Kapa Ju Laka Hetre Ewekë Hne Së Hna Thatre

1. Hnei Iehova hna xupi së tune kaa, nge pine nemen?

MINGÖMING la aqane xupi së hnei Iehova. Hnei Nyidrë hna aijijë së troa mekun, me inine la itre ewekë ka hnyipixe, me trongëne la hne së hna inin. Hnauëne la Nyidrëti a xupi së tune lai? Ke aja i Nyidrë tro sa atrepengöi Nyidrë me nyihlue i Nyidrë cememine la mekune ka pexej.​—It. Ed. 2:​1-5; Roma 12:1.

2. (a) Nemene la nyine tro sa trotrohnine hnyawan? (Iobu 37:​23, 24) (Wange ju fe la foto.) (b) Pine nemen matre troa lolo la mele së e trotrohnine hi së laka, hetre ewekë hne së hna thatre?

² Ngacama atreine së inine la itre xaa ewekë, ngo tru pala kö la itre ewekë hne së hna thatre. (E jë la Iobu 37:​23, 24.) Tro sa ce wange la tulu i Iobu. Anyimua hnyinge Iehova koi Iobu, matre tro angeic a öhne ka hape, ka hetre ifegone la inamacane i angeic. Celë hi matre hnei Iobu hna ipië, me saze la aqane mekuna i angeic. (Iobu 42:​3-6) Ketre tun, troa lolo la mele së e trotrohnine hi së laka, hetre ewekë hne së hna thatre. Eje hi, tro ha xecie koi së laka, Iehova a qaja koi së la ka ijij, matre axecië mekune ka loi.​—It. Ed. 2:6.

3. Nemene la nyine tro sa ce wang ngöne la tane mekune celë?

³ Ame ngöne la tane mekune celë, tro sa ce wange la itre xaa ewekë hne së hna thatre. Tro mina fe sa ce wange la kepine matre jole koi së troa thatre la itre ewekë cili, memine la eloine koi së troa thatre. Tro lai a acatrene la mejiune së laka, Iehova la “Atre ka hetre nyipi inamacan,” nge Nyidrë a qaja koi së la nyine tro hi së a atre.​—Iobu 37:16.

THATRE KÖ SË LA DRAI NE TROA NYIPUNE LA FEN CELË

4. Thenge la Mataio 24:​36, nemene la ketre ewekë hne së hna thatre?

⁴ E jë la Mataio 24:36. Thatre kö së la ijin troa apatrene la fen celë. Goi thatre fe Iesu la “drai me hawa”a lo nyidrëti e celë fen. Öni nyidrë kowe la itre aposetolo ka hape, Iehova kö la ka musinëne la traem me “sa” la ijine troa eatr la itre hna perofetan. (It. Hu. 1:​6, 7) Ase hë Iehova sa la drai ne tro Nyidrëti a apatrene la fen celë, ngo tha hna aijijë së kö troa hane atre la drai cili.

5. Pine nemene matre ka jol troa thatre la drai ne troa nyipune la fene celë?

⁵ Eje hi, thatre kö së ka hape, tro së a itreqe uti hë eu, qëmekene troa traqa la pun. Maine hekö hë së lapa treqene la drai cili, tro së lai a thatreine itreqe me dekurag. Nge jole catr e kola hnyimasai së hnene la fami së me itre xan. (2 Pet. 3:​3, 4) Maine jë easa mekune ka hape, ka loi la troa atre la drai cili, matre troa atreine itreqe me xomihnine la ihnyimasai.

6. Pine nemen matre hetre eloin la tro sa thatre la drai ne troa nyipune la fene celë?

⁶ Tha hnei Iehova kö hna qaja la drai ne troa nyipune la fene celë, matre tro sa amamane la ihnim me mejiune së koi Nyidrë. Xele së troa nyihlue i Iehova uti hë la drai hna sa, ngo uti hë epine palua. Tha tro kö sa mekune la ‘drai hnei Iehova’ hna sa, ngo loi pe la itre manathith ka troa traqa e thupen. Tro hë së lai a acatrene la imelekeu së me Iehova me amadrinë Nyidrë.​—2 Pet. 3:​11, 12.

