Tro Kö Iehova a Xatua Eö Ngöne La Itre Ijine Jol

1-2. (a) Nemene la itre jol hne së hna melën, nge ka ceitu memine la hna melën hnene la angetre Iudra ka bëek a tro Ierusalema? (b) Nemene la itre jol hna cile kow hnene la angetre Iudra? (Wange ju la hna eköhagen “Ijine i Hagai, Zakaria me Ezera.”)

HNEI epuni kö hna hane hnehengazon la itre drai elany? Maine jë, pëhë huliwa i eö matre eö a thel la aqane tro eö a thupëne la fami eö. Maine pena, kola gomegom la nöj, me axösisi së maine icilekeu kowe la hmi së, matre eö a mekune la fami eö. Maine eje hi lai, tro la tane mekune celë a xatua eö. Ej a qaja la aqane xatuane Iehova la angetre Iudra ekö, lo angatr a cil kowe la itre jol ka tune lai.

² Nyipiewekë troa lapaun la angetre Iudra hna hnahon e Babulona ke, kola upi angatr troa trotrije la nöj ka lolo e cili, me tro kowe la ketre nöj hnei angatr hna thatre. Ame la angatr a traqa e cili, jol koi angatr troa thupëne la fami angatr. Ketre, kola icilekeu me angatr hnene la itre traon ezin, nge kolo fe a gomegom la musi Peresi. Celë hi matre, jol koi itre xan troa amë panëne la huliwa ne xup hmaca la uma ne hmi i Iehova. Ame lo macatre 520 M.P.K., hnei Iehova hna upe la lue perofeta, ene Hagai me Zakaria, troa xatuane la nöj tro hmaca a catre huliwa koi Nyidrë. (Hag. 1:1; Zaka. 1:1) Tune la hne së hna troa ce wang, hnene la lue perofeta cili hna catre xatua angatr. Ngo 50 lao macatre thupen, hnei angatr hmaca hna kucakuca. Ame hnei Ezera, atre cinyihane ka atre hnyawa la Wathebo, hna tro qa Babulona a tro Ierusalema matre ithuecatr kowe la nöje troa amë panëne la hmi ka wië.​—Ezera 7:1, 6.

3. Nemene la itre hnying hne së hna troa sa? (Ite Edomë 22:19)

³ Hnene la itre hna perofetane hnei Hagai me Zakaria hna xatuane la itre hlue i Iehova ekö troa mejiune koi Nyidrë, la angatr a cil kowe la itre jol. Matre tro fe itre ej a xatua easë enehila, ngöne la itre jol hne së hna melën. (E jë la Ite Edomë 22:19.) Ame ngöne la tane mekune celë, tro sa ce wang la maca hnei Akötresie hna upi Hagai me Zakaria troa tro fë kowe la angetre Iudra, memine la tulu i Ezera. Tro lai a xatua së troa sa la itre hnying celë: Tune kaa la angetre Iudra ka bëek a tro Ierusalema, la angatr a melën la itre jol? Pine nemene matre nyipiewekë tro sa amë panëne la aja i Akötresie la easa cil kowe la itre jol? Nge tro sa acatrene tune kaa la mejiune së koi Iehova ngöne la kola traqa la itre jol?

ITRE JOL A ANANAZIJËNE LA AJA I ANGATR

4-5. Pine nemene matre pëhë aja thene la angetre Iudra troa xup hmaca la uma ne hmi?

⁴ Tru catre la itre huliwa ne la angetre Iudra la angatr a bëek a tro Ierusalema. Hnei angatr hna canga xup la ita ne huuje i Iehova me ami trepene la uma ne hmi. (Ezera 3:1-3, 10) Ngo canga nanazije hi la trenge aja i angatr. Pine nemen? Pine laka, angatr a xup hmaca la uma ne hmi, me xup fe la itre sipu uma i angatr, me tra feja nyine thuane la fami angatr. (Ezera 2:68, 70) Ketre, angatr a cil kowe la itre ithupëjia ka thel troa acilëne la huliwa ne xup la uma ne hmi.​—Ezera 4:1-5.

