Nyine Tro Sa Kuca Matre Hetrenyi La Mele Ka Pë Pun

1. Hnauëne la itre atr a mekune laka, tha ijiji së kö troa hetreny la mele ka pë pun?

ALA nyimu la itre atr ka thupëne la aqane xen me kuci sport lapa, matre tha tro kö a tithi angatr hnei mec. Ngo atre hi angatr ka hape, tro palahi angatre lai a qatre trootro me mec. Matre ame koi angatr, tha ijije kö tro la atr a mele palua. Ngo ame ngöne Ioane 3:​16 me 5:​24, hnei Iesu hna qaja ka hape, ijije hi tro la itre atr a hetreny la “mele ka pë pun.”

2. Nemene la hna qaja ngöne Ioane mekene 6 göne la mele ka pë pun? (Ioane 6:​39, 40)

² Jëne la ketre iamamanyikeu, hnei Iesu hna ithuane hnei falawa me i, la itre thauzan lao atr.a Ka mingöminge catr la hnei nyidrëti hna kuca. Ngo ka sisitria catre kö la hnei nyidrëti hna qaja lo drai thupen. Hnene la ka ala nyimu hna xötrethenge nyidrë a tro Kaperenauma, nge tha nanyi kö qa Galilaia. E cili, hnei nyidrëti hna qaja koi angatr ka hape, troa amelene hmaca la itre ka mec, nge tro angatr a mele utihë epine palua. (E jë la Ioane 6:​39, 40.) Pane mekune jë la itre sinee me atrene la fami eö ka meci hë. Iesu hi lai a qaja ka hape, ala nyimu la itre ka mec hna troa amelene hmaca. Nge ijije hi tro eö me itre sinee i eö hna troa amelene a hetrenyi la mele ka pë pun. Ngo tha trotrohnine kö la itre atr la hnei Iesu hna qaja e thupen. Tro sa ce wange lai ngöne la tusi Ioane mekene 6.

3. Thenge la Ioane 6:​51, nemene la hnei Iesu hna qaja göi nyidrë?

³ Thupene la Iesu a thuane la ka ala nyimu hnei falawa, canga mekune ju hi angatr lo mana hnei Iehova hna hamëne kowe la angetre Isaraela ngöne la hnapapa. Ame ngöne la Itre Hna Cinyihan, hna hëne la mana ka hape “falawa qa hnengödrai.” (Sal. 105:40; Ioa. 6:​31) Tro Iesu a hamë angatre la ketre ini ka nyipiewekë jëne la mana. Ngacama ahnahna lai qaathei Akötresie, ngo ame lo itre ka xen ekö, ke meci hë angatr enehila. (Ioa. 6:​49) Ame pena Iesu, nyidrëti a qeje nyidrëti kö ka hape ‘nyipi falawa qaa hnengödrai,’ me “falawa i Akötresie,” me “falawa ne mel.” (Ioa. 6:​32, 33, 35) Hnei nyidrëti hna qaja la eisapengönene la mana me nyidrë. Öni nyidrë: “Eni hi la falawa ne mel ka uti qaa hnengödrai. Nge maine tro la ketre a xeni la falawa cili, tro hë angeic a mel epine palua.” (E jë la Ioane 6:​51.) Kola sesëkötre la angetre Iudra. Nge tha trotrohnine kö angatr. Hnauëne la Iesu hi a qeje nyidrë ka hape, “falawa” ka uti qaa hnengödrai, nge ka sisitria catre kö hune lo mana hnei Akötresieti hna hamëne kowe la itre qaqa i angatr? Matre öni Iesu koi angatr: “Ame la falawa hnenge hna troa hamën, tre, ngönetreing.” Nemene jë la aliene lai? Nyipiewekë troa sa la hnyinge cili, ke eje a qaja amaman la aqane tro së me itre sinee së ka meci hë a kapa la mele ka pë pun. Haawe, tro sa ce wange lai.

FALAWA NE MEL ME IJÖNE I NYIDRË

4. Hnauëne la kola sesëkötre la angetre Iudra?

⁴ Kola sesëkötre la itre ka drei Iesu, la nyidrëti a qaja ka hape, tro nyidrëti a hamëne la ngönetrei nyidrë “nyine amelene la fen.” Maine jë angatr a mekune ka hape, aja i nyidrë tro angatr a öni la ijöne i nyidrë. (Ioa. 6:​52) Ngo hnei Iesu hna qaja la ketre ewekë ka jole catre hmaca kö troa trotrohnin. Öni nyidrë: “Pëkö mel thei nyipunie e tha pane öni kö nyipunie la ijön ne la Nekö i Atr, me iji la madra i angeic.”​—Ioa. 6:​53.

