Mejiune Jë Koi Iehova Tui Samasona

1-2. Pine nemen matre loi e tro sa xomi ini qaathei Samasona?

NEMEN la ka canga mama koi epun la kola qeje Samasona? Maine jë, tro epuni lai a mekune la ketre trahmany e hnine la Tusi Hmitrötr ka tru trengecatr. Nge eje hi, hna atre Samasona pine la trengecatre i angeic. Ame pe, hnei Samasona fe hna axecië mekun menu, me xeni pun. Ngo hnei Iehova hna wangatrune la aqane mele nyipici angeic, me qaja la hnei angeic hna melën e hnine la Tusi Hmitrötr, matre ini së.

² Jëne Samasona, hnei Iehova hna kuca la itre huliwa ka tru matre xatuane la nöje i Nyidrë. Itre hadredr lao macatre thupene la kola mec hnei Samasona, hnei Iehova hna upi Paulo aposetolo troa qeje Samasona, la angeic a e wengëne la itre atr ka lapaun. (Heb. 11:​32-34) Tru la itre ini nyine tro sa xom qaathei Samasona. Hnei angeic hna mejiune koi Iehova ngöne la itre ijine jol. Ame ngöne la tane mekun celë, tro sa ce wange la aqane tro la tulu i Samasona a ithuecatr koi së, me xomi ini qa ngön.

HNEI SAMASONA HNA MEJIUNE KOI IEHOVA

3. Nemene la hnëqa i Samasona?

³ Ame lo ijine kola hnaho Samasona, ke angetre Filisiti a musinëne la angetre Isaraela, me qanangazo angatr. (A. ame. 13:1) Matre akötre catr la angetre Isaraela. Ame hnei Iehova hna upi Samasona “troa amelene la angete Isaraela qa thei angete Filisiti.” (A. ame. 13:5) Ketre hnëqa lai ka jole catr! Matre nyipiewekë tro Samasona a mejiune koi Iehova.

4. Hnei Iehova hna amele Samasona tune kaa e Lehi? (Angete Amekötin 15:​14-16)

⁴ Tro sa ce wange la ketre aqane amamane Samasona la mejiune i angeic koi Iehova, me kowe la ixatua i Nyidrë. Hnene la trongene isi angetre Filisiti hna tro Lehi, ketre traon e Iudra, matre xolouthi angeic. Tru la xou ne la angetre Iudra, kolo itre trejin me angeic, matre hnei angatr hna nue angeic kowe la ithupëjia. Ame hnei angatr hna othi angeice hnei lue eno ka hnyipixe, me tro sai angeic kowe la angetre Filisiti. (A. ame. 15:​9-13) Ame e cili, ‘hna uti la uati hmitrötre i Iehova’ koi Samasona, nge celë hi ka aijijë angeic troa aukene la itre eno ka othi angeic. Ame hnei angeic hna xome la ketre ‘jun enaji boliko ka hnyipi mec,’ me humuthe la 1 000 lao angetre Filisiti!—E jë la Angete Amekötin 15:​14-16.

5. Nemene la ka amamane ka hape, Samasona a mejiune koi Iehova?

⁵ Hnauëne la Samasona a huliwane la june enaji boliko, matre lepe la itre ithupëjia? Tha jia ne isi kö lai! Atre hi angeic laka, tro angeic a hun hnene la ixatua i Iehova, ngo tha hnene kö la jia ne isi. Matre ame la pane ewekë hnei angeic hna öhn, ke hnei angeic hna xom matre kuca la aja i Akötresie. Mama hnyawa hi laka, hnei angeic hna ngaane la itre ithupëjia, ke hnei angeic hna mejiune koi Iehova.

6. Tro la tulu i Samasona a xatua së tune kaa, la Iehova a upi së troa kuca la ketre ewekë?

⁶ Tro fe Iehova a hamë së la trengecatr matre kuca itre ewekë hnei Nyidrëti hna upi së, ngacama ka jole koi së. Nge ame itre xaa ijin, easa sesëkötr la easa öhne la aqane xatua së hnei Nyidrë. The luelue kö laka, e tro epuni a mejiune koi Iehova, ke tro palahi Nyidrëti a aegöcatrenyi epun, me xatua epun troa kuca la aja i Nyidrë, tui Samasona.—Ite edomë 16:3.