⁵ Nge kolo fe a ketr la angetre Iudra ka bëek hnene la aqane gomegom la politik. Ame enehila, kolo pena a musinëne la nöj hnene la musi Peresi. Thupene la kola mec hnei Koreso joxu ne Peresi lo macatre 530 M.P.K., hnene la joxu ka inyihnai, ene Cambyse, hna isi memine la nöj e Aigupito. Hnene la itre sooc ka tro Aigupito hna sipone kowe la angetre Iudra troa thua i angatr, me thue ime i angatre tim me uma. Matre tru catre hmaca kö la itre jol kowe la angetre Iudra. Ame la kola nyiqane mus hnei Dariu I, lo ka nyihnai Cambyse, ke tru la icilekeu me gomegom ngöne la nöj. Celë hi matre alanyim la angetre Iudra ka hnehengazo, me thel la aqane tro angatr a thupëne la fami angatr. Hnene la hnënge jol ka traqa, matre itre xan a mekune ka hape, tha ijine palakö troa xup la uma ne hmi.​—Hag. 1:2.

6. Thenge la Zakaria 4:6, 7, nemene la ketre jol ka traqa kowe la angetre Iudra, nge nemene la ithuecatr qaathei Zakaria?

⁶ E jë la Zakaria 4:6, 7. Eje hi, angetre Iudra a cil kowe la itre jol koi mani, me itre jol ngöne la politik, ngo kolo fe a axösisi angatr. Ame lo macatre 522 M.P.K., hnene la itre ithupëjia hna ukune la musi Peresi troa wathebone la huliwa ne xup hmaca la uma ne hmi i Iehova. Ngo hnei Zakaria hna qaja kowe la angetre Iudra ka hape, tro kö Iehova a apatrene la itre jol qëmekei angatr jëne la uati hmitrötr. Ame hë lo macatre 520 M.P.K., hnei Dariu joxu hna amejëne la wathebo me nue angatr troa sisedrëne la huliwa, goi hamë manie fe me ixatua qaathei mus.​—Ezera 6:1, 6-10.

7. Nemene la itre manathith hna kapa hnene la angetre Iudra la angatr a amë panëne la aja i Akötresie?

⁷ Jëne Hagai me Zakaria, hnei Iehova hna sisiny kowe la nöje i Nyidrë laka, tro kö Nyidrëti a xatua angatr e tro angatr a amë panëne la huliwa ne xup hmaca la uma ne hmi, ngöne la mele i angatr. (Hag. 1:8, 13, 14; Zaka. 1:3, 16) Jëne la ithuecatr ne la itre perofeta, hnene la angetre Iudra hna xejë hmaca la huliwa lo macatre 520 M.P.K., nge tha 5 ju kö lao macatre, nge ase fe hë afenesin la uma ne hmi. Pine laka, hnei angatr hna amë panëne la aja i Nyidrë, ngacama tru la itre jol, matre hnei Nyidrë hna hamëne la ka nyipiewekë koi angatr, me acatrene la imelekeu i angatr me Nyidrë. Haawe, ijiji angatre hë enehila troa nyihlue i Iehova ngöne la madrin.​—Ezera 6:14-16, 22.

AMË PANËNE JË LA AJA I AKÖTRESIE

8. Nemene la aqane tro la tusi Hagai 2:4 a xatua së troa amë panëne la aja i Akötresie? (Wange ju la ithuemacany.)

⁸ Calemi hë la akötr atraqatr, matre easa öhne laka, ijine hi la troa catre cainöj. (Mar. 13:10) Maine jë, jol koi së troa amë panëne la huliwa ne cainöj, ke easa cil kowe la itre jol göi mani, maine kola sewe së troa cainöj. Nemene la ka troa xatua së troa amë panëne la Baselaia ngöne la mele së? The luelue kö së laka, ce easë me “Iehova ne sabaoth.”b Tro kö Nyidrëti a xatua së, e tro sa amë panëne la Baselaia hune la itre sipu aja së. Haawe, the xou kö.​—E jë la Hagai 2:4.

