Itre Trejin Jajiny​—Thele Jë Troa Macaj

1. Nemene la nyine tro sa kuca matre macaj ngöne la huliwa i Iehova?

NYINE hain la aqane saqe tru la itre nekönatr. Kösë pëkö trengecatr hnei nyudren hna kuca matre troa tru. Ngo, ame göi troa atre drei Iesu, ke nyipiewekë tro sa nue trengecatr.b (1 Kor. 13:11; Heb. 6:1) Maine easa ajan troa macaj ngöne la huliwa i Akötresie, ke loi e troa catr la imelekeu së me Nyidrë. Ketre, ka nyipiewekë la uati hmitrötr matre troa huliwan la itre thiina i Nyidrë, me inine la itre huliwa ka nyipiewekë, me xom la itre xaa hnëqa elany.​—Ite edomë 1:5.

2. Nemene la hna ini së hnei Genese 1:​27, nge nemene la nyine tro sa ce wang ngöne la tane mekune celë?

² Hnei Iehova hna xup la atr, trahmanyi me föe. (E jë la Genese 1:​27.) Eje hi, tha ka ceitune kö la ngönetrei ne la trahmanyi me föe. Ngo ka isapengöne nyidro ngöne la itre xaa götran. Hnei Iehova hna isa athipe koi nyidro la itre hnëqa, matre nyipiewekë tro nyidro a huliwan la itre thiina me itre hna atrein göi troa eatrën la isa hnëqa i nyidro. (Gen. 2:​18) Ame ngöne la tane mekune celë, tro sa ce wang la nyine tro la trejin jajinyi a kuca matre macaj ngöne la huliwa i Iehova. Nge ame ngöne la tane mekun e thupen, tro pena sa ce wang la nyine troa kuca hnene la trejin nekötrahmany.

HULIWANE JË LA ITRE THIINA I IEHOVA

3-4. Drei la itre tulu ka loi nyine tro la itre trejin jajiny a nyitipun? (Wange ju fe la iatr.)

³ Alanyim la itre föe ka hnim, me nyihlue i Iehova, hna qaja e hnine la Tusi Hmitrötr. (Wange ju la tane mekun “Les femmes dans la Bible : que pouvons-​nous apprendre d’elles ?” ngöne jw.org) Tune la hna qaja ngöne la xötre tan ne la ini celë, itre föe lai ka “atreine tulu ewekë, me nyipici ngöne la nöjei götran asë.” Ketre, hetre trejin föe ka macaj ngöne la ekalesia, nge loi e tro la itre trejin jajinyi a xomi ini qaathei angatr.

⁴ Itre trejin jajiny, hetre trejin föe kö hnei epuni hna atre, ka amamai tulu me hetre thiina ka loi? Nga nyitipu angatre jë. Thele jë la aqane tro fe epuni a huliwan la itre thiina ka ej thei angatr. Ame ngöne la itre paragaraf e thupen, tro sa ce ithanatan la köni thiina nyine tro epuni a huliwan matre troa hane macaj ngöne la huliwa i Iehova.

5. Pine nemene matre nyipiewekë tro la trejin föe a ipië?

⁵ Ame la trejin föe ka macaj, ke ka ipië. Ame la föe ka ipië ke, ka loi la aqane imelekeu i angeic me Iehova, memine la itre xan. (Iako. 4:6) Hnene la ihnimi angeic koi Iehova, matre angeic a metrötrën la itre atr hna acil. (1 Kor. 11:3) Celë hi hnei angeic hna kuca ngöne la ekalesia me ngöne la fami angeic.c

6. Nemene la ini nyine tro la itre trejin jajiny a xom qaathei Rebeka?

⁶ Tro sa ce wang la tulu i Rebeka. Ketre föe ka inamacan, nge tha ka cile kö troa canga xomi mekun. (Gen. 24:58; 27:​5-​17) Ngo tha ka pë metrötre kö eahlo, maine tha idrei. (Gen. 24:​17, 18, 65) Maine tro epuni a canga trongëne la itre hna amekötin hnei Iehova, tui Rebeka, ke epuni hi lai a amamai tulu ka loi kowe la fami epun me kowe la ekalesia.

