“[Iehova] Hi La Ka Iëne La Atre Hun”

Ame lo 1999, hnene la musi Fras hna upe la filial i easë troa nyithupen la itre impôt göne la itre ahnahna hna kapa qane lo macatre 1993 koi 1996. Hnei eahun hna thele ixatua thene la itre hnakootr e Fras, ngo pëkö thangan. Tha hune ju kö eahun, matre hnene la mus hna hule la 4,5 milio lao euros qa ngöne la compte bancaire ne la filial. Ngo eahun a mejiun kowe la Hnakootr Ka Tru. Qëmekene troa ithanatane la jol, hnene la Hnakootr Ka Tru hna hëne la itre avocat ne la musi Fras, me atre cilëne la Hnakootr Ka Tru troa ce axeciën me eahun la ketre mekun, qëmeken troa senge la jol.

Eahuni hi a mekuhni ka hape, tro lai atre cilëne la hnaakotr a upi filial troa kuiëne la sine la mani koi mus. Ngo atre hi hun laka, ame la troa kuiëne hi la ca euro, ke kola ena la itre trepene meköt ne la Tusi Hmitrötr. Hnei itre trejin hna kuiën la itre ahnahna thatraqane la itre huliwa ne la Baselaia. Matre ame la manie cili, ke tha manie musi kö.(Mat. 22:21) Ame pe hnei eahuni kö hna sine la icasikeu cili, matre amamane ka hape, easë a metrötrëne la itre wathebo ne la Hnakootr Ka Tru.

Hnei eahun hna icasikeu ngöne la ketre hnahag ka mingöming ne la Hnakootr. Ngo tha ka loi kö la aqane nyiqaan. Hnene la atre cilëne la Hnakootr Ka Tru hna qaja ka hape, tro la itre Temoë Iehova a nyithupene la ketre sine la taxe hna athipe hnene la musi Fras. Jëne la uati hmitrötre Iehova, öni eahun, “Atre fe hi eapo ka hape, ase hë mus xome la 4,5 milio lao euros qa ngöne la compte bancaire i eahun?”

Kola sesëkötr me wesitr hnene lai föe. Ame lo itre avocat ne la musi Fras a jelenyipicine ka hape, hnei mus hna xome la itre mani, ke saze pi hi la aqane goeëne eahlo lai jol. Hnei eahlo hna pane catrëne la itre avocat me nyipun lai icasikeu. Eni a öhne cili ka hape, Iehova hmekuje hi la ka atreine troa saze la itre ewekë. Eahuni a pane haine lai, nge tru la madrine hun la eahuni a tro qa cili.

Ame lo 30 Juun 2011, hnene la Hnakootr Ka Tru hna axecië mekun thatraqai së. Ame la mekun cili, ke ene la troa apëne la taxe, me upe la mus troa të la mani hnei angatr hna xom, me kuië mani koi easë! Qaane ju hi lai, hna thupëne hnyawane la hmi së e Fras. Ame lo hnying hnei eahun hna qaja, ngo tha hna hnëkëne kö, ke ceitune hi memine lo etë hna hna kowe la göbadri Goliatha, laka pë ju xomexoma. Hnauëne laka, hune ju kö së? Tune lo hnei Dravita hna qaja koi Goliatha, “[Iehova] hi la ka iëne la atre hun.”​—1 Sam. 17:​45-​47.

Tha eje hmekuje kö la jol hne së hna hun ngöne la hnakootr. Ngacama kola icilekeu me së hnei itre mus me hmi, ngo hune ju kö së ngöne lo 1 225 lao jol ngöne la 70 lao nöj, me ngöne la itre hnakootr. Kolo hi lai a thupëne la itre musi së, tune la troa atre së ka hape, ketre hmi, me troa nue së troa cainöj ngöne la gaa tru atr, me thipëne troa sine la itre huliwa i nöj, me tha xomi madra.

Hnauëne la kola upi ni troa ixatua ngöne la hnakootr e Europe, nge eni pe a huliwa ngöne la Hnalapa Ne Xomi Meköt ne la itre Temoë Iehova e New York (États-Unis)?

HNA HETRU NI NGÖNE LA HULIWA NE MESINARE

Hnei kaka me nenë, George me Lucille, hna hane sine la 12éme Ini Ne Gileada. Nge ame lo kola hnaho ni lo 1956, ke nyidroti e Éthiopie. Hnei nyidroti hna ati ëjeng Philip, tui Filipo atre tro fë la maca ka loi. (It. Hu. 21:8) Ame lo macatre thupen, hnei mus hna wathebone la itre huliwa së. Ngacama co petre kö ni, ngo tha thëthëhmine kö ni laka, faming a zae troa nyihlue i Iehova. Ame koi ni kösë eahuni a elo! Ngazo pe, ame lo 1960, hnei musi hna upi hun qa ngöne la nöj.