5. Nemene la ka amamane ka hape, tha Iesu kö a hëne la itre atr troa ije la madra i nyidrë?

⁵ Ame ngöne lo hneijine i Noa, hnei Iehova hna wathebone la itre atr troa öni madra. (Gen. 9:​3, 4) Hnei Iehova hna amexeje hmaca la hna amekötine cili lo Nyidrëti a hamëne la Wathebo koi angetre Isaraela. Ame la atr ka ena la wathebo cili, ke troa “apatrenyi angeic” maine humuth. (Lev. 7:​27) Eje hi, ka metrötrëne Iesu la Wathebo. (Mat. 5:​17-​19) Celë hi matre, tha tro kö Iesu lai a ukune la angetre Iudra troa öni la ijöne i nyidrë maine iji la madra i nyidrë. Ngo jëne la trengewekë cili, nyidrëti a ini angatr la aqane troa kapa la mel, ene la “mele ka pë pun.”​—Ioa. 6:​54.

6. Nemene la aqane tro sa trotrohnine la hna qaja hnei Iesu?

⁶ Nemene la ini hna pi hamën hnei Iesu? Easa trotrohnine laka, Iesu a xom la ketre ceitun la nyidrëti a ithanata kowe la ka ala nyim. Tune lo ijine nyidrëti a ithanata kowe la föe ne Samaria. Öni nyidrë: “Ngo ame la atre iji qaa ngöne la tim hnenge hna troa hamën, tha tro hmaca kö angeice lai a hane pi ij, nge tro la timi cili a tune la qeqe ne tim ka neni lapa thei angeic, nge ka hamë mele ka pë pun.” (Ioa. 4:​7, 14)b Tha Iesu kö a qaja e celë ka hape, hetre tim nyine tro la föe ne Samaria a ij, matre kapa la mele ka pë pun. Ketre tun, tha nyidrëti kö a upe la ka ala nyimu e Kaperenauma troa öni la ijön me ije la madra i nyidrë, matre kapa la mele ka pë pun.

ISAPENGÖNE KÖ LA LUE IJIN

7. Nemene la hna qaja hnei itre xan göne la itre trengewekë i Iesu ngöne Ioane 6:​53?

⁷ Itre xaa hmi a qaja ka hape, ame ngöne Ioane 6:​53, hnei Iesu hna acile la ketre tulu nyine troa xötrethengen ngöne la ijine Xeni Heji Ne La Joxu. Hnauëne la angatr a mekun tun? Ke ame lo heji cili, casi hi la itre hnaewekë hnei nyidrëti hna huliwane matre qaja la ngönetrei me madra i nyidrë. (Mat. 26:​26-​28) Angatr a qaja ka hape, ame ngöne la ijine Xeni Heji Ne La Joxu, tro asë hi la itre atr a xeni la falawa me iji la waina hna ihamënekeun. Hapeu, eje kö lai? Nyipiewekë tro sa waipengöne lai, ke ame e nöjei macatre, ngöne la fen asë, itre milio lao atr ka ce atrune me easë la ijine cili. Eje hi laka, isapengöne kö la hnei Iesu hna qaja ngöne Ioane 6:​53 me ngöne lo ijine Xeni Heji Ne La Joxu. Nemene la ka isapengön?