7. Tro la itre trejin jajinyi a nyitipu Esetera tune kaa?

⁷ Atre hi la itre trejin föe ka macaj la itre ifego i angatr. Öni Tusi Hmitrötr, “thei angete ipië [maine ka atre la itre ifego i angatr] la inamacan.” (Ite edomë 11:2) Esetera la ketre föe ka atre la itre ifego i angeic, nge ka mele nyipici koi Akötresie. Celë hi matre, tha hnei angeice kö hna pi tru me pi draië. Hnei angeice pe hna dreng me trongën la itre eamo hna hamën hnei Modikai, mama i angeic. (Esetera 2:​10, 20, 22) Loi e tro fe epun a tui Esetera, ene la troa sipo ixatua koi itre xan, me trongën la itre eamo i angatr.​—Tito 2:​3-5.

8. Thenge la 1 Timoteo 2:​9, 10, nemene la ka xatuane la ketre trejin föe troa ië iheetre hnyawa?

⁸ Hetre ketre aqane amamane Esetera laka, atre hi angeic la itre ifego i angeic. Ngacama “ketre nekö jajinyi ka mingöminge catre troa goeën,” ngo tha ka wesiwesi kö angeic. (Esetera 2:​7, 15) Nemene la aqane tro la itre trejin jajinyi a nyitipu Esetera? Loi e tro angatr a trongën la hna qaja ngöne 1 Timoteo 2:​9, 10. (E jë.) Paulo aposetolo a ithuecatr kowe la itre trejin föe troa metrötr me atreine tulu ewekë ngöne la aqane heetr. Ame la aliene la hnëewekë qene Geres e celë ke, kola hape, loi e tro la itre trejin föe a heetre hnyawa, me meku itre xan la angatr a ië hna heetr. Madrine catre së kowe la itre trejin föe ka heetre hnyawa!

9. Nemene la hna ini së hnene la tulu i Abigaila?

⁹ Ame la itre trejin föe ka macaj, ke ka atreine waiewekë. Kola hapeue lai? Kola qaja la atr ka atreine wangatrehmekun la loi me ngazo, me axecië mekun ka loi. Tro sa ce wang la tulu i Abigaila. Hnene la föi angeic hna axecië mekun menu, nge tro lai a hetre thangan ka ngazo kowe la fami angeic me itre hlu. Matre tha cile kö Abigaila. Hnene laka, ka atreine waiewekë angeic, matre mele ju kö la fami angeic. (1 Sam. 25:​14-​23, 32-​35) Ketre, ame la atr ka atreine waiewekë, ke atre hi angeic la ijine troa ithanata me ijin troa lapa thaup. Tro fe la thiina cili a xatua së matre tha tro kö a lö hnine menun la itre ifekë jolen.​—1 Thes. 4:​11.

TROA HETRE HNA ATREINE KUCA

10-11. Nemene la itre thangan, e tro epuni a atreine e me cinyany? (Wange ju fe la iatr.)

¹⁰ Loi e tro la itre trejin jajinyi a hetre hna atreine kuca. Ame la itre hna inin hnene la itre neköjajinyi la angatr a co, ke ka nyipiewekë kowe la mele i angatr elany. Tro sa ce wang la itre xaa hnei epun hna inin.

¹¹ Troa atreine e me cinyanyi hnyawa. Ame ngöne la itre xaa nöj, itre atr a mekun ka hape, tha ka nyipiewekë kö tro la itre föe a atreine e me cinyany. Ngo, nyipiewekë tro la itre trejin asë a atreine e me cinyany.d (1 Tim. 4:​13) Matre the nue kö la ketre ewekë troa sewe epun troa inin e me cinyany. Nemene la itre thangan ka loi hnei epun hna troa kapa? Canga tro hi epuni a öhnyi huliwa elany. Ketre, tro epuni a atreine ini Tusi Hmitrötr, me hamë ini koi itre xan. Nge ame la ka sisitria, tro epuni a easenyi catr koi Iehova, jëne la hna e me lapa mekun la Tusi Hmitrötr.​—Ios. 1:8; 1 Tim. 4:​15.

12. Nemene la ini hnei epun hna xom qa ngöne la tusi Ite Edomë 31:26?

¹² Troa atreine dreng, me ithanata amenyiken. Ka nyipiewekë catre lai kowe la itre keresiano. Celë hi hna qaja hnei Iakobo, ka hape: “Nyipiewekë troa saqe dreng, me hmitre ithanata.” (Iako. 1:​19) Ame la easa drei ketre, ke easa thel troa trotrohni angeic, “me ce akötr” me angeic. (1 Pet. 3:8) Maine tha trotrohnine kö epun la hnei angeic hna qaja maine mekun, ke hnyinge jë koi angeic. Nge qëmekene troa ithanata, pane mekune hnyawa jë la nyine troa qaja. (Ite edomë 15:28) Isa hnying jë ka hape: ‘Ka nyipici kö la hnenge hna troa qaja? Ka ithuecatre kö? Eni kö a metrötrë angeic?’ Tru la itre ini hnei epun hna troa xom qaathene la itre trejin föe ka macaj, itre ka atreine dreng, me ithanata amenyiken. (E jë la Ite Edomë 31:26.) Drenge hnyawa ju la aqane ithanata i angatr. Maine tro epuni a atreine dreng me ithanata amenyiken koi itre xan, ke tro ha lolo la aqane imelekeu i epun me angatr.

