Tru La Itre Ini Hnei Nyio Hna Kapa Qaathene La Atre Ini Ka Tru

TULU I KAKA ME NENË

Ame lo pune la itre macatre 1950, hnei kaka me nenë hna fek qa Italie a tro Canada e Kindersley. E thupen, hnei nyidro hna atre la nyipici, nge celë hi ka nyipiewekë ngöne la mele hun. Ame lo eni a nekönatr, eni me faming a cainöj ngöne la drai ka pexej, matre ame itre xaa ijin, eni a ihnyima me qaja ka hape, “Hnenge hna nyiqane la huliwa ne pionie ka ixatua lo eni a 8 lao macatre!”

Hnei kaka me nenë hna amamai tulu ka lolo koi ni, me trejin me ni, memine la lue xa i eni. Pëkö mo hun, ngo ka catr kaka me nenë huliwa koi Iehova. Ame lo 1963, hnei nyidro hna salemëne la itre mo i nyidro, matre sine la asabele koi itre nöj ka nyimutre e Pasadena (Californie). Ame lo 1972 hnei eahun hna fek troa xatuane la ketre ekalesia ka qene Italien e Trail, ngöne la Provës ne Canada ne Colombie Britanique, nge 1 000 lao kilomet qa koilo hnalapa. Kaka la ka thupëne la ketre batima. Tha hnei nyidrëti kö hna kapa la itre huliwa hna nyithupen atrun, matre huliwa catre koi Iehova.

Eni a olene kowe la tulu ka lolo i kaka me nenë. Tulu i nyidro la ka pane xatua ni ngöne la huliwa i Iehova. Hnei nyidro hna amamane koi ni la ketre ini ka sisitria, ene la troa amë panëne la Baselaia, nge tro pë hë Iehova a thupë ni.​—Mat. 6:​33.

NYIO A HULIWA I IEHOVA DRAI KA PEXEJ

Ame lo 1980, hnenge hna faipoipo me Debbie, ketre trejin föe ka amë panëne la itre huliwa i Iehova. Aja i nyio troa huliwa i Iehova drai ka pexej, matre hnei Debbie hna xom la huliwa ne pionie köni treu thupene la nyio a ase faipoipo. Thupene la ca macatre, hnei nyio hna fek kowe la ketre ekalesia ka co ka aja ixatua, nge e cili, hnenge hna xom la huliwa ne pionie.

Nyio ha nyiqane dekurag, matre hnei nyio hna mekun troa tro hmaca qa cili. Ngo qëmekene lai, hnei nyio hna pane qaja la mekuna i nyio kowe la atre thupëne la sirkoskripsio. Hnei nyidrë hna qaja mekötine koi nyio, ngo cememine la ihnim ka hape: “Qaathei epon la jol. Epon hi a goeëne la itre jol ka traqa koi epon. Ngo e tro epon a thel la itre ewekë ka loi, ke tro epon lai a öhn.” Celë hi eamo ka xatua nyio. (Sal. 141:5) Hnei nyio hna trongëne la eamo i nyidrë, nge nyio a öhne e cili laka, tru catr la itre ewekë ka lolo. Alanyim ngöne la ekalesia ka ajan troa huliwa catre koi Iehova, tune la itre jeunes, me itre trejin föe laka, tha ka hmi kö la itre föi angatr. Ketre ini lai ka ketri nyio. Hnei nyio hna inine troa thele la itre ewekë ka lolo, nge ame ngöne la itre ijine jol, troa treqe Iehova hnyawa. (Mika 7:7) Madrine hmaca ha nyio, nge lolo hë la mele i nyio.

Hnei nyio hna hane sine la Ini Koi Itre Pionie. Nge ame la itre trejin ka hamë ini, ke hnei angatr hna hane huliwa i Iehova ngöne la itre xaa nöj. Ame la angatr a amamane la itre foto, lo angatr a cainöj ngöne la itre nöje cili, me qaja la itre jol me itre manathith hnei angatr hna kapa, ke celë hi ka thue aja koi nyio troa hane mesinare. Matre hnei nyio hna mekun troa mesinare e ketre ijin.

Ame lo 1984, hnei nyio hna tro kowe la ketre ekalesia ka qene Wiwi e Québec, a 4 000 lao kilomet qa Colombie Britannique, matre eatrëne lo aja i nyio. Hnei nyio hna inine troa melëne la ketre aqane mel, me qene hlapa ka hnyipixe. Ngo hetre xaa jole kö. Ame itre xaa ijin, pëhë manie nyio, matre nyio a hlem la itre wene pomme de terre ngöne la ketre hlapa. E cili, hnei Debbie hna hnëkëne la nöjei pengöne xen memine lai pomme de terre. Ngacama tru la itre jol, ngo ka madrin pala hi nyio me catr. Ketre, öhne hnyawa hi nyio laka, Iehova a thupë nyio.​—Sal. 64:10.