9-10. Hnene la lue trefëne hna jelenyipicine tune kaa la hna qaja hnei Iesu ngöne Mataio 6:33?

⁹ Tro sa ce wange la hna melëne hnei Oleg me Irina,c lue pionie. Thupene la hnei nyidroti hna fek kowe la ketre götrane matre xatuane la ketre ekalesia, hna pë huliwa i nyidro, ke kola jole la nöj hnei mani. Ame ngöne la ca macatre, pëkö huliwa i nyidro ka cile hut, ngo hnei nyidroti palahi hna öhne la ixatua Iehova me itre trejin. Ngacama hnehengazo catre Oleg me föe i angeic, ngo angeic a qejepengöne la aqane catre mejiune i nyidro. Öni angeic, “Hnei nyio hna catre cainöj, nge celë hi ka xatua nyio troa mekun la itre ka nyipiewekë ngöne la mel.” Hnei Oleg me Irina palahi hna catre cainöj me thele huliwa.

¹⁰ Ame lo ketre ijin, thupene la hnei nyidroti hna cainöj, hnene la atre ka lapa easenyi nyidro hna qaja ka hape, hnene la ketre sinee i nyidro hna nyapëne la 160 lao kilomet troa tro fë la lue watrengë xen koi nyidro. Öni Oleg: “Ketre hatrene hmaca la, laka tru catre la hna hnimi nyio hnei Iehova memine la ekalesia. Xecie koi nyio laka, thatreine kö Iehova troa thëthëhmine la itre hlue i Nyidrë ka cile kowe la itre jol.”​—Mat. 6:33.

11. Nemene la ka xecie koi së, e tro sa amë panëne la aja i Iehova ngöne la mele së?

¹¹ Aja i Iehova tro sa amë panëne ngöne la mele së la huliwa ne cainöj, ke huliwa lai ne iamele. Tune lo hne së hna ce wange ngöne la paragaraf 7, hnei Hagai hna ithuecatr kowe la itre hlue i Iehova troa xome hmaca la huliwa ne xupi uma, kösë angatr hmaca a xötrei ami trepene la uma ne hmi. Hnei Iehova hna qaja koi angatr ka hape, e tro angatr a kuca lai, ke tro kö Nyidrëti a ‘amanathithi angatr.’ (Hag. 2:18, 19) Loi e xecie koi së laka, tro kö Iehova a amanathithi së, e tro së amë panëne la huliwa ne cainöj ngöne la mele së.

AQANE TRO SA ACATRENE LA MEJIUNE SË KOI IEHOVA

12. Pine nemen matre loi e tro Ezera me itre ka ce tro me angeic a catre lapaun?

¹² Ame lo macatre 468 M.P.K., hnei Ezera memine la hnaaluene gurup i angetre Iudra hna fek qa Babulona a tro Ierusalema. Nyipiewekë tro angatr a catre lapaun ngöne la ijine cili. Eje hi, tru la itre jol ngöne la gojeny, nge angatre fe a xome trongëne la itre ahnahna thatraqane la uma ne hmi, ene la itre gool me sileva. Matre ijije hi tro la itre ka atrekëhnö a tra thethi angatr. (Ezera 7:12-16; 8:31) Ketre, tha nyipi loi kö angatr e Ierusalema, ke tha alanyim palakö la ka lapan ej, nge tha hna nyihnyawane petre kö la itre ihag me itre qënehlö. Tro la tulu i Ezera a xatua së tune kaa troa acatrene la mejiune së koi Iehova?