8. Qaja jë la lue ewekë ka isapengöne ngöne la lue ijin. (Wange ju fe la iatr.)

⁸ Tro sa ce wange la lue ewekë ka isapengön ngöne la lue ijine cili. Ame la hnapan, eu, nge ekaa la Iesu a qaja la itre trengewekë ka mama ngöne Ioane 6:​53-​56? Hnei Iesu hna qaja la itre trengewekë celë lo macatre 32 M.K., e Galilaia qëmekene la itre thauzane lao itretre Iudra. Nge ame lo macatre thupen, Iesu a acile la Xeni Heji Ne La Joxu, e Ierusalema. Ame la hnaaluen, Iesu a ithanata koi drei? Nyidrëti a ithanata kowe la itre atr ka hnehengazo göi xen hune la troa atre Iehova. (Ioa. 6:​26) Eje hi laka, ame la Iesu a qaja koi angatr la ketre ewekë ka jol troa trotrohnin, ke hnei angatr hna canga nuetriji nyidrë. Goi trotriji nyidrëti fe hnene la itre xaa atre dreng. (Ioa. 6:​14, 36, 42, 60, 64, 66) Tro sa ce wange la eisapengönene la angetre Iudra, memine lo ala Levin ka ce me Iesu lo kola acile la Xeni Heji Ne La Joxu lo 33 M.K. Ngacama tha trotrohnine kö la itre aposetolo la itre xaa ini i Iesu, ngo ce angatr me nyidrë lo heji cili. Xecie koi angatr laka, Iesu hi la Nekö i Akötresie, ka uti qa hnengödrai. Tha ceitu angatre kö memine lo angetre Iudra qa Galilaia. (Mat. 16:16) Hnei Iesu hna felisite la itre aposetolo me hape: “Hnei nyipunieti pala hi hna ce me eni ngöne la itre akötreng.” (Luka 22:28) Lue ewekë lai ka amamane ka hape, ame Ioane 6:​53, ke tha tulu kö hnei Iesu hna acile göne la Xeni Heji Ne La Joxu. Ngo hetre xaa ewekë ka isapengön.

THATRAQAI EÖ FE

9. Iesu a ithanata koi drei ngöne lo ijine Xeni Heji Ne La Joxu?

⁹ Ame ngöne lo ijin ne Xeni Heji Ne La Joxu, hnei Iesu hna hamëne kowe la itre aposetolo la falawa hna tha levenene kö nyine nyihatrene la ngönetrei nyidrë. E thupen, nyidrëti a hamëne pi la neköi ver ne waina nyine nyihatrene la “madra ne isisinyikeu.” (Mar. 14:​22-​25; Luka 22:20; 1 Kor. 11:24) Ka nyipiewekë catr la hnei nyidrë hna qaja. Ame la isisinyikeu ka hnyipixe, ke hna kuca hmekuje hi memine “Isaraela [i Akötresie]” ka troa sine la “Baselaia i Akötresie.” (Heb. 8:​6, 10; 9:​15) Ame ngöne la ijine cili, tha trotrohnine pala kö la itre aposetolo la ini celë. Ngo itre drai thupen, troa sië angatr hnei uati hmitrötr, matre nyiqane nyiatrene la isisinyikeu ka hnyipixe, me hane lapa ezi Iesu e hnengödrai.​—Ioa. 14:​2, 3.

10. Nemene la ketre mekune ka isapengön ngöne lo Iesu a ithanata e Galilaia memine lo ijine Xeni Heji Ne La Joxu? (Wange ju fe la iatr.)

¹⁰ Ame lo ijin ne Xeni Heji Ne La Joxu, Iesu a ithanata kowe la “itre mamoe ka xalaith.” Ame la itre ka pane nyiatrene lai gurup, ke kolo itre aposetolo ka mele nyipici, nge ka ce me nyidrë lo ijine cili. (Luka 12:32) Angatre me itre xan ka troa sine la gurup cili e thupen, la ka ijij troa xome la falawa me waina. Angatre hmekuje hi la ka troa ce lapa me Iesu e hnengödrai. Ame lo itre hnei Iesu hna qaja e Galilaia, ke thatraqane la ka ala nyim, ngo ame kö la hnei nyidrëti hna qaja ngöne lo ijine Xeni Heji Ne La Joxu, ke thatraqane hmekuje hi la neköi gurup ka co.

11. Nemene la ka amamane ka hape, ame lo Iesu a ithanata e Galilaia, ke tha nyidrëti kö a mekune la neköi gurup?

¹¹ Ame lo macatre 32 M.K., e Galilaia, hnei Iesu hna ithanata kowe la angetre Iudra ka thele xen. Ame pe, hnei nyidrëti hna thel troa ini angatr laka, hetre ewekë ka sisitria catre kö hune la xen, nge ka troa hamë angatr la mele ka pë pun. Goi qaja fe nyidrë ka hape, troa amelene hmaca elanyi la itre ka mec me hamë angatr la mele ka pë pun. Ame lo ijine cili e Galilaia, tha nyidrëti kö a mekune lo neköi gurup ka co, lo hnei nyidrëti hna troa ithanata memin ngöne la ijine Xeni Heji Ne La Joxu. Nyidrëti pe a qaja la manathith hna troa kapa hnene la nöjei atr. Öni nyidrë: “Maine tro la ketre a xeni la falawa cili, tro hë angeic a mel epine palua; ke ame la falawa hnenge hna troa hamën, tre, ngönetreing nyine amelene la fen.”​—Ioa. 6:​51.c