13. Tune kaa la aqane tro epuni a atreine nyidrawa uma? (Wange ju fe la iatr.)

¹³ Troa atreine nyidrawa uma. Ame ngöne la itre xaa nöj, itre föe la ka kuci jol e kuhu hnalapa. Tro la thine i epun, maine ketre trejin föe a ini epun la aqane troa kuca la itre jole cili. Öni Cindy, ketre trejin föe: “Ame la ketre ini ka tru hna hamë ni hnei nenë, ke ene la troa madrin ngöne la kola catre huliwa. Hnei eahlo hna ini ni troa kuci xen, me nyidrawa uma, me cai maano, me komisio. Celë hi ka xatua ni ngöne la meleng, me ngöne la huliwa i Iehova. Hnei nenë mina fe hna ini ni troa ikep, nge celë hi ka aijijë ni troa atre la itre trejin ka loi thiina, me nyitipu angatr.” (Ite edomë 31:​15, 21, 22) Ame la föe ka catre huliwa, ka ikep me ka atreine nyidrawa uma, ke ketre manathith kowe la hnalapa me kowe la ekalesia.​—Ite edomë 31:​13, 17, 27; Itre hu. 16:15.

14. Nemene la hna ini së hnene la hna melën hnei Crystal, nge nemene la hne së hna troa amë panën ngöne la mele së?

¹⁴ Troa atreine isa debruie. Ka nyipiewekë tro la itre keresiano a “inine troa melëne la hna hetreny”. (Fil. 4:​11) Öni Crystal ketre trejin föe: “Hnei kaka me nenë hna xatua ni troa iën hnyawan la huliwa hnenge hna troa kuca elany. Hnei nyidro hna xatua ni troa inine la ketre métier. Hnei kaka hna ithuecatre koi ni troa inine la comptabilité, nge celë hi ka xatua ni e thupen.” Ka nyipiewekë troa ini matre hetre huliwa. Ngo ka nyipiewekë catre fe troa atreine huliwane hnyawane la mani. (Ite edomë 31:​16, 18) Loi e tro palahi a amë panëne la huliwa i Iehova ngöne la mele i epun. Matre the xomi gufa menu kö, nge melëne jë la hna hetreny.​—1 Tim. 6:8.

HNËKË JË KOWE LA ITRE XAA HNËQA ELANY

15-16. Pine nemene matre ka nyipiewekë la itre trejin föe ka tha faipoipo kö ngöne la ekalesia? (Mareko 10:​29, 30)

¹⁵ Maine tro epuni a melëne la itre thiina i Iehova, me hetre hna atreine kuca, ke tro lai a xatua epun troa xom la itre xaa hnëqa elany. Tro sa ce wang la itre xaa hnëqa cili.

¹⁶ E tha pi faipoipo kö epun. Tune la hna qaja hnei Iesu, itre xaa trejin föe a iën troa tha faipoipo, ngacama tha hna majemine kö ngöne la nöje i angatr. (Mat. 19:​10-​12) Hetre xaa kepin matre tha faipoipo kö la itre xaa trejin föe. Ngo the luelue kö laka, tru la ihnimi Iehova me Iesu kowe la itre trejin föe ka tha faipoipo kö. Ame ngöne la fen asë, lolo catr la tulu hna amamane hnene la itre trejin föe ka tha faipoipo kö ngöne la ekalesia. Hnene la aqane hnim me nyipiewekën angatr la itre xaa trejin, matre itre xan a xom ceitu angatr me itre xa me itre thin, ngöne la ekalesia.​—E jë la Mareko 10:​29, 30; 1 Tim. 5:2.