Ame lo ketre ijin, hna asesëkötrë nyio la kola hë ngöne telefon. Hna hane hë nyio troa huliwa ngöne la Bethela e Canada. Ngo pine laka, hnei nyio hna nyialiene la pepa matre sine la Ini Gileada, matre nyio a luelu. Ngo hnei nyio kö hna kapa. Ame la nyio a traqa, hnei nyio hna hnyingëne koi Trejin Kenneth Little, ketre atrene la Komite Ne Filial ka hape, “Nemene la nyine tro nyio a kuca, e kola hë nyio troa sine la Ini Gileada?” Matre öni nyidrë, “Wange pi pë hë.”

Ca wiik thupen, hna hë eni me Debbie troa sine la ini Gileada. Matre nemene la nyine tro nyio a kuca? Öni Trejin Little: “Xome ju hë epon la ketre mekun, ngo hetre ijin tro epon a mekun ka hape, ‘loi ju kö lo tro nyiso a xom lo ketre mekun!’ Ka lolo asë hi la lue mekun. Tro kö Iehova a amanathithine la mekun hnei epon hna xom.” Hnei nyio hna kapa la ihë a tro Gileada, nge itre macatre thupen, nyio a öhne ka hape, nyipici kö lo hna qaja hnei Trejin Little. Hnei nyio pala hi hna amexeje lo hna qaja hnei nyidrë, kowe la itre xaa trejin ka xom la itre hnëqa ngöne la huliwa i Iehova.

MESINARE HË NYIO

Madrine catre nyio troa sine la hna 83ème Ini Gileada. Nge ala 24 eahun. Hna kuca la ini Gileada e Brooklyn, New-York lo Eiperem 1987. Ame la lue trejin ka lapa hamë ini koi eahun ke, Trejin Ulysses Glass me Jack Redford. Ame lo 6 Semitrepa 1987, thupene hi la 5 lao treu, hnei nyio hna kapa la diplôme i nyio. Hna upi nyio a tro Haïti, memine la lue xaa trefën John me Marie Goode.

Pëkö ca mesinare hna up a tro Haïti qane lo 1962, kolo macatre hna helëne la itre mesinare qa cili. Köni wiik thupene la Ini Gileada, traqa ha nyio e Haïti ngöne la ketre götrane gaa tru hnei wetr, ngöne la neköi ekalesia ka 35 lao ka cainöj. Jeune pala kö nyio lo ijine cili, nge pëkö hnei nyio hna atre. Nge nyio casi hi ngöne la uma ne mesinare. Ka pë ewekë la itre atr e cili, nge ka thatreine e tus. Hna lapa traqa la itre wene, me itre isi, me itre ka icilekeu me mus, me itre ka mani uma.

Tru catr la itre ini hnei nyio hna kapa qaathene la itre trejin ne Haïti, itre ka catr me madrine pala hi. Tha ka hmaloi kö la mele i angatr, ngo angatr a hnimi Iehova me catre cainöj. Ame la ketre trejin ka qatre föe nge ka thatreine e tus, ke traqa koi 150 lao xötr hnei eahlo hna atreine e gufan. Matre mama hnyawa ha koi nyio laka, Baselaia i Akötresie la nyin la itre jole ne la fen, nge loi e troa catre cainöj. Nyio a madrine laka, ame la itre xaa atr hnei nyio hna ini Tusi kow ekö, ke angatre hë a pionie lapa, me pionie hut maine qatre thup.

Ame lo nyio e Haïti, hnenge hna lapa porotrik me Trevor, ketre mesinare Mormon. Itre macatre thupen, hnenge hna kapa la ketre tus qaathei angeic, kola hape: “Eni hë la a troa xomi bapataiso, e thupen eni hmaca a pi bëek a tro Haïti me pionie hut ngöne la götrane hnenge hna mesinare koi itre Mormon.” Nge celë hi hnei angeic hna kuca. Itre macatre hnei angeic me föi angeic hna pionie hut e Haïti.