Hnei eahuni hna lapa e Wichita e Kansas (États-Unis). Tha patre kö thei kaka me nenë la ihnimi nyidro kowe la huliwa ne cainöj qaane lo nyidroti a mesinare. Mele i nyidroti hi la nyipici. Hnei nyidroti hna ini eni, me Judy mama i eni, me Leslie neköi jining, hna hnahone fe e Éthiopie, troa hnimi Iehova me catre nyihlue i Nyidrë. Hna bapataiso ni lo eni a 13 lao macatre. Köni macatre thupen, hnei eahuni hna fek a tro Arequipa e Pérou, ketre götran ka aja ixatua.

Ame lo 1974, lo eni a 18 lao macatre, hnene la Bethela ne Pérou hna acili ni me foa lao xaa trejin trahmany troa pionie hut. E kaa la teritoare hun? Ngöne la ketre götrane hna hape, Andes centrales, götrane tha hna ketre pala kö hnene la nyipici. Eahuni a cainöj kowe la itre ka qene Quechua me Aymara. Eahuni a xomi camping-car matre elë hune la itre wetr, nge hna ati ëjen ej ka hape, Aka, ke kösë sine kees. Thatreine kö ni thëthëhmine la itre ijine cili, la eni a amaman kowe la itre atr e cili, jëne la Tusi Hmitrötr laka, easenyi hë tro Iehova a apatrene la pë mo, me wezipo me mec. (Hna Am. 21:​3, 4) Alanyim thei angatr la ka kapa la maca ka loi.

HNA UPI NI KOWE LA HNALAPA NE XOMI MEKÖT

Ame lo 1977, hnei trejin Albert Schroeder, ketre atre ne la Lapa Ne Xomi Meköt, hna traqa troa wai hun e Pérou. E cili, hnei nyidrë hna ithuecatr koi ni troa nyialiene la pepa, matre huliwa ngöne la Bethela ne États-Unis. Nge celë hi hnenge hna kuca. Tha nanyi kö thupen, lo 17 Juun 1977, hnenge hna nyiaqane huliwa ngöne la Bethela e Brooklyn. Foa lao macatre ne eni a huliwa ngöne ménage me maintenance.

Ame lo Juun 1978, hnenge hna iöhny me Elizabeth Avallone lo ijine asabele koi itre nöj ka nyimutre, e Nouvelle-Orléans (Louisiane). Hna hetru angeice fe hnene la kem e thine i angeic ka hniin la nyipici. Foa ha lao macatre ne xome angeic la huliwa ne pionie lapa. Ka tru koi angeic la troa huliwa i Iehova drai ka pexej, nge ame koi angeic, aqane mele hi lai. Hnei nyio hna thel troa iatre hnyawa, tha qea ju kö nge ihnimi hë nyio. Hnei nyio hna faipoipo lo 20 Okotropa 1979, nge hnei Elizabeth hë hna huliwa ngöne la Bethela.

Hnene la itre trejin ne la pane ekalesia i nyio, ekalesia ka qene Espagnole e Brooklyn, hna kepe nyio hnyawa. Ngöne la itre macatre, hnene la köni xaa ekalesia hna kepe nyio me xatua nyio ngöne la huliwa i nyio. Tha thëthëhmine kö nyio la itre hnei angatr hna kuca koi nyio. Nyio a olen kowe la itre sinee me fami nyio, la hna xatua nyio troa thupëne la lue kem me thine i nyio ka qatre hë.

HULIWANG NGÖNE LA SERVICE JURIDIQUE

Ame lo Januare 1982 sesëkötre pi kö ni, la kola upi troa huliwa ngöne la service juridique ne la Bethela. Köni macatre thupen, hna upi ni troa ini ngöne université, matre troa hetre diplôme ne avocat. Hnenge hna inin ka hape, ame États-Unis me ngöne la itre xaa nöj, ke jëne la hna hun hnene la itre Temoë Iehova ngöne la itre hnakootr, tru hë la itre ewekë hna nu kowe la itre atr. Hnei eahun hna inin ajuin la itre ewekë cili.

Ame lo 1986 lo eni a 30 lao macatre, hna acile ni troa elemeken la service juridique. Eni a madrin, ke itre trejin a mejiun koi ni, ngacama ka jeune pala kö ni. Ngo eni fe a nango xou, ke tru catr hnei ewekë hnenge hna thatre, nge ketre hnëqa lai ka tha hmaloi kö.

Ame lo 1988, eni ha kapa la diplôme ne avocat. Kola tro la itre macatre ne eni a ini, nge tha öhne kö ni ka hape, kola ha jole trootro la imelekeu i eni me Iehova. Ame la easa ini aqeany, ke kola amejëne the së la pi mama, me mekun ka hape, sisitria kö së hui itre xan. Eloine pe, hnei Elizabeth hna xatua ni troa hetrenyi hmaca lo itre hna majemin ka loi ekö. Tha ka hmaloi kö, ngo hnenge hmaca hna catr easenyi Iehova. Eni a jelenyipicine laka, ame la troa inamacan, ke tha celë kö la ka nyipiewekë. Ame la ka sisitria ngöne la mel, ke ene la troa imelekeu hnyawa me Iehova, me hnimi Nyidrë me itre hlue i Nyidrë.

