Ka Tru Trengecatr La Atr Ka Menyik

1. Nemene jë la itre hnying hna hnyingë epun hnene la itre sine huliwa maine sine ini epun?

TUNE KAA epun, la kola hnyingë pengöne la lapaune i epun hnene la ketre sine huliwa maine sine ini epun pena? Tha epuni kö a nango xou? Celë hi ka traqa koi së asë. Ngo ame la angeic a hnying, ke kolo lai a aijijë epun troa atre la mekuna i angeic memine la hnei angeic hna mejiune kow. Nge ijine hi lai tro epuni a qeje Iehova koi angeic. Ngo ame la itre xan, angatr a hnying matre icilekeu me easë. Tha tro kö sa sesëkötr, ke ame itre xan, thatre hnyawa kö angatr la pengöne la hmi së. (Itre hu. 28:22) Ketre, easa melëne la “itre drai ne la pun,” matre itre atr a “xele ma ca mekun” me “iaxösisi.”—2 Tim. 3:​1, 3.

2. Pine nemen matre nyipiewekë tro sa menyik?

² Maine jë tro epuni a hnying ka hape, ‘Tune kaa la aqane tro ni a sa amenyikene me metrötrëne la atr ka xöjetrije la lapauneng?’ Ame la ka troa xatua epun, ke ene la troa menyik. Ame la atr ka menyik, ke ka atreine xomihni la kola akötrë angeic maine axouenyi angeic pena. (Ite edomë 16:32) Eje hi, “hmaloi hi troa qaja, ngo jol e troa kuca.” Tune kaa la aqane tro sa hetrenyi lai thiina cili, ene la troa menyik? Tune kaa la aqane tro epuni a sa amenyikene la kola xöjetrije la hmi epun? Maine kem me thin epun, tro epuni a inine tune kaa la itre nekö i epun troa sa amenyikene la kola qaja angazone la lapaune i nyudren? Celë hi hne së hna troa ce wang ngöne la tane mekune celë.

AQANE TROA HETRENY LA MENYIK

3. Pine nemen matre ka catre la atr ka menyik? (2 Timoteo 2:​24, 25)

³ Ame la atr ka menyik, ke ka catre angeic, ngo tha ka puje kö. Eje hi, ame la atr ka catr, ke tha angeice kö a enienije menu la kola traqa la ketre jol. Ame la menyik, ke ketre igötranene “la wene ne la ua.” (Gal. 5:​22, 23) Ame itre xaa ijin, hna huliwane la hnaewekë qene Geres hna hape, “menyik” matre troa qaja la ketre hoos wael hna amemën. Pane mekune jë la ketre hoos wael hna amemën. Ngacama menyike hë ej, ngo tha hape kö ka hape, patre hë la trengecatrene ej. Tune kaa fe easë? Nemene la aqane tro sa menyik me catr? Tha tro hmekuje kö sa ajan. Ngo loi e tro fe sa sipo Iehova la uati hmitrötr, matre xatua së troa hetrenyi la thiina ka lolo cili. Alanyimu la itre Temoë Iehova ka inine troa menyik. Ame enehila, atreine hë angatre menyik kowe la itre ka icilekeu me angatr. Angatr e cili a amamai tulu ka lolo kowe la itre ka goeë angatr. (E jë la 2 Timoteo 2:​24, 25.) Nemene la nyine troa kuca matre troa hetrenyi la thiina cili, ene la menyik?

4. Nemene la ini hne së hna xome qa ngöne la aqane menyike i Isaaka?

⁴ Tru catre la itre hna melën e hnine la Tusi Hmitrötr ka amamane la enyipiewekëne tro sa menyik. Tro sa ce wange la hna melëne hnei Isaaka. Thupene la angeic a lapa e Gerara, ngöne la götrane i angetre Filisiti, hnei angatr hna piine la itre ewekë i angeic me kelem la itre tim hna kuj hnene la itre hlue i Aberahama, keme i angeic. Tha hnei angeice kö hna icilekeu me angatr, ngo hnei angeice pe hna mejë kowe la ketre götran me kuje la itre xaa tim. (Gen. 26:​12-18) Ame e cili, hnene hmaca la angetre Filisiti hna traqa me thele iwesitrë pine la itre tim cili. Ngo, hnei Isaaka palahi hna thele tingeting. (Gen. 26:​19-25) Nemene la ka xatua angeic tro palahi a menyik kowe la itre atr ka thele iwesitrë me angeic? Hnei angeic hna goeëne la tulu ne la kem me thine i angeic. Ma hna ketri angeice jë hnene la aqane thele tingetinge i Aberahama, memine la aqane “menyik me loi hni” Sara.—1 Pet. 3:​4-6; Gen. 21:​22-34.