13. Nemene la ka acatrene la mejiune i Ezera koi Iehova? (Wange ju la ithuemacany.)

¹³ Hnei Ezera hna öhnyi Iehova a xatuane la itre hlue i Nyidrë. Ame lo itre macatre qëmeken lo macatre 484 M.P.K., lo Ezera e Babulona, hnei Asueru joxu hna acile la ketre wathebo. Kola troa apatrene asë la angatre Iudra ka mele ngöne la itre götrane hna musinëne hnene la musi Peresi. (Esetera 3:7, 13-15) Seseu catre Ezera memine la angetre Iudra! Ame la angetre Iudra a dreng la hna amekötine hnei joxu, ke hnei angatr hna tha xen me hnë mec “ngöne la nöjei provës.” Ketre hnei angatr hna thith koi Iehova matre amamane la nyine troa kuca. (Esetera 4:3) Pane mekune jë la Ezera me angetre Iudra a dreng laka, tha eatre ju kö lo hna mekun hnene la itre ithupëjia, ene la troa apatrenyi angatr! (Esetera 9:1, 2) Ame la hna melëne hnei Ezera ngöne la ijine cili, ke kola hnëkë angeic kowe la itre itupath ka troa traqa e thupen, me acatrene la mejiune i angeic kowe la atreine Iehova troa thupëne la itre hlue i Nyidrë.d

14. Nemene la ini hna kapa hnene la ketre trejin la angeic a cil kowe la ketre jol?

¹⁴ Ame la easa öhnyi Iehova a xatua së ngöne la easa cil kowe la ketre jol, ke kola acatrene la mejiune së. Tro sa ce wang la hna melën hnei Anastasia, ka mel e Europe de l’Est. Hnei angeic hna nue la huliwa i angeic, ke itre sine huliwa i angeic a uku angeic troa kuci politik. Öni angeic: “Eni petre hi a hane pë mani.” Öni angeic hmaca jë hi: “Hnenge hna qaja koi Iehova la hnenge hna melën, nge öhne hi ni la ixatua i Nyidrë. E traqa ju pë huliwange elany, ke tha xounge hë. Maine hnei Nyidrëti hna thupë ni enehila, tro kö Nyidrëti a thupë ni elany.”

15. Nemene la ka xatua Ezera troa catre mejiun koi Iehova? (Ezera 7:27, 28)

¹⁵ Öhne hi Ezera la Iehova a xatua angeic. Ame la Ezera a mekun hmaca lo itre ijine ce Iehova me angeic, ke celë hi lai ka xatua angeic troa catre mejiune i angeic koi Nyidrë. Hane hi la hnei angeic hna qaja: “Ce Iehova Akötresing me eni.” (E jë la Ezera 7:27, 28.) Traqa koi 5 lao qaja angeice lai, ngöne la tusi angeic.​—Ezera 7:6, 9; 8:18, 22, 31.

16. Eu la tro sa öhne la ixatua i Iehova? (Wange ju fe la iatr.)

¹⁶ Tro Iehova a xatua së la easa cil kowe la ketre jol. Ame la easa sipo drai ne mano koi maseta matre sine la ketre asabele, maine sipo nyidrëti pena troa canga fenes matre sine la itre icasikeu, ke itre ijine lai tro sa öhne la ixatua i Iehova. Tro së lai a sesëkötr la ewekë ka troa traqa. Nge troa catr la mejiune së koi Iehova.

17. Nemene la aqane amamane Ezera laka, ka ipië angeic la kola traqa la itre jol? (Wange ju la pane iatr.)

¹⁷ Hnei Ezera hna ipië me canga sipo ixatua koi Iehova. Ame la kola tru hnei huliwa i Ezera, angeic a canga xei koi Iehova, me thithi koi Nyidrë. (Ezera 8:21-23; 9:3-5) Pine laka, Ezera a qale koi Iehova, matre kola thue aja koi itre xan troa xatua angeic, me nyitipune la lapaune i angeic. (Ezera 10:1-4) Ame la easa hnehengazone la nyine tro sa xen, me aqane tro sa thupëne la fami së, ke loi e tro sa qale koi Iehova, nge thithi koi Nyidrë.