E EUROPE NGE E THUPEN E AFRIQUE

E thupen hna upi nyio a tro Slovénie. Ame e cili, kola nyiqane nue hmaca la huliwa ne cainöj. Ame lo 1992, hnei nyio hna traqa e Ljubljana, nge tha nanyi kö qa ngöne la traon hnei kaka me nenë hna mele ngön, qëmeken tro nyidroti a fek a tro Italie. Kolo pala hi a isi ngöne la itre xaa götran ne ex-Yougoslavie. Filial ne Autriche me itre buro e Zagreb (Croatie) me Belgrade (Serbie), la ka elemekene la huliwa ne cainöj ngöne la götrane cili. Ame enehila, tro la itre nöje cili a isa hetre Bethela i angatr.

Hnei nyio hna inine hmaca la ketre qene hlapa, me ketre aqane mel. Itre atr a majemine qaja ka hape, “Jezik je težek,” kola hape “Ka jol la qene hlapa.” Ke nyipici angatre hi! Hna ketri nyio hnene la aqane mele nyipici ne la itre trejin, ke angatr a kapa la itre ewekë ka saze ngöne la organizasio, nge hnei Iehova hna amanathithi angatr. Hnei nyio hna öhne la aqane amekötine Iehova la itre jol ngöne la ihnim me ngöne nyipi ijin. Hnene la itre macatre hnei nyio e Slovénie, hna jelenyipicine la itre ini hnei nyio hna kapa ekö, me hamëne la itre xaa ini ka hnyipixe.

Ngo hetre ewekë hmaca ka troa saze. Ame lo macatre 2000, hna upi nyio a tro Côte d’Ivoire, ngöne la götrane kolopi ne Afrique. Nge ame lo Nofeba 2002, hna nyiqane isi, matre hna upi nyio a tro Sierra Leone. Hna isi e cili koi 11 lao macatre, ngo pëhë enehila. Tha ka hmaloi kö troa canga kötr qa Côte d’Ivoire. Ngo hnei nyio hna inine tro pala hi a madrin.

Hnei nyio pala hi hna goeëne catrëne la itre ewekë ka lolo. Eje hi, tru la itre atr ka pi atre la nyipici, nge tru la ihnim ne la itre trejin, ngacama hnei angatr hna melëne la isi. Pëkö ewekë i angatr, ngo angatr a ce thawa me itre xan la hnei angatr hna hetreny. Ame lo ketre ijin, hnene la ketre trejin föe hna hamë iheetr koi Debbie. Xou Debbie troa xom, ngo hnene la trejin hna qaja ka hape: “Ame ngöne lo ijine isi, hnene la itre trejin ne la itre xaa nöj hna xatua eahun. Ame enehila, qanyi eahun pena xatua epun.” Aja i nyio troa nyitipune la tulu ka lolo ne la itre trejin ne Sierra Leone.

Hnei nyio hmaca hna bëek a tro Côte d’Ivoire, ngo hna isi hmaca pi politik. Celë hi matre, ame lo Nofeba 2004, hna kötresai nyio hnei hélicoptère, nge isa ca watrenge i nyio hi ka 10 kilo. Hnei nyio hna meköl ca jidr e cahu hnadro, thene la itre sooc i angetre Faras. Nge ame lo drai thupen, hna xomi nyio a tro Suisse. Ame la nyio a traqa e hnenyipajidr ngöne la Bethela, hnene la itre Atrene La Filial, me itre trejin ka hamë ini ngöne la Ini Thatraqane La Cainöj me itre föi angatr, hna kepe nyio hnyawa. Hnei angatr a haluthi nyio me hnëkë xen ka idreuth me hamë chocolat suisse koi nyio. Hna ketri nyio hnene la aqane kepe nyio hnei angatr.

Hna upi nyio pena a tro Ghana, nge e thupen, hnei nyio hmaca hna bëek a tro Côte d’Ivoire, ke nango lolo hë la nöj. Hna pane enienijë nyio hnene la itre ewekë ka traqa. Ngo hnei nyio hna atreine cile catr, hnene la ihnimi ne la itre trejin. Nyipici laka, pengöne kö la itre trejin ngöne la organizasio i Iehova. Ngo hnenge me Debbie pala hi hna nyipiewekëne la ihnim hna amaman koi nyio. Hnei nyio hna öhne e thupene laka, tru la itre ini hnei nyio hna kapa, qa ngöne la itre jol ka traqa koi nyio.