5. Ijije kö tro la itre kem me thine a inine la itre nekönatr troa menyik? Qaja jë la ketre ceitun

⁵ Itre keme me thine fe, inine jë la itre nekö i epun troa menyik. Celë hi hna kuca hnene la kem me thine i Maxence, ka 17 lao macatre. Ame itre xaa ijin, angeic a ixelë memine la itre atr ka elëhni ngöne la hna ini me ngöne la hna cainöj. Matre, hnene la kem me thine i angeic hna xomi ijine troa ini angeic la aqane troa menyik. Öni nyidro, “Trotrohnine hë Maxence laka, saqe hi së elëhni maine sa akötrëne la kola icilekeu me easë, ngo ame la atr ka catr, ke ka atreine xomihni.” Ame enehila, ketre atr ka menyike hë Maxence.

6. Tro la thith a xatua së tune kaa troa menyik?

⁶ Nemene la nyine tro sa kuca, la kola qaja angazone la ëje i Akötresie memine la Tusi Hmitrötr? Loi e tro sa sipo Iehova la uati hmitrötr me inamacane i Nyidrë, matre tro sa atreine sa amenyiken. Ngo tune kaa, e tha loi kö la aqane ithanata i easë? Loi e tro sa thith koi Iehova, me wange la aqane tro sa kuca e traqa hmaca ju lai jol. Nge tro kö Iehova a hamë së la uati hmitrötre i Nyidrë, me xatua së troa xomihni me menyik.

7. Pine nemen matre loi e tro sa atre la itre xaa xötr matre xomehnöthe la thineme së? (Ite Edomë 15:​1, 18)

⁷ Tro la itre xaa xötr ne la Tusi Hmitrötr a xatua së troa xomehnöthe la thineme së, la kola traqa la ketre jol. Nge tro la uati hmitrötre i Akötresie a amekunë së la itre xötre cili. (Ioane 14:26) Ame ngöne la tusi Ite Edomë, hetrenyi la itre trepene meköt ka troa xatua së troa menyik. (E jë la Ite Edomë 15:​1, 18.) Eje fe a qaja la itre eloin, e tro sa xomihni la kola aehlëhni së.—Ite edomë 10:19; 17:27; 21:23; 25:15.

KA MENYIK LA ATR KA INAMACAN

8. Hnauëne laka, loi e tro sa pane atre la kepin matre kola hnying hnene la ketre atr?

⁸ Ka nyipiewekë mina fe la inamacane maine trotrohnin. (Ite edomë 19:11) Ame la atr ka inamacan, ke ka xomehnöthe la aqane ithanata i angeic ngöne la kola xöjetrije la hmi angeic. Ame itre xaa ijin, itre atr a hnying, ngo tha angatre kö a qaja hnyawane la mekuna i angatr. Maine jë, hetre mekun hnei angatr hna lapa fë nge ka ajolë angatr. Celë hi matre, qëmekene troa sa, the thëthëhmine kö laka, hetre kepin matre angatr a hnyinge tun.—Ite edomë 16:23.

9. Tune kaa la aqane inamacan me menyik Gideona, lo angetre Eferaima a thel iwesitrë me angeic?

⁹ Tro sa ce wange la aqane sa i Gideona kowe la angetre Eferaima. Ka wesitre catr angatre koi angeic. Hnei angatr hna hnyingë angeic la kepin, matre tha hë angatre kö troa hane isi memine la itre ithupëjia me Isaraela. Nemene la nyipi kepin, matre angatr a elëhni? Maine jë, itre ka pi draië angatr. Eloine pe, hnei Gideona hna metrötrë angatr me sa amenyikene koi angatr. Nemene hë la thangane lai? “Ame hna pate la elëhni angate koi [angeic].”—A. ame. 8:​1-3.