18. Nemene la ka troa xatua së tro palahi a catre mejiune koi Iehova?

¹⁸ Tro ha catre la mejiune së koi Iehova, e tro sa thele ixatua thei Nyidrë, me kapa la ixatua ne la itre trejin. Hna traqa la ketre akötr ka tru koi Erika, ketre thin ka köni nekönatr. Hna uthith la upune i angeic, nge e thupen hna mec la föi angeic. Ngo hnei angeic palahi hna mejiun koi Iehova. Öni angeic e thupen, “Thatre kö së la aqane tro Iehova a xatua së. Ame itre xaa ijin, ena sesëkötr la eni a öhne la ixatua i Nyidrë. Anyimua sa Nyidrëti la itre thithing jëne la itre sineeng. Ame la angatr a ithanata koi ni, me xatua ni, ke canga mama hi Iehova koi ni. Ame la easa fe la hni së kowe la itre sinee së, hmaloi hi koi angatr troa hamë ixatua.”

MEJIUNE JË KOI IEHOVA UTIHË LA PUN

19-20. Nemene la ini hne së hna xom qaathene la angetre Iudra ka tha tro Ierusalema?

¹⁹ Tru la itre ini nyine tro sa xom qaathene la angetre Iudra ka tha hane tro Ierusalema. Ame la itre xan ke, qatre hë angatr, maine hetre sine kucakuca. Nge ame pena itre xan, hetre jol ngöne la fami matre tha ijiji angatre kö troa hane tro. Ngo hnei angatr hna hamë mani me itre xaa ewekë thatraqane la uma ne hmi. (Ezera 1:5, 6) Kola mekun laka, thupene la 19 lao macatre ne traqa lo pane gurup e Ierusalema, kolo palahi a iupifë ahnahna hnene lo itre ka lapa Babulona.​—Zaka. 6:10.

²⁰ Ngacama tha ijiji easë kö troa catre huliwa koi Iehova, ngo Nyidrëti a madrin kowe la itre trengecatr hne së hna kuca. Nemene la ka amamane lai? Hnei Iehova hna upi Zakaria perofeta troa kuca la ketre korona memine la gool me sileva hna hamën hnene la angetre Iudra, ka lapa pë hë e Babulona. (Zaka. 6:11) Nge tro la korona ka mingöminge cili a lapa ngöne la uma ne hmi i Iehova, “nyine amekunëne” la itre ahnahna hna hamën. (Zaka. 6:14) Xecie koi së laka, tha thëthëhmine kö Iehova la itre trengecatr hne së hna kuca ngöne la huliwa i Nyidrë, ngacama tru la itre jol me itre akötr hne së hna melën.​—Heb. 6:10.

21. Nemene la ka troa xatua së troa catre mejiune koi Iehova, ngacama tru la itre jol ka troa traqa?

²¹ Easa melën la itre drai ne la pun, matre tru catre hmaca kö la itre jol hne së hna troa cile kow elany. Nge tro palahi a ngazo catre la mele së. (2 Tim. 3:1, 13) Ngo, the hnehengazo menu kö. Mekune jë së lo hna qaja hnei Iehova kowe la itre hlue i Nyidrë ngöne la hneijine i Hagai, ka hape: “Ce ini hë me nyipunie . . . the qou kö.” (Hag. 2:4, 5) Tu së fe, tro palahi Iehova a ce me easë, e tro sa catre kuca la aja i Nyidrë. Maine tro sa trongëne la itre ini hne së hna kapa qa ngöne la hna perofetan hnei Hagai me Zakaria, me nyitipu Ezera, tro hë së lai a catre mejiune koi Iehova, ngacama tru la itre jol ka troa traqa.