7. Nemene la hne së hna atre?

⁷ Loi e tro sa lapa mekune la hne së hna atre. Atre hi së laka, hna nyiqane la itre drai ne la pun lo 1914. Hnei Iehova hna perofetane ngöne la Tusi Hmitrötr, la itre ewekë ka troa traqa qaane lo macatre cili. Pine laka, kola eatre enehila la itre hna perofetan, xecie koi së laka, “easenyi hë la drai ka tru i Iehova.” (Zefa. 1:​14) Ketre, atre hi së laka, aja i Iehova tro sa ce thawa me itre xan la “maca ka loi ne la Baselaia.” (Mat. 24:14) Hna cainöjëne la maca cili ngöne la 240 lao nöj nge hetre munën, me ngöne la 1 000 lao qene hlapa. Tha nyipiewekë kö tro sa atre la “drai me hawa” matre catre cainöjëne la maca ne iamele.

THATRE KÖ SË LA AQANE XATUA SË HNEI IEHOVA

8. Kola hapeu la hnaewekë “huliwa hna kuca hnene la nyipi Akötresie”? (Atre Cainöj 11:5)

⁸ Ame itre xaa ijin, tha trotrohnine kö së la “huliwa hna kuca hnene la nyipi Akötresie.” (E jë la Atre Cainöj 11:5.) Kola qaja e celë la hnei Iehova hna kuca, maine hna aijijën, matre eatre la aja i Nyidrë. Thatre kö së la kepine matre, Iehova a nue la ketre ewekë troa traqa, maine aqane xatua së hnei Nyidrë. (Sal. 37:5) Ceitune hi lai memine la aqane kökötr la medreng e kuhu hni i thin. Thatre kö la itre ka inamacan la aqane trongene la ewekë cili.

9. Nemene la thangane la troa thatre la aqane xatua së hnei Iehova?

⁹ E thatre kö së la aqane xatua së hnei Iehova, ke tro së lai a luelu. Eje hi, tro sa xou troa akökötrene la huliwa ne cainöj me ahmaloeëne la mele së, maine tro kowe la ketre götran ka aja ixatua. Ketre, ame itre xaa ijin, tha eatrëne kö së la itre objectif ngöne la huliwa i Iehova, maine ketre hnëqa hna athip koi së ngöne la organizasio, nge tru la itre jol hne së hna cile kow, maine pëkö thangan la hne së hna cainöj. Ame e cili, easa mekune ka hape, tha madrine kö Iehova koi së.

10. Pine laka thatre kö së la aqane xatua së hnei Iehova, nemene la itre thiina hne së hna huliwan?

¹⁰ Pine laka, thatre kö së la aqane tro Iehova a xatua së, matre kola aijijë së troa huliwane la itre thiina, tune la ipië me atre la itre ifego së. Kolo fe a amamane koi së laka, ka draië catre kö la itre mekun me aqane ujë i Iehova hui easë. (Isa. 55:​8, 9) Ketre, kola ini së troa catre mejiun koi Iehova. Matre ame la kola hetre thangane la cainöje së, maine easa eatrëne hnyawane la huliwa së ngöne la organizasio i Iehova, ke loi e tro sa atrunyi Nyidrë. (Sal. 127:1; 1 Kor. 3:7) Nge e pëkö thangane la huliwa së koi Iehova, the thëthëhmine kö laka, öhne kö Iehova la itre ewekë ka traqa. (Isa. 26:12) Isa kuca jë pe së la isa hnëqa së, nge tro pë hë Iehova a kuca la hnëqa i Nyidrë. The luelue kö laka, tro kö Nyidrëti a eatrongë së, ngacama tha Nyidrëti hmaca kö a kuca la itre iamamanyikeu tun ekö.​—It. Hu. 16:​6-​10.