10. Nemene la ka troa xatua së troa sa amenyikene kowe la itre ka xöjetrije la hmi së? (1 Peteru 3:15)

¹⁰ Nemene la nyine tro sa kuca, e tro la ketre sine huliwa maine sine ini së, a hnyingëne la kepine matre easa trongëne la itre trepene meköt ne la Tusi Hmitrötr? Loi e tro sa isine troa isigöline la lapaune së, me metrötrëne fe la mekuna i angeic. (E jë la 1 Peteru 3:15.) Ketre, tha tro kö sa canga mekun ka hape, angeic a icilekeu maine qaja angazo së. Ngo loi e tro pe sa thel troa atre la mekuna i angeic. Ngacama thatre kö së la kepin matre angeic a hnying, ngo nyipiewekë tro palahi sa sa amenyikene me loi thiina. Maine jë, tro la aqane ujë i easë a uku angeic troa saze la aqane waiewekë angeic. Ngacama pëkö metrötre i angeic, maine ka ihnyimasai, ngo loi e tro palahi sa thiina ka loi.—Rom. 12:17.

11-12. Nemene la nyine tro sa pane kuca la kola hnying koi së? (Wange ju fe la iatr.) (b) Qaja jë la itre hnei epun hna melën ka aijijë epun troa porotrik hnyawa memine la ketre atr.

¹¹ E tro la ketre sine huliwa së a hnyingëne la kepin, matre tha easë kö a feetëne la itre aniverser, isa hnyinge jë ka hape: “Angeice kö a mekune ka hape, hna wathebo së troa hane madrin? Maine pena angeice jë a mekun ka hape, e tha feetëne kö së la itre aniverser, ke tro së lai a thë la cas ne la entreprise.” Loi e tro sa olene koi angeic la hnei angeic hna wangatrune la itre xaa sine huliwa, me qaja ka hape, aja i easë troa cas me angatr ngöne la huliwa. Maine jë, tro lai a aijijë së troa qaja la mekuna i Tusi Hmitrötr göne la itre aniverser.

¹² Celë fe hi nyine tro sa kuca la kola hnyingë easë la pengöne la itre xaa ini qa hnine la Tusi Hmitrötr. Tune kaa e tro la ketre sine ini së a qaja ka hape, loi e tro la itre Temoë Iehova a kapa la itre ka homosexuel. Hapeu, hetre hnei angeice kö hna dreng, göne la itre Temoë Iehova? Hetre sinee i angeice kö maine fami angeic ka homosexuel? Angeice kö a mekune ka hape, methi easë la itre homosexuel? Loi e tro sa qaja koi angeic laka, itre Temoë Iehova a hnim me metrötrëne la nöjei atr, nge isa qanyi së kö ië ewekë.b (1 Pet. 2:17) Maine ijije hi, qaja jë koi angeic la itre eloine la troa trongëne la itre trepene meköt qa hnine la Tusi Hmitrötr.

13. Tro eö a xatuane tune kaa la atr ka qaja ka hape, ka menu la atr ka lapaune koi Akötresie?

¹³ Maine easa ithanata memine la ketre atr ka catre fë mekun, tha tro kö sa canga qaja ka hape, mekuna i angeice hë lai, tha tro kö angeic a saze. (Tito 3:2) Tune kaa e tro la ketre sine ini eö a qaja ka hape, ka menu la atr ka lapaune koi Akötresie? Tro kö eö lai a canga mekune ka hape, angeic a mejiune kowe la ini évolution, nge atre hnyawa i angeice la ini cili? Maine jë, angeice hi a qaja la hnei angeic hna dreng qaathei itre xan. Matre the isi ithanata kö me angeic, ngo pane nue ijine pi koi angeic troa hane ithel. Troa tune kaa? Iupi fë jë koi angeic la lien ne la ketre tane mekun maine video ngöne jw.org, ka qaja la itre hna xup. Maine jë, tro hë angeic a pi porotrikëne lai me eö. Maine tro eö a metrötrë angeic, ijiji hi tro angeic a saze mekun.

14. Tune kaa la aqane huliwane Niall la site së, matre xatuan la sine ini angeic troa saze la aqane goeën angeic la itre Temoë Iehova?

¹⁴ Hnei Niall, ketre jeune hna huliwane la site së, matre troa jelethoine la hna qaja göne la itre Temoë Iehova. Öni angeic, “Ketre sine ining a qaja ka hape, eni a thipetrij la itre hna qaja hnei itre scientifique, ke ka tru kö koi ni la hna qaja hnene la itus ka qeje ifejicatr.” Pine laka, tha hna nue ijine kö koi angeic troa qaja la kepin matre angeic a mejiun koi Akötresie, hnei Niall hna upe la sine ini angeic kowe la hna hape, “La Bible et la science” ngöne jw.org. Thupene lai, hnei Niall hna öhne laka, hnene la sine ini angeic hna tro kowe la site së, nge aja i angeice hë troa ce porotrikëne la aqane nyiqane la mel. Tro fe eö lai a kepe thangane ka loi, e tro eö a huliwane la site së.

