamë mekun. Ketre, loi e tro angeic a catre cainöj memine la gurup i angeic me xatuane la itre trejin. Ame la Jordan a trongëne la itre eamo cili, ke angeic a maca ngöne la huliwa i Iehova, me akökötrene fe la ihnimi angeic kowe la itre trejin. Trotrohnine hi Jordan laka, tha tro kö a treqene troa atre ixatua, matre nyiqane xatuane la itre trejin. Ngo loi e ka majemine hë ixatua.—1 Tim. 3:8-10, 13.

13. Nemene la ka uku Christian troa xome hmaca la hnëqa ne qatre thup?

¹³ Tune kaa e hnei epun hna xome la hnëqa ne atre ixatua maine qatre thup ekö? Tha thëthëhmine kö Iehova la itre huliwa hnei epuni hna kuca ekö, memine la ihnimi epuni koi Nyidrë. (1 Kor. 15:58) Öhne palahi Nyidrë la ihnim hnei epuni hna amamane enehila. Kucakuca pi hë Christian la kola ami angeic qa ngöne la hnëqa ne qatre thup. Ame pe, öni angeic, “Hnenge hna isine troa catre nyihlue i Iehova, ngacama pë ju hë hnëqang.” Itre macatre thupen, kolo hmaca acili angeic troa qatre thup. Öni Christian: “Nango xouenge pi hë troa xome hmaca la hnëqa cili. Hnei Iehova hna utipi ni, matre hnei Nyidrëti hna aijijë ni hmaca troa xome la huliwa ne qatre thup. Nge pine laka, tru catre la ihniming koi Nyidrë me kowe la itre trejin, hneng hna kapa hnyawa la hnëqa.”

14. Nemene la ini hne së hna xom qaathene la trejine föe qa Géorgie?

¹⁴ Itre hlue i Iehova mina fe a amamane la ihnimi angatr kowe la itre ka lapa easenyi angatr. (Mat. 22:37-39) Öni Elena, ketre trejine föe qa Géorgie ka hape: “Ame lo xötrei, ke ihniming koi Iehova la ka upi ni troa cainöj. Nge ame hë la kola kökötre la ihniming koi Iehova, ke kolo mina fe a kökötre la ihniming koi itre atr. Hnenge hna pane mekun la itre jole hnei angatr hna melën, me thel la aqane troa ketr la hni angatr. Celë hi lai ka thue ajang troa xatua angatr.”—Rom. 10:13-15.

HETRE THANGAN LA TROA HNIME LA ITRE XAN

15-16. Thenge la itre iatr, nemene la thangan hne së hna kapa qa ngöne la hna hnime la itre xan?

¹⁵ Ame la easa amamane la ihnimi së kowe la itre xaa trejin, ke tha angatre casi kö la ka kepe thangan. Ame lo kola nyiqane lo COVID-19, hnei Paolo me föi nyidrë hna inine la itre trejine föe ka qatre hë, troa huliwane la itre tablet i angatr matre troa cainöj. Ngacama jole kowe la ketre trejine föe troa huliwane la tablet i eahlo, ngo hnei eahlo hna isine troa hëne la itre sinee i eahlo kowe la Drai Ne Amekunën. Nge traqa koi 60 lao sinee i eahlo ka sine jëne vidéoconférence! Eje hi, hnene la trejin föe me itre sinee i eahlo hna kepe thangane qa ngöne la ixatua i Paolo me föi nyidrë. Ame e thupen, hnene lai trejine föe hna cinyanyi koi Paolo me hape: “Oleti la hna xatua hun itre qatre föe. Tha tro kö huni a thëthëhmine la aqane hnimi hun hnei Iehova, memine la itre trengecatr hnei epon hna kuca.”

¹⁶ Hetre ini ka tru hnei Paolo hna xome qa ngöne lai. Ka sisitria kö la ihnim hune la inamacan, me itre hna atrein. Öni nyidrë: “Ketre atre thupë sirkoskripsio ni ekö. Eni a trotrohnine enehila laka, thëthëhmine hë la itre trejine la itre cainöj hnenge hna cile fë, ngo mekune palahi angatr la itre huliwa hnenge hna kuca koi angatr.”

17. Ame la easa hnime la itre xan, ke drei fe la ka troa kepe thangan?

¹⁷ Ame la easa hnime la itre xan, ke easë fe a kepe thangan qa ngön. Celë hi hna öhne hnei Jonathan, ketre trejin qa Nouvelle-Zélande. Ame lo ketre mecixen hnaipajö, hnei angeic hna öhne la ketre trejin pionie ka cainöje cas e kuhu gojeny. Matre hnei Jonathan hna mekune troa cainöj me nyidrë e nöjei mecixen hnaipajö. Tha mekune pi kö angeic laka, tro fe angeic lai a kepe thangan qa ngön. Öni Jonathan, “Ame lo ijine cili, tha ka pi cainöje kö ni. Ngo ame la eni a goeëne la aqane hamë ini nyidrë, memine la itre thangane ka loi hnei nyidrëti hna kapa ngöne la huliwa ne cainöj, ke celë hi ka thue ajang troa catre cainöj. Ketre, lue treme sineene hë nyio, nge hnei nyidrëti hna xatua ni troa macaj, troa catr cainöj, me easenyi catr koi Iehova.”

18. Nemene la aja i Iehova koi së?

¹⁸ Aja i Iehova tro së a isa akökötrene la ihnimi së koi Nyidrë, me koi itre xan. Tune la hne së ce wang, tro sa acatrene la ihnimi së koi Iehova jëne la hne së hna e Tusi Hmitrötr, me lapa mekun, me thithi lapa. Nge tro sa akökötrene la ihnimi së kowe la itre trejin, e tro sa xatua angatr. Maine tro sa akökötrene la ihnimi së, ke tro së lai a easenyi catr koi Iehova, me kowe la itre trejin. Aqane tro hi së lai a hetre sinee utihë epine palua!