E MOYEN-ORIENT

Ame lo 2006, hnei nyio hna kapa la ketre tus qaathene la hnalapa ne xomi meköt. Nge kola upi nyio a tro Moyen-Orient. E cili, tro nyio hmaca a majemine kowe la ketre aqane mel, me cile kowe la itre xaa jol, me inine la ketre qene hlapa me qenenöj. Ame ngöne la nöje cili, tru catr la itre jol ka xulu qa ngöne la politik me hmi. Ka lolo catre la itre ekalesia, ke nyimutre la itre trejin ka traqa qa ngöne la itre xaa nöj, me ithanatane la itre xaa qene hlapa. Hnei nyio hna öhne la cas thene la itre trejin, la angatr a trongëne la itre hna amekötin qaathene la organizasio i Iehova. Nyio a haine la itre trejin, ke kola icilekeu hnei fami, me itre sine huliwa, me itre sine ini me itre atr ka lapa easenyi angatr.

Ame lo 2012, hnei nyio hna sine la ketre asabele ka ketrepengön e Tel Aviv (Israël). Qane lo Penetekos 33 M.K, kolo petre hi a icasikeu ka tru hnene la itre hlue i Iehova ngöne la nöje cili. Thatreine kö nyio thëthëhmine la ijine cili!

Ame lo nyio pala kö e Moyen-Orient, hna upi nyio troa wange la itre trejin, ngöne la ketre nöj hna wathebone la hmi së. Hnei nyio hna traqa fë itus koi angatr, me cainöje trootro, me sine la itre neköi asabele ne sirkoskripsio. Ame cili, ka tiqa hnei sooc ka thup. Ngo tha luelu menu kö nyio, ke nyio a ce tro memine la itre trejin ne la nöj nge ka hmek pala hi hun.

KOLA BËEK HMACA E AFRIQUE

Ame 2013, hnei nyio hna kapa la ketre ihë ka ketrepengön. Hna hane hë nyio troa huliwa ngöne la Bethela e Congo (Kinshasa). Ka mingöminge catr la nöje cili, ngo tru catre la itre isi me itre atr ka pë mo. Ame lo xötrei, öni nyio, “Ka loi ke, ka majemine nyio kowe la itre atr e Afrique.” Ngo tru pala kö la itre hnei nyio hna troa inin, ka tune la kola upi nyio kowe la itre götrane laka, pëkö gojeny. Hnei nyio hna lapa mekun la itre ewekë ka lolo. Tune la aqane catre cainöj la itre trejin, memine la itre trengecatr hnei angatr hna nu troa sine la itre icasikeu me asabele, memine la aqane catre i angatr me madrin, ngacama pëkö manie i angatr. Hnei nyio hna öhne hnyawa laka, kola tro loi la itre huliwa ne la Baselaia, hnene la manathith qaathei Iehova. Thatreine kö nyio thëthëhmine la itre macatre hnei nyio hna huliwa i Iehova e Congo, ke celë hi ka aijijë nyio troa hetre nyipi sinee, kösë sipu fami nyio.

Ame lo pun ne la macatre 2017, nyio pena a traqa e Afrique du Sud. Nyio petre hi a hane huliwa ngöne la ketre Bethela ka tru, nge ka hnyipixe koi nyio la itre huliwa hna athipe koi nyio. Tru la itre hnei nyio hna troa inine hmaca. Ngo hna xatua nyio hnene la itre ini hnei nyio hna kapa ekö. Ka tru koi nyio la itre trejin ka mele nyipici koi Iehova qaane ekö. Kola ketri nyio, la itre trejin ne la Bethela a ce huliwa ngöne la cas, ngacama isa nöje i angatre kö me qenenöj. Iehova a amanathithine la itre hlue i Nyidrë, me hamë angatr la tingeting. Nyidrëti a ujë tun, ke angatr a huliwane la itre thiina ka hnyipixe, me trongëne la itre trepene meköt ne la Tusi Hmitrötr.

Ame ngöne la itre macatre, hnenge me Debbie hna kapa troa tro kowe la itre nöj hna upi nyio kow. Hnei nyio hna inine la itre qenenöj me qene hlapa ka hnyipixe. Tha ka hmaloi kö, ngo hnei nyio hna öhne la ihnimi nyipici i Iehova, jëne la organizasio i Nyidrë, memine la itre trejin. (Sal. 144:2) Xecie koi nyio laka, ame la itre ini hnei nyio hna kapa ngöne la huliwa i Iehova, ke celë hi ka aijijë nyio troa catre imelekeu me Nyidrë.

Eni a olen kowe la aqane hetru ni hnei kaka me nenë, me aqane xatua ni hnei Debbie föeng, memine la tulu hna amamane hnene la itre trejin e cailo fen. Tru la aja i nyio tro pala hi a kepe ini qaathei Iehova, lo Atre Hamë Ini Ka Sisitria.