ITRE FAMI FE, HNËKË JË

15. Tro la itre kem me thin a xatuane tune kaa la itre nekö i angatr troa sa amenyikene kowe la atr ka qaja angazone la lapaune i nyudren?

¹⁵ Loi e tro la itre kem me thin a inine la itre nekö i angatr troa sa amenyikene kowe la itre ka qaja angazone la lapaune i nyudren. (Iako. 3:13) Ame la itre xaa keme me thin, ke angatr a amamane kowe la itre nekö i angatr la aqane troa sa, ngöne la ijine hmi ne la fami. Angatr a ce ithanatane me nyudren la itre mekun hna majemine qaja ngöne la hna ini, me aqane tro nyudren a sa. Aja ne la itre kem me thin troa inine la itre nekö i angatr troa sa amenyiken, me qaja la itre trengewekë ka loi.—Wange ju la hna eköhagen hna hape, “Aqane Tro La Itre Fami a Hnëkë.”

16-17. Tro la hmi ne fami a xatuane tune kaa la itre jeunes?

¹⁶ Ka nyipiewekë catr troa ce wange la itre mekune cili memine la itre jeunes. Tro lai a acatrene la lapaune i nyudren me xatua nyudren troa atreine sa kowe la itre sine ini nyudren. Ame ngöne la götrane hna hape, “Les jeunes s’interrogent” ngöne jw.org, hetreny la itre fiches de réflexion. Hna kuca itre ej, matre acatrene la lapaun ne la itre jeunes, me hnëkë nyudren troa atreine sa kowe la itre ka hnying koi nyudren. E tro sa kuca lai ngöne la hmi ne la fami, ke tro hë la itre atrene ka fami a atreine sa amenyikene la kola qajangazone la lapaune së.

¹⁷ Hnei Matthew, ketre jeune, hna kepe thangane qa ngöne la hna ce ithanatane la itre mekune cili ngöne la hmi ne la fami. Hnei angeic me kem me thine i angeic hna ithel göne la itre mekun hna majemine qaja ngöne la hna ini. Öni angeic: “Eahuni a ce wange la itre hnying hna troa amejëne ngöne la hna ini, me ithel, nge e thupen, eahuni a elone la aqane tro ni a sa. Maine ka xecie koi ni la itre ini hnenge hna mejiune kow, ke tha seseu kö ni, nge hmaloi hi koi ni troa sa amenyikene koi itre xan.”

18. Nemene la ini hne së hna xome qa ngöne la tusi Kolose 4:6?

¹⁸ Ngacama ka lualai me nyipici la hne së hna qaja, ngo tha itre atr asë kö la ka troa kapa. Ame pe, ijije hi troa ketri angatr, e tro sa ithanata amenyikene koi angatr. (E jë la Kolose 4:6.) Ceitune hi la troa qaja la lapaune së koi ketre, memine la troa elo balo. Hetre aqane troa hna la balo, troa hna hmidrane maine hna catrën. Maine tro sa hna hmidran, ke canga tro hi la atr ka cil qëmeke së a xolouth la balo me elo memin. Ceitune hi lai memine la easa ithanata koi ketre. Maine tro sa ithanata amenyiken me loi thiina, tro angeice lai a malahnine troa drei së, me pi porotrike me easë. Ngo, e kolo hi a pi isi ithanata hnei angeic, me hnyimasai së, ke apëne pi la porotrike i epon. (Ite edomë 26:4) Eloine pe, alanyim la ka drei së.

19. Nemene la ka troa xatua së troa sa amenyikene la kola hnyinge koi së?

¹⁹ Nyipiewekë koi së troa menyik. Sipo Iehova jë troa xatua epun troa sa amenyikene la kola hnying koi epun maine xöjetriji epun pena. The thëthëhmine kö laka, e tro epuni a sa amenyikene koi ketre me metrötrëne la mekuna i angeic, ke tha tro kö a traqa la iwesitrë. Tro pe lai a xatua angeic troa saze la aqane goeë së hnei angeic, me aqane goeën angeic la itre ini qa hnine la Tusi Hmitrötr. Haawe, ‘hnëkë jë matre tro pala hi epun a atreine sa kowe la itre ka hnyingëne la kepine la lapaune i epun, ngo troa sa cememine la menyike me metrötr atraqatr.’ (1 Pet. 3:15) Ka tru trengecatr la itre ka menyik!