12. Nemene la nyine troa kuca matre hetrenyi la mele ka pë pun?

¹² Ame lo Iesu e Galilaia, tha hnei nyidrëti kö hna qaja kowe la angetre Iudra ka hape, tro la nöjei atr ka mel a hetreny la mele ka pë pun. Waea! Tro hmekuje hi la itre ka “xeni la falawa cili,” ene la itre atr ka lapaun, la ka troa hetrenyi la mele ka pë pun. Ala nyimu la itre atr ka hmi ka mekune ka hape, troa amele së, e tro hi sa mejiune koi Iesu, me qaja ka hape, nyidrëti la iamele. (Ioa. 6:​29) Ngo ame ekö, ala nyimu la itre atr ka mejiune koi Iesu lo xötrei, nge hnei angatr pë hë hna nuetriji nyidrë. Pine nemen?

13. Kola hapeu la troa atre drei Iesu?

¹³ Ame thene la itre atr hnei Iesu hna ithuan, alanyim la itre ka xötrethenge nyidrë goi thupen. Angatr a ajan tro Iesu a aloine la itre mec, me thua i angatr, nge angatre hi a pi dreng la itre ini hnei angatr hna ajan. Celë hi matre, hnei Iesu hna amaman hnyawa koi angatr ka hape, tha hna upi nyidrëti kö qa hnengödrai, matre hamëne la hnei angatr hna ajan. Ngo hna upi nyidrë matre ini angatr la aqane troa atre drei Keriso. Ketre, hnei nyidrë hna hëne la itre atr troa “tro koi” nyidrë, ene la troa kapa asë la itre ini i nyidrë me trongëne itre ej.​—Ioa. 5:​40; 6:​44.

14. Nemene la nyine tro sa kuca matre kepe thangane lai ijön me madra i Iesu?

¹⁴ Hnei Iesu hna amexeje kowe la ka ala nyimu la enyipiewekën troa lapaun. Troa lapaun koi nemen? Troa lapaun kowe la ijön me madra hnei nyidrëti hna troa hamën, ke celë hi ka troa aijijë angatr troa hetreny la mele ka pë pun. Matre nyipiewekë tro la angetre Iudra ka drei Iesu a lapaun, nge tui së fe enehila. (Ioa. 6:​40) Eje hi, tune la hna qaja ngöne Ioane 6:​53, nyipiewekë tro sa lapaune kowe la thupene mel, matre kepe thangane la ijön me madra i Iesu. Ketre, ame la itre manathith ka xulu qa ngöne la thupene mel, ke thatraqai nöjei atr asë.​—Efe. 1:7.

15-16. Nemene la itre ini ka tru ka mama ngöne Ioane mekene 6?

¹⁵ Ka sisitria koi së asë me kowe fe la itre sinee së ka patre hë, la hna qaja ngöne Ioane mekene 6. Kola mama e cili la etrune la ihnimi Iesu. Ame lo nyidrëti e Galilaia, hnei nyidrëti hna aloine la itre sine mec, me inine kowe la ka ala nyimu la itre nyipici göne la Baselaia, me thua i angatr. (Luka 9:​11; Ioa. 6:​2, 11, 12) Nge ame la ka nyipiewekë, hnei nyidrëti hna qaja amamane koi angatr ka hape, nyidrëti hi “la falawa ne mel.”​—Ioa. 6:​35, 48.

¹⁶ Ame ngöne la kola atrune la Xeni Heji Ne La Joxu, tha tro kö la “itre xa mamoe” a hane xen la falawa me iji la waina. (Ioa. 10:16) Ngo, angatre fe a hane kepe thangane qa ngöne la ijöne me madra i Iesu Keriso. Kösë angatr a xen la falawa ne mel, la angatr a lapaune kowe la mel hna huujën hnei Iesu. (Ioa. 6:​53) Ngo ame kö la itre atr ka troa xen la falawa me ije la waina, ke kolo hmekuje hi la itre ka sine la isisinyikeu ka hnyipixe, me ka troa ce mus me Iesu ngöne la Baselaia e hnengödrai. Haawe, itre hna iëne ju hë së, maine itre xaa mamoe, ngo ka nyipiewekë koi së asë la tusi Ioane mekene 6. Ej a amamane koi së la ketre nyipici ka tru laka, nyipiewekë troa lapaune matre kapa la mele ka pë pun.