7. Qaja jë la ketre hna melën ka amamane laka, nyipiewekë tro sa nue Iehova troa eatrongë së.

⁷ Hnene la itre hlue i Iehova ka sine la huliwa ne xupi Uma e cailo fen, hna amamane la mejiune i angatr koi Iehova. Ame ekö, itre trejine la ka xupe la itre Uma Ne Baselaia, me itre xaa batima thatraqane la hmi. Ngo pine laka, kola kökötre nyimenyime la etrune la itre Temoë Iehova, matre loi e tro fe a saze la itre aqane xupi uma. Hnene la itre trejin ka elemeken hna catr thith, me axeciën ka hape, tro pë hë a itöne la itre iuma ka cile hë, me ahnyipixen itre ej. Öni Robert, ketre trejin ka hekö hë xupi Uma Ne Baselaia, ka hape : “Ame lo xötrei, jole koi itre xan troa kapa la aqane huliwa cili ka hnyipixe, ke ka isapengöne memine lo aqane huliwa i easë ekö. Ngo hnene la itre trejin hna idrengethenge, nge mama ha ka hape, Iehova a amanathithine la aqane huliwa cili ka hnyipixe.” Kolo hi lai a amamane ka hape, Iehova kö la ka iujine la nöje i Nyidrë matre eatrëne la aja i Nyidrë. Celë hi kepin matre loi e tro sa isa hnying ka hape, ‘Eni kö a nue Iehova troa eatrongë ni, me drengethenge la itre hna amekötin ka hnyipixe?’

HNEI SAMASONA HNA KAPA LA IXATUA I IEHOVA

8. Nemene la hnei Samasona hna kuca, lo angeic a mec hnei pi ij?

⁸ Ma mekune palahi epuni lo itre xaa huliwa ka tru hna kuca hnei Samasona. Hnei angeic hna humuth la ketre liona hnei wanakoim, nge ame ngöne la traon e Asekelona, hnei angeic hna humuthe la 30 lao atre Filisiti. (A. ame. 14:​5, 6, 19) Hnei Samasona hna kuca la itre ewekë ka tru nge ka ketrepengön, ngo atre hi angeic laka, qaathei Iehova la trengecatre i angeic. Celë hi ka mama lo angeic a ase humuthe la 1000 lao angetre Filisiti. Hna traqa la pi ije koi angeic. Ame pe, tha hnei angeic kö hna mejiune kowe la trengecatre i angeic, ngo hnei angeic hna canga hë Iehova.—A. ame. 15:18.

9. Hnei Iehova hna sa tune kaa la sipo i Samasona? (Angete Amekötin 15:19)

⁹ Hnei Iehova hna sa la sipo i Samasona jëne la ketre iamamanyikeu. Hnei Nyidrëti hna axulun la ketre tim ka neni. Nge ame la Samasona a ase iji tim, ke ‘egöcatr hmaca jë hi angeic.’ (E jë la Angete Amekötin 15:19) Itre macatre thupen, eje palahi la qeqe ne timi cili, lo Samuela perofeta a cinyanyine la tusi Angete Amekötin. Ame la angetre Isaraela a öhne la timi cili ke, kola amekunë angatr laka, ce Iehova me angatr ngöne la itre ijine jol.

10. Nemene la aqane tro sa kapa la ixatua i Iehova? (Wange ju fe la iatr.)

¹⁰ Ngacama hetre talane së, maine hetre hne së hna atrein, maine hne së hna kuca ngöne la organizasio i Iehova, ngo loi e tro sa sipo ixatua koi Nyidrë. Nyipiewekë tro sa ipië me atrehmekune laka, tro sa atreine kuca la aja i Iehova jëne hmekuje hi la ixatua i Nyidrë. Hna aegöcatrenyi Samasona, ke hnei angeic hna ij la tim qaathei Iehova. Ketre tune mina fe, tro sa atreine mele nyipici koi Iehova, e tro sa kapa la ixatua qaathei Nyidrë.—Mat. 11:28.

11. Nemene la nyine tro sa kuca matre kapa la ixatua i Iehova? Qaja jë la ketre hna melën.

¹¹ Tro sa ce wange la hna melën hnei Aleksey, ketre trejin ne Russie hna axösisin. Nemene la ka xatua angeic troa cile catr? Hnei angeic me föi angeic hna majemine ini Tusi Hmitrötr, me kuca la itre xaa huliwa koi Iehova. Öni angeic: “Eni a isine tro palahi a ini Tusi cas, me e Tusi Hmitrötr e nöjei drai. E nöjei hmakany, eni me föeng a e la topik me ce thith.” Nemene la hna ini së hnene la tulu i Aleksey? Tha tro kö sa mejiune kowe la sipu trengecatre së, ngo loi e tro pe sa mejiune koi Iehova. Tro sa tune kaa? Loi e tro palahi sa acatrene la lapaune së, ene la troa ini Tusi cas, me thith, me sine la itre icasikeu, me catre cainöj. E cili, tro Iehova a amanathithine la itre trengecatre së. Nge tune la aqane aegöcatrenyi Samasona, tro fe Nyidrëti a aegöcatrenyi së.