17. Tune kaa la aqane tro la ketre trejin föe a hnëkë matre huliwa i Iehova drai ka pexej?

¹⁷ Troa huliwa i Iehova drai ka pexej. Tru la hna kuca hnene la itre trejin föe ngöne la huliwa ne cainöj. (Sal. 68:11) Ijiji epuni kö troa huliwa i Iehova drai ka pexej? Maine jë epuni a pi pionie, maine huliwa ngöne la hnë xupi Uma Ne Baselaia, maine ngöne la Bethela pena. Qaja jë koi Iehova la aja i epun. Ithanata jë memine la itre trejin ka xome hë la itre huliwa cili, nge thele jë la nyine tro epuni a kuca matre eatrën la aja i epun. E thupen, kuca jë la ketre porogaram. Maine tro epuni a huliwa i Iehova drai ka pexej, tro epuni lai a kapa la itre manathith ka tru.

18. Pine nemene matre nyipiewekë tro la trejin föe a iëne hnyawan la trahmany hnei angeic hna troa faipoipo memin? (Wange ju fe la iatr.)

¹⁸ Troa faipoipo. Tro la itre thiina me itre huliwa hne së hna ce wang ngöne la tane mekun celë, a xatua epun troa xom hnyawa la hnëqa ne föe elany. Maine epuni a mekun troa faipoipo, ke nyipiewekë tro epuni a iëne hnyawan la föi epun. Ketre mekune ka tru lai, hnei epun hna troa xom ngöne la mele i epun. The thëthëhmine kö laka, tro hë epuni a lapa fene la musi ne la trahmanyi hnei epun hna troa faipoipo memin. (Rom. 7:2; Efe. 5:​23, 33) Haawe, isa hnyinge jë ka hape: ‘Ka macaje kö angeic? Angeice kö a amë panë Iehova ngöne la mele i angeic? Ka inamacane kö la aqane axecië mekune i angeic? Angeic kö a canga qeje menu? Angeice kö a metrötrën la itre föe? Tro kö angeic elany a hnimi ni, me thupë ni hnyawa, me acatrene la imelekeung me Iehova? Angeice kö a xom hnyawane la itre hnëqa? Nemene la itre hnëqa hna athipi koi angeic ngöne la ekalesia? Nge angeice kö a eatrën hnyawan?’ (Luka 16:10; 1 Tim. 5:8) Eje hi, maine epun a thel la ketre trejin trahmany ka lolo, loi e tro fe epuni a hetre thiina ka loi.

19. Kolo kö a thaipiëne la itre föe la kola qeje angatr ka hape, “ixatua” kowe la föi angatr?

¹⁹ Öni Tusi Hmitrötr, ame la föe ke, “ketre ixatua” ka ‘ihmeku’ kowe la föi angeic. (Gen. 2:​18) Kolo kö lai a thaipiëne la itre föe? Waea! Kolo pe a wangatrunyi angatr, ke Tusi Hmitrötr a hane qeje Iehova ka hape, “ate xatua.” (Sal. 54:4; Heb. 13:6) Tro la föe a xatuane la trahmany, ngöne la angeic a ce huliwa me ca mekun me nyidrë, la nyidrëti a axecië mekun kowe la fami. Nge pine laka, tru la ihnimi angeic koi Iehova, matre angeic a qaja aloine la föi angeic koi itre xan. (Ite edomë 31:​11, 12; 1 Tim. 3:​11) Qëmekene tro epuni a xom la hnëqa cili, acatrene jë la ihnimi epun koi Iehova, nge xatuane jë la fami epun memine la itre trejin ne la ekalesia.

20. Nemene la ixatua ne la thin kowe la fami angeic?

²⁰ Troa hetre nekönatr. Maine tro epuni a faipoipo elany, ma tro fe hë epun lai a hetre nekönatr. (Sal. 127:3) Haawe nyipiewekë tro epuni a hnëkë matre troa xom la hnëqa ne thin. Tro la itre thiina me itre huliwa hne së hna ce wang a xatua epun elany, e hetre nekö i epuni hë. Tro la ihnimi epun, me thiina ka loi me xomihni a xatuane la fami epun troa madrin. Nge tro hë la itre nekö i epun a mele tingeting me madrin.​—Ite edomë 24:3.

21. Tune kaa la aqane goeëne së la itre trejin föe, nge pine nemen? (Wange ju fe la iatr.)

²¹ Itre trejin föe fe, tru la ihnimi eahun koi epun, ke epuni a huliwa catr koi Iehova me kowe la itre trejin. (Heb. 6:​10) Epuni a isine troa huliwan la itre thiina i Iehova, me hetre hna atreine kuca, me hnëkë kowe la itre xaa hnëqa elany. Ka nyipiewekë epun ngöne la organizasio i Iehova!