11. Nemene la itre ewekë hne së hna atre?

¹¹ Nemene la itre ewekë hne së hna atre? Atre hi së ka hape, ka ihnim me meköt me inamacan la aqane ujë i Iehova. Nge Nyidrëti a wangatrune la itre hne së hna kuca koi Nyidrë me kowe la itre trejin. Ketre, Nyidrëti a amanathithine la itre ka mele nyipici koi Nyidrë.​—Heb. 11:6.

THATRE KÖ SË LA KA TROA TRAQA ELANY

12. Thenge la Iakobo 4:​13, 14, nemen la hne së hna thatre?

¹² E jë la Iakobo 4:​13, 14. Thatre kö së la ewekë ka troa traqa elany. Eje hi, ame ngöne la fen celë, kola traqa koi së asë “la itre ijine jol, me itre ewekë ka iasesëkötrë.” (A. Cai. 9:​11) Celë hi matre, thatre kö së laka, tro kö a eatr la itre projet së, nge mele palakö së elanyi la kola eatr.

13. Tune kaa së e thatre kö së la itre ewekë ka troa traqa elany?

¹³ Tha ka hmaloi kö troa lapa, nge thatre kö së la itre ewekë ka troa traqa elany. Maine tro pala hi sa mainëne la itre ewekë ka troa traqa elany, ke tro lai a thapa la madrine së. Nge ame la kola asesëkötrë së hnene la itre jol me itre akötr, ke kola ahleuhleunyi së. Nge maine tha eatre kö la itre mekuna së, ke tro së lai a dekurag.​—It. Ed. 13:12.

14. Nemene la ka thue madrine koi së? (Wange ju fe la foto.)

¹⁴ Ame la easa cile catr qëmekene la itre jol, ke easë hi lai a amamane koi Iehova ka hape, easa hnimi Nyidrë, ngo tha easë kö a nyihlue i Nyidrë goi thupen. Kola amamane ngöne la Tusi Hmitrötr laka, tha Iehova kö a thepe së qa ngöne la nöjei itupath. Nge tha qaathei Nyidrëti kö la itre jol ka traqa koi së. Atre hi Nyidrë laka, ame la ka thue madrine koi së, ke tha ene kö la troa atre la itre ewekë ka troa traqa elany, ngo ene la troa thele eamo thei Nyidrë me trongën. (Iere. 10:23) Ame la easa thel troa atre la mekuna i Iehova qëmeken troa axecië mekun, kösë easë hi lai a qaja ka hape: “Maine aja i Iehova, tro sa mel, me kuca la ewekë celë maine ewekë cili.”​—Iako. 4:​15.

15. Nemene la hne së hna atre göne la itre drai elany?

¹⁵ Thatre kö së la ewekë ka troa traqa elany. Ngo atre hi së laka, tro Iehova a hamë së la mel ka pë pun e celë fen, nge e koho hnengödrai koi itre xan. Ketre atre hi së laka, tha ka thoi kö Iehova. Nge pëkö ketre ewekë ka troa sewe Nyidrë troa kuca la aja i Nyidrë. (Tito 1:2) Nyidrëti hmekuje hi la ka atreine ‘qaja amamane la pun nge qaan ekö Nyidrëti a qaja la itre ewekë hna tha kuca petre kö.’ Celë hi hne së hna öhn ekö, nge hne së hna troa öhn elany. (Isa. 46:10) Ketre atre fe hi së laka, thatreine kö ketre sewe Iehova troa hnimi së. (Roma 8:​35-​39) Tro kö Nyidrëti a hamë së la inamacan, me trengecatr troa xomihnine la itre ewekë ka traqa koi së. Loi e xecie koi së laka, tro kö Nyidrëti a xatua së me amanathithi së.​—Iere. 17:​7, 8.