THA CILE KÖ SAMASONA!

12. Nemene la mekune ka ngazo hnei Samasona hna xom? Pine nemene matre tha ka ceitu kö la kola ce lapa hnei Samasona me Delila, memine la angeic a ce lapa memine lo lue föe ne Filisiti?

¹² Ketre atr ka tu së hi Samasona, tha ka pexeje kö. Matre hnei angeice fe hna hane axecië mekune menu. Nge ame lai ketre mekun hnei angeic hna axeciën, ke tru catr la itre akötr ka xulu qa ngön. Thupene la angeic a xome la hnëqa ne atre amekötin, hnei “angeic’ [hna] hnime la kete föe ngöne la hnathupe Sorek, Delila la ëjen.” (A. ame. 16:4) Ame ekö, hnei angeic hna pane faipoipo memine la ketre föe ne Filisiti, ngo “qa thei Iehova lai” mekune cili, ke Nyidrëti a thele troa lepe la angetre Filisiti.” Thupene lai, hnei angeic hna lapa thene la ketre föe ne gojenyi ne Filisiti e Gaza. Ame e cili, hnei Iehova hna hamë trengecatr koi Samasona matre thöne la lue qënehlö ne la qanahage ne la traon. Matre pëhë ka thupëne la traon. (A. ame. 14:​1-4; 16:​1-3) Ngo ame e celë, tha Iehova kö la ka upi angeic troa ce lapa me Delila, ke ame Delila, tha jajinyi ne Filisiti kö ngo ma ketre jajinyi ne Isaraela.

13. Nemene la pun la hnei Samasona hna mejiun koi Delila?

¹³ Hnei Delila hna kapa la trenge mani ka tru qaathene la angetre Filisiti, matre troa salemë Samasona. Hnauëne laka, canga mejiune hi Samasona kowe la föe cili? Maine jë, Samasona a hmo sai Delila matre tha öhne kö angeic la itre nyinyithiina i eahlo. Thatre kö së la kepin. Ngo ame la hne së hna atre, ke hnei Delila hna anyimua iele Samasona troa qaja la qaane la trengecatre i angeic utihë la Samasona a qaja. Hnene la aqane ië ewekë i angeic, matre hnei angeic hna tria. Ame ju pë la pun, paatre hë Iehova thei angeic, nge hna pane pë trengecatre i angeice fe.—A. ame. 16:​16-20.

14. Nemene la itre akötr ka traqa koi Samasona pine angeic mejiun koi Delila?

¹⁴ Pine Samasona mejiune koi Delila, ngo tha koi Iehova kö, hna traqa koi angeic la itre akötr ka tru. Hnene la angetre Filisiti hna othi angeic me sea la lue meke i angeic. Hnei angatr hna akalabusi angeic e Gaza, kolo traon hnei angeic hna thön ekö la lue qëhnelö. Nge hnei angatr hna thahluë angeic, me upi angeic troa amudromudron la qitr. Ketre, hnei angatr hna thaipië Samasona la angatr a kuca la ketre feete thatraqane la haze i angatr Dagona. Hnei angatr hna kuca la ketre huuje ka tru koi Dagona, ke ame koi angatr, Dagona la ka xatua angatr troa othi Samasona. Aja i angatr troa ahmahmane me hnyimasai Samasona, matre hnei angatr hna xomi angeic qa ngöne la kalabus, me tro sai angeic kowe la hnë feet.—A. ame. 16:​21-25.

15. Nemene la ka amamane ka hape, hnei Samasona hna mejiune hmaca koi Iehova? (Angete Amekötin 16:​28-30) (Wange ju la icetrön.)