ENI A ISIGÖLINE LA MACA KA LOI QËMEKENE LA ITRE MUS

Thupen la eni a hetre diplôme, hnenge hna catre huliwa ngöne la service juridique ne la Bethela, me isigöline la huliwa ne la Baselaia ngöne la itre hnakootr. Ka tru koi ni la huliwang, ngo ka jol e xaa ijin, ke ka canga saze la itre ewekë ngöne la organizasio i Iehova. Ame ekö hna majemin troa itöne la itre itusi së, ngo ame hë lo 1990, hna upe la service juridique troa thel la aqane matre, tha tro hmaca kö a kuca la hna majemine cili. Celë hi ka ahmaloeëne la Bethela, memine la huliwa ne cainöj. Nge eje fe a thupë së qa ngöne la itre jol göi impôt. Itre xan a mekun ka hape, tro ha co la manie i easë, matre tha ijiji së hë troa hamë itus koi itre atr, nge xalaithe hi hnei ka troa atre Iehova. Ngo tha eje kö lai ka traqa. Qaane lo 1990, kolo pe a elë catr la etrune la atr ka nyihlue i Iehova, me itre atr ka kapa gufan la itre itus së ka hamë mel. Eni a öhne laka, hnene hmekuje hi la trengecatre i Iehova me itre hna amekötin qathene la hlu ka nyipici me inamacan, matre kola tro loi la itre ewekë ka saze ngöne la organizasio.​—Eso. 15:2; Mat. 24:45.

Tha hnene kö laka, ka huliwa hnyawa la itre avocat i easë, matre easa hun ngöne la itre hnakootr. Ngo hnene pe la aqane ujë ka lolo ne la itre hlue i Iehova, matre kola xatua së hnene la itre mus. Celë hi hnenge hna öhne lo 1998, lo kola sine la ketre asabele ka ketrepengön e Cuba, hnene la köni atre ne la Lapa Ne Xomi Meköt me föi angatr. Hnei angatr hna loi thiina me metrötr, matre xeci kowe la itre mus ka hape, tha easë kö a lö hnine la politik.

Ngo e thatreine kö iloi, ke easa “cilëgölin me isigöline la maca ka loi qëmekene la itre mus.” (Fil. 1:7) Ame ekö, tha hna nue së kö ngöne la itre nöj ne Europ me Corée du sud, troa kuca la service civil hune la troa sooc. Nemene hë la thangane lai? Traqa koi 18 000 lao trejin trahmany ne Europe nge 19 000 lao trejin ne Corée du Sud hna akalabusin, pine la mekuthetheu i angatr.

Ame hë lo 7 Julai 2011, hnene la Hnakootr Ka Tru hna axeciëne la ketre mekun ka tru göne lo ka traqa koi Bayatyan Arménie laka, tro la itre nöj ne Europe asë a nue troa kuca la service civile. Hnene fe la hnakootr ne Corée du sud hna xome la mekune cili lo 28 Juun 2018. Maine lö hnine ju la itre trejin trahmany la politik, ke tha tro kö së hun ngöne la hnakootr.

Itre service juridique ne la hnalapa ne xomi meköt me itre filial a huliwa catr, matre isigöline la itre huliwa ne la Baselaia. Ketre madrine ka tru la troa xatuan la itre trejin ka qëmek kowe la itre mus ka icilekeu. Ngacama, xatua së ju hë hnene la hnakootr maine waea, ngo easë a amamai tulu ka loi kowe la itre he ne mus, me itre joxu, me itre nöj. (Mat. 10:18) Itre atre amekötin me itre he ne mus, me itre atr, me media a e maine dreng la itre xötre hna cinyianyine ngöne la itre dossier hne së hna hamëne kowe la hnakootr maine kowe la itre avocat. Itre atr hë e cili a atre la pengöne la itre Temoë Iehova me öhne ka hape, hna nyitrepene la ini angatr hnei Tusi Hmitrötr. Itre Temoë Iehova ha la itre xan thei angatr.

OLETI IEHOVA!

Traqa koi 40 lao macatre hnenge hna ce huliwa me itre filial, göne la itre jol nyine trofë ngöne la hnakootr, me ithanata qëmekei angatr. Ka tru koi ni la itre trejin ka ce huliwa me eni ngöne la service juridique ne la hnalapa ne xomi meköt, me itre filial. Lolo catr la meleng, nge tru la itre manathith hnenge hna kapa.

Traqa koi 45 lao macatre hnei Elisabeth hna mele nyipici me xatua ni ce memine la ihnim, ngöne la itre ijine loi me ngazo. Eni a hai angeic, ke angeic a xatua ni ngacama hna tithi angeic hnene la ketre mec, ka akucakucanyi angeic.

Eahuni a atrehmekun laka, tha hnene kö la atreine hun me trengecatr hun, matre kola hun ngöne la itre hnakootr. Tune la hnei Dravita hna qaja, “Iehova la trengecatrene la nöje i nyidrë.” (Sal. 28:8) Nge, “nyidrëti hi la ka iëne la atre hun.”