THA TROTROHNINE KÖ SË LA AQANE ATRE SË HNEI IEHOVA

16. Nemene inamacan hna qaja ngöne Salamo 139:​1-6, nge hnauëne laka thatreine kö së trotrohnin?

¹⁶ E jë la Salamo 139:​1-6. Atre hnyawa hi Iehova la aqane xupi së. Atre hi Nyidrë la pengöne la ngönetrei së, memine la aliene hni së me itre mekuna së. Nyidrëti pala hi a meku së. Atre hi Nyidrë la hne së hna qaja me pi qaja. Ketre, atre hi Nyidrë la hne së hna kuca, me kepin, matre easa kuca. Tune la hnei Dravita joxu hna qaja, Iehova pala hi a hnimi së me thupë së. Hapeu, tha madrine kö së la kola sikusiku së hnene la Atre Ka Sisitria, lo Atre Xup la hnengödrai me fen hnengödrai? Casi hi la mekuna së me Dravita lo kola hape: “Tha trotrohnine kö ni la inamacane cili. Ke draië catr ej, nge thatreine kö ni troa traqa kow.”​—Sal. 139:6.

17. Pine nemen matre jole koi së troa mekun ka hape, atre së hnyawa hi hnei Iehova?

¹⁷ Maine jë, hnene la aqane hetru së, maine aqane mele së maine hmi së ekö, matre jole koi së troa kapa ka hape, Iehova a hnimi së. Maine pena, hnene la itre ngazo së ekö, matre easë a mekune ka hape, tha aja i Iehova kö troa atre së, nge nanyi pala ha Nyidrëti qaathe së. Hna hane fe traqa la mekune cili koi Dravita. (Sal. 38:​18, 21) Maine jë tro la ketre atr ka isine troa saze, me trongëne la itre trepene meköti Iehova a hnyinge ka hape, ‘Maine atre ni hnyawa ju hnei Iehova, tro kö Nyidrëti a upi ni troa saze aqane mel, nge ka jole pe koi ni?’

18. Hnauëne laka nyipiewekë tro sa trotrohnine laka, atre kö Iehova la nyipi pengö së? (Wange ju fe la foto.)

¹⁸ Loi e tro sa trotrohnine laka, atre kö Iehova la nyipi pengö së. Nge öhne kö Nyidrë la ka loi the së. Nyidrëti a hnimi së, ngacama öhne hi Nyidrë la thiina së, me itre tria së, me itre mekuna së ka ngazo. (Roma 7:​15) Ame la easa trotrohnine laka, öhne hi Iehova la ewekë ka loi hne së hna atreine kuca, ke kola uku së troa nyihlue i Nyidrë cememine la madrin.

19. Nemene la hne së hna atre göi Iehova?

¹⁹ Atre hi së laka, Iehova la ihnim, nge pëkö nyine qaja e koho hun. (1 Ioa. 4:8) Ketre, atre hi së laka, hatrene ihnimi Nyidrëti koi së la itre trepene meköt. Nge Nyidrëti pala hi a ajane la ka loi koi së. Atre hi së laka, aja i Nyidrë tro sa mel epine palua. Matre hnei Nyidrëti hna hamë së la thupene mel, nge jëne la ahnahna cili, ijije hi tro sa amadrinë Iehova, ngacama tha ka pexeje kö së. (Roma 7:​24, 25) Ketre, atre hi së laka, “draië kö Akötresie hune la itre hni së, nge atre kö nyidrëti la nöjei ewekë asë.” (1 Ioa. 3:​19, 20) Atre hnyawa hi Nyidrë la nyipi pengö së, nge xecie koi Nyidrë laka, ijiji së hi troa kuca la aja i Nyidrë.

20. Nemene la ka troa xatua së matre tha tro kö sa hnehengazo menu?

²⁰ Tha Iehova kö a juetrëne la ketre ithuemacany, nge ka nyipiewekë pe tro sa atre. E tro sa trotrohnine hnyawane lai, tha tro kö së a hnehengazo menu pine la itre ewekë hne së hna thatre. Ngo tro pe së a mekune catrëne la itre ka nyipiewekë. Easë hi lai a amamane la mejiune së koi Iehova, lo “Atr ka hetre nyipi inamacan.” (Iobu 36:4) Ame enehila, hetre ewekë hne së hna thatre me tha trotrohnin. Ngo ame elany ngöne la fen ka hnyipixe, nyimutre la itre ewekë hne së hna troa inine göi Iehova uti hë epine palua.​—A. Cai. 3:​11.