¹⁵ Ngacama hnei Samasona hna kuca la ketre ngazo ka tru, ngo hnei angeic hna bëeke hmaca koi Iehova. Tha hnei angeice kö hna nuetriji Nyidrë! Hnei angeic hna isine troa afenesine la hnëqa i angeic qaathei Akötresie, ene la troa lepe la angetre Filisiti. (E jë la Angete Amekötin 16:​28-30.) Celë hi matre hnei angeic hna sipo Iehova ka hape: ‘Epi tro ni a nyithupen kowe la angetre Filisiti.’ Ame hnei Akötresie hna kapa la sipo i angeic, me hamë angeic hmaca la trengecatr. Ame ngöne la ijine cili, tru catre hmaca kö la angetre Filisiti hnei angeic hna humuth, hun ekö.

16. Nemene la ini hne së hna xome qa ngöne la tria i Samasona?

¹⁶ Ngacama hnei Samasona hna xeni pune la itre huliwa i angeic, ngo ka tru palahi koi angeic la aja i Iehova. Maine hna haji epun, maine hna ami epun pena qa ngöne la ketre hnëqa, ke the dekurage pi kö! Aja i Iehova troa nue la itre ngazo epun. (Sal. 103:​8-10) Maine hnei epuni hna kuca la ketre ngazo ka tru ekö, the mekune pi kö laka, ka luzi hë epun. Tro hmaca kö Iehova lai a hamë epun la itre hnëqa, tui Samasona.

17-18. Nemene la ithuecatr hnei epun hna kapa qa ngöne la hna melën hnei Michael? (Wange ju fe la iatr.)

¹⁷ Tro sa ce wange la hna melën hnei Michael. Ketre atre ixatua me pionie angeic ngöne la ekalesia, matre tru catre la huliwa i angeic. Ngo hnei angeic hna kuca la ketre ngazo ka tru, matre hna xome la itre hnëqa qaathei angeic. Öni angeic, “Ka huliwa catre ni koi Iehova, ngo qane ju hi la ijine cili, ke pë pi hi hnëqang. Atre hi ni ka hape, tha ase kö Iehova nuetriji ni. Ngo eni a ketre hnying ka hape, ‘Tro hmaca kö a lolo la imelekeung me Iehova tune ekö? Nge tro hmaca kö ni a huliwa catr ngöne la ekalesia tune ekö?’”

¹⁸ Eloine pe, tha dekurage pi kö Michael. Öni angeic: “Hnenge hna isine troa easenyi catr koi Iehova. Hnenge palahi hna catre thith, me ini Tus, me lapa mekun.” E thupen, hnei Michael hna kapa hmaca la itre hnëqa i angeic ngöne la ekalesia. Ame enehila, ketre qatre thup me pionie lapa ha angeic. Öni angeic: “Hnene la itre trejin me itre qatre thup hna ithuecatr koi ni me xatua ni troa trotrohnine laka, Iehova palahi a hnimi ni. Lolo hë la mekuthetheung, nge eni hmaca a huliwa catr ngöne la ekalesia. Trotrohnine hë ni enehila laka, aja i Iehova troa nue la ngazo ne la itre ka ietra.” Ngacama hne së hna kuca la ketre ngazo ka tru ekö, ngo ijije hi tro Iehova a hamë së hmaca la itre hnëqa me amanathithi së, e tro sa thele troa saze la aqane ujë së me mejiune koi Nyidrë.—Sal. 86:5; Ite edomë 28:13.

19. Tune kaa la aqane aegöcatrenyi epun hnene la tulu i Samasona?

¹⁹ Ame ngöne la tane mekune celë, hne së hna ce ithanatane la hna melën hnei Samasona. Tha ka pexeje kö angeic. Thupene lo kola iaö angeic hnei Delila troa kuca la ketre ngazo ka tru, ke tha hnei angeic kö hna nuetriji Iehova, ngo hnei angeic palahi hna isine troa nyihlue i Nyidrë. Nge e thupen, hnei Iehova hna upi angeic hmaca troa eatrëne la ketre ewekë ka tru. Ame koi Nyidrë, ketre atr ka catre lapaune Samasona. Celë hi matre, hnei Nyidrë hna hane qeje Samasona, lo kola e wengëne la itre hlue i Iehova ka mele nyipici ngöne Heberu mekene 11. Madrine catre së troa öhne laka, ame la Akötresie hne së hna nyihluen, ke ketre Keme ka ihnim. Nge tru la aja i Nyidrë troa aegöcatrenyi së la easa kucakuca! Haawe, tui Samasona sipo Iehova jë ka hape: ‘Meku ni jë hnei nyipë, nge aegöcatrenyi ni jë.’—A. ame. 16:28.